បច្ចុប្បន្ន កូនខ្មែរជំនាន់ក្រោយ មានការយល់ដឹងតិចតួចណាស់ អំពីសាស្ត្រាស្លឹករឹត។ ដោយសារការរីកចម្រើននៃបច្ចេកវិទ្យា ការសិក្សារៀនសូត្រ ពីសាស្ត្រាស្លឹករឹត ត្រូវបានជំនួសដោយសៀវភៅ និងគ្រឿងអេឡិចត្រូនិចស្ទើរទាំងស្រុង។ ដោយការគាំទ្រពី ប្រមុខរាជរដ្ឋាភិបាល សម្ដេចអគ្គមហាសេនាបតីតេជោ ហ៊ុន សែន យុវជនមួយក្រុម ស្ថិតក្នុងភូមិគោកថ្មី ឃុំពួក ស្រុកពួក ខេត្តសៀមរាប បានបង្ហាញនូវទឹកចិត្តកាន់តែមុះមុត ក្នុងការអភិរក្សសាស្ត្រាស្លឹករឹត។
កាលពីនៅថ្ងៃទី១១ ខែធ្នូ ឆ្នាំ២០២០ អ្នកនាង ភឿន ផាវី អ្នកចារអក្សរលើស្លឹករឹត លើកឡើងថា សាស្ត្រាស្លឹករឹត ផលិតចេញពីស្លឹកទ្រាំង ឬតំបន់ខ្លះគេហៅថា ស្លឹកជ្រេ ឬ ស្លឹករឹតតែម្ដង ដោយគេយកស្លឹកដែលកាត់ហើយ ទៅហាលឲ្យស្ងួតយកមកចងរឹត គាបយ៉ាងស្អាតមុន នឹងយកមកកត់ត្រាជាចេញ រឿងរ៉ាវ ក្បួនច្បាប់ ឬជារូបយ័ន្តផ្សេង សម្រាប់មនុស្សជំនាន់ក្រោយធ្វើការសិក្សាស្វែងយល់។
អ្នកនាង ភឿន ផាវី បង្ហាញថា ដោយមើលឃើញពីទឹកចិត្តស្រឡាញ់ ចេះថែរក្សាសម្បត្តិវប្បធម៌របស់ក្មេងៗជំនាន់ក្រោយ សម្ដេចតេជោ ហ៊ុន សែន បានគាំទ្រជាថវិកា ដល់ក្រុមអ្នកនាង ក្នុងការចម្លងក្បួនច្បាប់ក្រមង៉ុយ ដើម្បីផ្ដល់ជូនទៅគ្រប់ទីអារាមនៅក្នុងប្រទេសកម្ពុជា។
បច្ចុប្បន្ន ក្រុមចារស្លឹករឹតរបស់ អ្នកនាង ភឿន ផាវី មានទាំង យុវជន កុមារា និងកុមារី។ តាមការលើកឡើងរបស់ពួកគេ ការចារស្លឹករឹតមានការលំបាក ខុសឆ្ងាយពីការសរសេរលើក្រដាសសៀវភៅ។
បើទោះបីជាយ៉ាងនេះក្តី បញ្ហាកង្វះវត្ថុធាតុដើម នៅតែជាក្តីកង្វល់ ព្រោះស្លឹកទ្រាំង ដែលជាវត្ថុធាតុដើមសំខាន់តែមួយគត់ កាន់តែហិនហោចទៅៗ ដោយសារតែសកម្មភាពកាប់ព្រៃរានយកដីរបស់កសិករ។
គួរជម្រាបថា តាមរយៈវិទ្យាស្ថានស្លឹករឹត ដើមទ្រាំង មានដើមកំណើតនៅភាគខាងកើត និងខាងជើងប្រទេសឥណ្ឌា និងប្រទេសស្រីលង្កា។ នៅទ្វីបអាស៊ីអាគ្នេយ៍វិញ ដើមទ្រាំងនេះមាននៅប្រទេសកម្ពុជា ភូមា និងប្រទេសថៃ។ នៅប្រទេសកម្ពុជា ដើមទ្រាំងភាគច្រើនមាននៅខេត្តក្រចេះ និងខេត្តកំពង់ធំ។
អត្ថបទ និងរូបភាព៖ លោក ខេង ឧត្តម
កែសម្រួលអត្ថបទ ៖ លោក សេង ផល្លី