នៅព្រឺកថ្ងៃទី០៩ ខែធ្នូ ឆ្នាំ២០២០នេះ នៅអធិការដ្ឋាននគរបាលក្រុងសៀមរាប បានអនុញ្ញាតឲ្យប្រជាពលរដ្ឋ ដែលបានបាត់ម៉ូតូ មកស្វែងរកម៉ូតូរបស់ខ្លួន ដែលសមត្ថកិច្ចទើបបង្ក្រាប និងដកហូតបាន ពីទីតាំងបញ្ចាំក្នុងក្រុង ចំនួន២០គ្រឿង។
តាមការឲ្យដឹងពីលោកវរសេនីយ៍ទោ ដា ចំរើន អធិការនគរបាលក្រុងសៀមរាប ករណីចុះបង្រ្កាបនេះ កងកម្លាំងការិយាល័យនគរបាល ព្រហ្មទណ្ឌកម្រិតស្រាល នៃស្នងការនគរបាលខេត្តសៀមរាប បានសហការជាមួយ អធិការនគរបាលក្រុងសៀមរាប រួមនិងប៉ុស្តិ៍នគរបាលសង្កាត់ទឹកវិល និងនគរបាលសង្កាត់គោកចក ដកហូតបានម៉ូតូខុសប្រក្រតីចំនួន ២០គ្រឿង ពីទីតាំងបញ្ចាំស្របច្បាប់ និងខុសច្បាប់ ចំនួន៣កន្លែង ស្ថិតក្នុងសង្កាត់គោកចក និងសង្កាត់ទឹកវិល ក្នុងក្រុងសៀមរាប។
លោកអធិការនគរបាលក្រុង បញ្ជាក់ថា ចំពោះប្រជាពលរដ្ឋ ដែលមកស្វែងរកម៉ូតូនៅអធិការដ្ឋាននគរបាលក្រុង ត្រូវភ្ជាប់មកជាមួយឯកសារទិញម៉ូតូច្បាប់ដើម ម៉ូតូដែលពុំទាន់មានម្ចាស់មកទទួល លោកនឹងធ្វើការស្រាវជ្រាវរកម្ចាស់បន្តទៀត។ ដោយឡែក ម្ចាស់អាជីវកម្មទាំង៣ទីតាំងខាងលើ សមត្ថកិច្ចកំពុងដំណើរការផ្លូវច្បាប់ និងបន្តស្រាវជ្រាវទីតាំងដទៃទៀត។
លោកអធិការនគរបាលក្រុង ក៏បានអំពាវនាវ ដល់ម្ចាស់ទីតាំងអាជីវកម្មទទួលបញ្ចាំទាំងអស់ក្នុងក្រុងសៀមរាប សូមពិនិត្យ លើឯកសារកាន់កាប់ ប្រើប្រាស់ និងអត្តសញ្ញាណ របស់បុគ្គលដែលយកម៉ូតូ ឬយានយន្តមកបញ្ចាំឲ្យបានត្រឹមត្រូវ ចៀសវាងពាក់ព័ន្ធនឹងបទល្មើស និងការចោទប្រកាន់ពីសមត្ថកិច្ច។
អត្ថបទ និងរូបភាព៖ លោក សេង ផល្លី និងលោក ខេង ឧត្តម
