នៅព្រឹកថ្ងៃទី១១ខែធ្នូ ឆ្នាំ២០២០នេះ លោក ឃឹម ហ្វីណង់ អភិបាលស្រុកបន្ទាយស្រី បានបើកការដ្ឋានសាងសង់ផ្លូវក្រាលគ្រួសក្រហមមួយខ្សែ មានទំហំ៦ម៉ែត្រ និងប្រវែង ជាង ៧គីឡូម៉ែត្រ ដើម្បីតភ្ជាប់ភូមិដាច់ស្រយាលចំនួន៣ នៃឃុំឃុនរាម មកកាន់ទីប្រជុំជនក្នុងទីរួមស្រុកបន្ទាយស្រី ខេត្តសៀមរាប។
តាមការឲ្យដឹងពី លោកអភិបាលស្រុក ផ្លូវគ្រួសក្រហមថ្មីនេះ នឹងសម្រួលដល់ការធ្វើដំណើររបស់ប្រជាពលរដ្ឋជិត១ពាន់គ្រួសារ នៃភូមិកំព្រហ្ម អូរប៉ោង និងអូរម្នាស់ នៃឃុំឃុនរាម ស្រុកបន្ទាយស្រី។ ផ្លូវនេះដែរ សាងសង់ដោយប្រើកញ្ចប់ថវិកាអភិវឌ្ឍន៍របស់រដ្ឋបាលស្រុក និងសាងសង់លើផ្លូវលំចាស់ ដែលមានស្ថានភាពលំបាក ក្នុងការដឹកជញ្ជូនកសិផលរបស់ប្រជាពលរដ្ឋ និងត្រូវចំណាយពេលយូរ ដើម្បីមកដល់ទីរួមស្រុក។
លោកអភិបាលស្រុក បញ្ជាក់ថា បន្ទាប់ផ្លូវមួយខ្សែនេះសាងសង់រួចរាល់ វាក៏ជាផ្នែកមួយតភ្ជាប់ផ្លូវរបស់ស្រុក ទៅនឹងផ្លូវហាយវេ លេខ៦៦ នៃភូមិកំព្រហ្ម និងចំណេញការធ្វើដំណើររហូតដល់ជាង១០គីឡូម៉ែត្រ ហើយវាក៏បានផ្ដល់ភាពងាយស្រួលដល់ស្រុកអង្គរធំ ដែលជាស្រុកព្រំប្រទល់ធ្វើដំណើរឆ្លងកាត់ស្រុកបន្ទាយស្រីផងដែរ។
អត្ថបទ៖ បូ សាវី
រូបភាព៖រដ្ឋបាលស្រុកបន្ទាយស្រី
កែសម្រួលអត្ថបទ៖ សេង ផល្លី
