កាលពីល្ងាចថ្ងៃទី០៦ ខែធ្នូ ឆ្នាំ២០២០ ក្រុមការងារចម្រុះ ដឹកនាំដោយលោក នាក់ ណេរ៉ុន អភិបាលរងខេត្ដសៀមរាប បានចុះអប់រំ ណែនាំដល់អាជីវករនៅតាមបណ្តោយវិថីសម្ដេចវិបុលបញ្ញា សុខ អាន ឬហៅថាផ្លូវ៦០ម៉ែត្រ ស្ថិតក្នុងសង្កាត់ស្លក្រាម ក្រុងសៀមរាប អំពីការអនុវត្តន៍គោលការណ៍សុវត្ថិភាព ដើម្បីទប់ស្កាត់ការរីករាលដាលនៃជំងឺកូវីដ១៩ ជាពិសេសចូលរួមបញ្ចប់ព្រឹត្តិការណ៍សហគមន៍ ២៨វិច្ឆិកា ស្របតាមសេចក្ដីណែនាំរបស់រាជរដ្ឋាភិបាល។
លោកអភិបាលរងខេត្ដ លើកឡើងថា តាមការសង្កេតឃើញរបស់ក្រុមការងារ អាជីវកប្រមាណ៧០% បានរៀបចំកន្លែងលក់ដូរបានល្អ ដោយឡែកតូបលក់ចំណីអាហារ នៅពុំទាន់ គោរពតាមគោលការណ៍សុវត្ថិភាពនៅឡើយ ដូចជាគ្មានគម្លាតសុវត្ថិភាព គ្មានអនាម័យ គ្មានការចូលរួមប្រយុទ្ធប្រឆាំងនឹងជំងឺកូវីដ១៩នេះ។
គួរជម្រាបថា កាលពីសប្ដាហ៍កន្លងទៅថ្មីៗនេះ រដ្ឋបាលខេត្តសៀមរាប បានប្រគល់ម៉ាសទៅក្រុងស្រុកទាំង១២ ដើម្បីបំផុសការពាក់ម៉ាស និងលាងសម្អាតដៃជាប្រចាំ ជាមួយនោះ អាជ្ញាធរខេត្ត និងក្រុង-ស្រុកទាំង១២ បានចុះអប់រំប្រជាពលរដ្ឋនៅតាមបណ្ដាទីប្រជុំជន និងទីផ្សារនានា ដើម្បីធ្វើយ៉ាងណា ឲ្យប្រជាពលរដ្ឋយល់ដឹងកាន់តែច្បាស់ ពីការចំលង និងទប់ស្កាត់នៃការជំងឺកូវីដ-១៩ និងវិធីទប់ស្កាត់។
យោងតាមរបាយការណ៍ មន្ទីរសុខាភិបាលខេត្តសៀមរាប ការប្រមូលសំណាកអ្នកពាក់ព័ន្ធទាំងអស់ នៃព្រឹត្តិការណ៍សហគមន៍២៨វិច្ឆិកា សរុបចំនួន ៤១៣នាក់ ក្នុងនោះលទ្ធផលធ្វើតេស្តសំណាកទាំងអស់នោះលើកទី១ គឺពុំមានវិជ្ជមានជំងឺកូវីដ-១៩ឡើយ។ នៅថ្ងៃទី០៨ស្អែកនេះ មន្ទីរសុខាភិបាលខេត្តសៀមរាប នឹងប្រមូលសំណាកអ្នកពាក់ព័ន្ធទាំងអស់នោះលើកទី២ ដើម្បីធ្វើតេស្តជាលើកទី២។
គួរបញ្ជាក់ថា គិតត្រឹមម៉ោង ០៧:០០ព្រឹកថ្ងៃទី០៧ ខែធ្នូ ឆ្នាំ២០២០ ចំនួនអ្នកឆ្លងជំងឺកូវីដ-១៩ ក្នុងព្រឹត្ដិការណ៍សហគមន៍២៨វិច្ឆិកា នៅទូទាំងប្រទេស មានចំនួនសរុប ៣២នាក់។
អត្ថបទ និងរូបភាព៖ លោក បូ សាវី និង លោក យូ វង្ស
កែសម្រួលអត្ថបទ ៖ លោក សេង ផល្លី
