នៅព្រឹកថ្ងៃទី០៨ ខែធ្នូ ឆ្នាំ២០២០នេះ អ្នកពាក់ព័ន្ធព្រឹត្ដិការណ៍សហគមន៍ ២៨វិច្ឆកា ក្នុងខេត្តសៀមរាប បានបន្តមកផ្ដល់សំណាកជាថ្មីលើកទី២ នៅមណ្ឌលចត្ដាឡីស័ក នៃសាលាគរុកោសល្យ និងវិក្រឹតការ ស្ថិតក្នុងសៀមរាប ដើម្បីពិនិត្យធ្វើតេស្តរកជំងឺកូវីដ-១៩។
លោក ក្រុស សារ៉ាត់ ប្រធានមន្ទីរសុខាភិបាល ខេត្ដសៀមរាប បង្ហាញថា អ្នកពាក់ព័ន្ធផ្ទាល់ និងប្រយោល ក្នុងព្រឹត្ដិការណ៍សហគមន៍ ២៨វិច្ឆិកា ចាប់ពីថ្ងៃទី២៩វិច្ឆិកា ដលល់ថ្ងៃទី៦ខែធ្នូនេះ មានចំនួនជិត ៥រយនាក់។
ទោះបីលទ្ធផល នៃការធ្វើតេស្តលើកទី១របស់ពួកគេ ពុំមានរកឃើញវិជ្ជមានជំងឺកូវីដ-១៩ ក៏ដោយ ក៏លោក ក្រុស សារ៉ាត់ បានអំពាវនាវ ដល់ប្រជាពលរដ្ឋដទៃទៀត ដែលបានដឹងថាមានពាក់ព័ន្ធ ព្រឹត្ដិការណ៍សហគមន៍ ២៨វិច្ឆកា បន្តមក ផ្ដល់សំណាក ដើម្បីធ្វើតេស្ដបន្តទៀត នៅមណ្ឌលចត្ដាឡីស័ក នៃសាលាគរុកោសល្យ និងវិក្រឹតខេត្ដសៀមរាប ។
លោកប្រធានមន្ទីរសុខាភិបាលខេត្ដ បញ្ជាក់ថា ចាប់ពីថ្ងៃទី២៩ ខែវិច្ឆកា ដល់ថ្ងៃទី០៦ ខែធ្នូឆ្នាំ២០២០នេះ ប្រជាពលរដ្ឋខ្មែរ និងជនបរទេស ក្នុងប្រទេស និងមកពីក្រៅប្រទេស បានចូលរួមផ្ដល់សំណាក ដើម្បីធ្វើតេស្ដរកមេរោគកូវីដ-១៩ នៅក្នុងខេត្ដសៀមរាប មានចំនួនជាង ៥រយនាក់ ខណៈរបាយការណ៍ក្រសួងសុខាភិបាល បង្ហាញថា គិតត្រឹមព្រឹកថ្ងៃទី០៨ ខែធ្នូ ឆ្នាំ២០២០ អ្នកឆ្លងជំងឺកូវីដ-១៩ ក្នុងព្រឹត្ដិការណ៍សហគមន៍ ២៨វិច្ឆកា នៅទូទាំងប្រទេស មានចំនួន ៣៤ នាក់៕
អត្ថបទ និងរូបភាព៖ លោក បូ សាវី
កែសម្រួលអត្ថបទ ៖ លោក សេង ផល្លី
