កាលពីរសៀលថ្ងៃទី០៧ ខែធ្នូ ឆ្នាំ២០២០ កម្លាំងនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តសៀមរាប សហការជាមួយកម្លាំងនគរបាលស្រុកសូទ្រនិគម បានឃាត់ខ្លួនជនសង្ស័យម្នាក់ ក្នុងករណីប្លន់សម្លាប់ លោកយាយ អាយុ៧១ឆ្នាំ រស់នៅភូមិដាក់ផ្កា ឃុំតាយ៉ែក ស្រុកសូនិគម ខេត្តសៀមរាប។
លោកវរសេនីយ៍ទោ ឆាន់ វុទ្ធី នាយរងការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តសៀមរាប បង្ហាញថា ឃាតកម្មនេះ កើតឡើងកាលពីថ្ងៃទី០៤ ខែធ្នូ ឆ្នាំ២០២០ សមត្ថកិច្ចជំនាញ បានស្រាវជ្រាវរកឃើញជនសង្ស័យម្នាក់។ ក្នុងថ្ងៃកើតហេតុនោះ ជនសង្ស័យ និងជនរងគ្រោះ បានទៅជីកដំឡូងជាមួយគ្នា ដោយមើលឃើញឱកាសល្អ ជនសង្ស័យឈ្មោះ ម៉ូវ ភា ភេទស្រី អាយុ ៣៣ឆ្នាំ រស់នៅភូមិតាយ៉ែក ឃុំតាយ៉ែក ស្រុកសូទ្រនិគម បានយកដងជំនីកវាយលើជនរងគ្រោះ និងប្រមូលយក ទ្រព្យសម្បត្តិ ពីជនរងគ្រោះបាន ប្រាក់ខ្មែរចំនួន២លាន ៨០ម៉ឺនរៀល ប្រាក់ដុល្លារចំនួន ១០០ដុល្លារ ខ្សែកលោហធាតុពណ៌ទង់ដែងមួយខ្សែ ចិញ្ចៀនលោហធាតុពណ៌ទង់ដែងពីរវង់ និងដុំលោហធាតុពណ៌ទង់ដែង ១កញ្ចប់តូច។
តាមចម្លើយសារភាពរបស់ជនសង្ស័យ មូលហេតុនៃឃាតកម្មនេះ បណ្ដាលមកពី ជនសង្ស័យ ចាញ់ល្បែង និងជំពាក់ប្រាក់គេច្រើន។
បច្ចុប្បន្នកម្លាំងនគរបាលជំនាញនៃស្នងការដ្ឋានខេត្តសៀមរាប កំពុងរៀបចំសំណុំរឿងបញ្ជូនខ្លួនស្ត្រីជនសង្ស័យ ទៅតុលាការ ដើម្បីចាត់ការតាមច្បាប់៕
អត្ថបទ និងរូបភាព៖ លោក ខេង ឧត្តម
កែសម្រួលអត្ថបទ ៖ លោក សេង ផល្លី
