បើតាមលោកវរៈសេនីយ៍ទោ ឈិត ឆាត នាយរងការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាល ខេត្តសៀមរាប បានឲ្យដឹងថាកាលពីវេលាម៉ោង២០ និង៣០នាទី ថ្ងៃទី០៦ ខែធ្នូ ឆ្នាំ២០២០ មានគ្រោះថ្នាក់ចរាចរមួយបានកើតឡើងរវាងម៉ូតូ និងរថយន្ត នៅលើកំណាត់ផ្លូវជាតិលេខ៦ ត្រង់ចំណុចចន្លោះគីឡូលេខ២៩៦ និង ២៩៧ ក្នុងភូមិរលួសលិច ឃុំរលួស ស្រុកប្រាសាទបាគង ខេត្តសៀមរាប។
លោកវរៈសេនីយ៍ទោ ឈិត ឆាត បានឲ្យដឹងទៀតថា ករណីគ្រោះថ្នាក់ចរាចរខាងលើនេះកើតឡើងដោយសារ ម៉ូតូមួយគ្រឿងម៉ាកMSX ពាក់ផ្លាកលេខសៀមរាប ១AJ ៧៩៧៥ បើកបរដោយឈ្មោះ ព្រីង ភេទប្រុស អាយុ៣៦ឆ្នាំ សញ្ជាតិខ្មែរ មានទីលំនៅភូមិគោកស្រុក ឃុំរលួស ស្រុកប្រាសាទបាគង បើកបរទិសដៅពីកើតទៅលិច។ លុះមកដល់ចំនុចកើតហេតុដោយម៉ូតូខាងលើបើកបរមិនប្រកាន់ស្ដាំ បានមកបុកពេញទំហឹងជាមួយរថយន្តមួយគ្រឿង ម៉ាកCamry ពណ៌ទឹកមាសពាក់ស្លាកលេខ សៀមរាប ២C ៥២៦១ បើកបរដោយអ្នកមិនស្គាល់អត្តសញ្ញាណ ដែលបើកបរទិសដៅបញ្ច្រាសគ្នា បណ្តាយឲ្យបុរសជាអ្នកបើកម៉ូតូខាងលើស្លាប់បាត់បង់ជីវិតនៅនឹងកន្លែងតែម្ដង។
ក្រោយកើតហេតុ កម្លាំងសមត្ថកិច្ចក៏បានចុះដល់កន្លែងកើតហេតុ ធ្វើការត្រួតពិនិត្យ ចំណែកេអ្នកបើកបររថយន្តCamry ខាងលើក៏បានគេចខ្លួន។ បច្ចុប្បន្នរថយន្ត និងម៉ូតូបង្កខាងលើត្រូវបានសមត្ថកិច្ច បានអូសយកមករក្សាទុកបណ្ដោះអាសន្ននៅស្នងការដ្ឋានស្រុកប្រាសាទបាគងបណ្ដោះអាសន្ន ដើម្បីរៀបចំសំណុំរឿងដោះស្រាយតាមនិតិវិធីនៅពេលក្រោយ ចំណែកឯសពជូនរងគ្រោះ ត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
អត្ថបទ និង រូបភាព៖ អ៊ុន ណារាជ្យ
