គណៈកម្មាធិការអន្ដរជាតិ ដើម្បីសម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្រ្ដអង្គរ ហៅកាត់ថា អាយស៊ីស៊ី-អង្គរ (ICC Angkor) បានសម្រេចលុបកិច្ចប្រជុំបច្ចេកទេសលើកទី៣៤ និងកិច្ចប្រជុំពេញអង្គលើកទី២៧ របស់ខ្លួន នៅខេត្តសៀមរាប ស្របតាមសេចក្ដីណែនាំរបស់រាជរដ្ឋាភិបាលកម្ពុជា ដើម្បីទប់ស្កាត់ការរីករាលដាលនៅក្នុងសហគមន៍ នៃជំងឺកូវីដ-១៩ នេះបើការបង្ហាញពីលោក ឡុង កុសល ប្រធានយកដ្ឋានផ្សព្វផ្សាយ និងជាអ្នកនាំពាក្យអាជ្ញាធរជាតិអប្សរា នៅថ្ងៃទី១២ខែធ្នូឆ្នាំ២០២០នេះ។
លោក ឡុង កុសល បញ្ជាក់ថា ការសម្រេចលុបកិច្ចប្រជុំនេះ ធ្វើឡើងដោយមានការឯកភាពពី សហប្រធានទាំងពីរ មានបារាំង និងជប៉ុន ព្រមទាំងការិយាល័យអង្គការយូណេស្កូប្រចាំរាជធានីភ្នំពេញ និងអាជ្ញាធរជាតិអប្សរា។ លោកបញ្ជាក់បន្ថែមថា ទោះបីកិច្ចប្រជុំត្រូវលុប ប៉ុន្តែការទំនាក់ទំនងការងារផ្សេងៗ រវាងស្ថាប័នពាក់ព័ន្ធទាំងអស់ នៅតែបន្តជាធម្មតា តាមរយៈប្រព័ន្ធអនឡាញ ដោយពុំមានការរាំងស្ទះដល់ដំណើការអភិរក្ស និងអភិវឌ្ឍប្រកបដោយចីរភាពក្នុងតំបន់រមណីដ្ឋានអង្គរឡើយ។
គួរជម្រាបថា កិច្ចប្រជុំរបស់គណៈកម្មាធិការអន្ដរជាតិ អាយស៊ីស៊ី-អង្គរ ត្រូវបានរៀបចំឡើងជាទៀងទាត់ ចំនួន ពីរដង ក្នុងមួយឆ្នាំ ដែលធ្វើឡើងក្នុងខែមិថុនា សម្រាប់កិច្ចការបច្ចេកទេស និងនៅខែធ្នូសម្រាប់កិច្ចប្រជុំពេញអង្គ ប៉ុន្ដែកិច្ចប្រជុំទាំងពីរនៅឆ្នាំ២០២០នេះ បានត្រូវលុប ដោយសារវិបត្តិជំងឺកូវីដ-១៩។
គួរបញ្ជាក់ដែរថា កិច្ចប្រជុំអាយស៊ីស៊ី-អង្គរ ក៏ជាឱកាសមួយក្នុងការចែករំលែកចំណេះដឹងទាក់ទង ទៅនឹងគំហើញថ្មីៗនៃកិច្ចការស្រាវជ្រាវ ការអភិរក្ស ជួសជុលបុរាណដ្ឋានក្នុងតំបន់អង្គរ និងការវាយតម្លៃលើការងារនៅតាមការដ្ឋាននានា ក្នុងតំបន់រមណីដ្ឋានអង្គរ ។ មិនតែប៉ុណ្នោះ កិច្ចប្រជុំនេះ ក៏នឹងទទួលបានចំណេះដឹង បទពិសោធន៍ការងារពីកិច្ចសហប្រតិបត្តិការជាតិ-អន្តរជាតិ រួមទាំងបានផ្តល់ឱកាសឱ្យអ្នកជំនាញខ្មែរ បានបង្ហាញសមត្ថភាព និងឡើងធ្វើបទបង្ហាញពីលទ្ធផលការងាររបស់ខ្លួន ជាភាសាជាតិ និងអន្តរជាតិដល់អ្នកជំនាញការនៃកិច្ចប្រជុំផងដែរ៕
អត្ថបទ និងរូបភាព៖ លោក បូ សាវី
កែសម្រួលអត្ថបទ ៖ លោក សេង ផល្លី
