នាព្រឹកថ្ងៃទី១១ ខែធ្នូ ឆ្នាំ២០២០ នៅទីស្ដីការក្រសួងព័ត៌មាន ឯកឧត្ដម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានធ្វើការពិនិត្យ ពិភាក្សាជាមួយក្រុមការងារបច្ចេកទេសសាងសង់ របស់ក្រសួងព័ត៌មាន អំពីគម្រោងប្លង់សាងសង់អគារស្ថានីយវិទ្យុ និងទូរទស្សន៍បូកគោ ដែលមានទីតាំងស្ថិតភ្នំបូកគោ ក្នុងខេត្តកំពត។
ឯកឧត្ដម ខៀវ កាញារីទ្ធ លើកឡើងថា អគារដែលគ្រោងសាងសង់ថ្មីនេះ ស្ថិតនៅទីតាំងអគារចាស់ ដែលបានសាង់សង់ តាំងពីយូរឆ្នាំមកហើយ តែមកដល់ពេលនេះ មានសភាពចាស់ទ្រុឌទ្រោម មិនអាចចូលបំពេញការងារបាននោះទេ។ បន្ទាប់ពីការសម្រេចការពិភាក្សាជារួមនៃគម្រោងនេះ ឯកឧត្ដមនឹងដាក់សំណើសុំការសម្រេចពី សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃកម្ពុជា ធ្វើការពិនិត្យ និងសម្រេច។
ឯកឧត្ដមរដ្ឋមន្រ្ដី ក៏បានគូសបញ្ជាក់ថា គម្រោងសាង់សង់អគារថ្មី នៅលើភ្នំបូកគោនេះ សម្រាប់ធ្វើជាអគារស្ថានីយវិទ្យុ និងទូរទស្សន៍ផ្សាយបន្ត ពីស្ថានីយកណ្តាល របស់ទូរទស្សន៍ជាតិកម្ពុជា និងស្ថានីយ៏វិទ្យុជាតិ FM វត្តភ្នំ និង វិទ្យុជាតិ FM ៩៦។
សូមបញ្ជាក់ផងដែរថា គម្រោងសាង់សង់អគារថ្មី នៅលើភ្នំបូកគោនេះ ក៏មានកន្លែងស្នាក់នៅរបស់បុគ្គលិក បន្ទប់ស្ទូតយោវិទ្យុ សាលប្រជុំ ទីតាំងសាងសង់ អង់តែន និងទីធ្លាសម្រាប់ចតយានយន្ត ពិសេសទៀតនោះធ្វើផ្លូវចូលសម្រាប់ជនពិការ។ ចំពោះសារៈសំខាន់នៃការសាងសង់អគារស្ថានីយវិទ្យុ និងទូរទស្សន៍ បូកគោនេះ ព្រោះមាន ទីតាំងនៅលើភ្នំបូកគោ មានលក្ខណ:អំណោយផលល្អ សម្រាប់ដាក់ស្ថានីយផ្សាយបន្ត វិទ្យុជាតិ និងទូរទស្សន៍ជាតិកម្ពុជា ដែលអាចផ្សាយបានទៅកាន់តំបន់ឆ្ងាយៗ នៅជុំវិញខេត្តកំពត ពិសេសសម្រាប់អ្នកនេសាទនៅសមុទ្រ អាចបើកមើលឃើញ និងស្តាប់បាន ពីការ ផ្សាយរបស់វិទ្យុ និងទូរទស្សន៍អំពីដំណឹង និងព័ត៌មានថ្មីៗ ទាន់ហេតុការណ៍ ព្រមទាំងការព្យាករណ៍អាកាសធាតុផងដែរ។
លើសពីនេះទៀត អ្វីដែលសំខាន់នោះគឺការផ្សាយការព្យាករណ៍អាកាសធាតុ និងព័ត៌មានទាន់ហេតុការណ៍ទាក់ទង ខ្យល់ព្យុះ សម្រាប់ អ្នកនេសាទនៅសមុទ្រឱ្យបានដឹងទាន់ពេល ដើម្បីចៀសពីឧបទ្ទវហេតុផ្សេងៗ ដែលកើតមាន។ ជាមួយគ្នានេះដែរ ក្នុងគម្រោងនៃការសាងសង់អគារថ្មី ក៏ជាកន្លែទុកសម្រាប់ឱ្យមន្ត្រីក្រសួងព័ត៌មាន មកលេងកម្សាន្ត និងស្នាក់នៅក្នុងរយៈពេលខ្លីបានផងដែរ។ សម្រាប់គម្រោងនៃការសាងសង់ថ្មី គឺសម្រាប់បម្រើដល់ការងារផ្សព្វផ្សាយ ឱ្យបានច្រើនកន្លែង ដោយហេតុថា ពីមួយថ្ងៃទៅមួយថ្ងៃ សម្រាប់ក្រសួងព័ត៌មាន កាន់តែមានកិច្ចការងារជាច្រើនដែលត្រូវបំពេញ ទាំងថ្នាក់ជាតិ និងអន្តរជាតិ ដើម្បីធ្វើយ៉ាងណាឱ្យ វិស័យព័ត៌មាន និងសោតទស្សន៍កាន់តែរីកចម្រើន ស្របតាមការវិវត្តនៃបច្ចេកវិទ្យាព័ត៌មានវិទ្យា និងស្របតាមទិសស្លោក ប្លែក លឿន ទុកចិត្តបាន នៅទីណា ពេលណាក៏បាន៕
អត្ថបទ និងរូបភាព៖ ក្រសួងព័ត៌មាន
