តាមរយៈសេចក្ដីជូនដំណឹងរបស់ ក្រសួងប្រៃសណីយ៍ និងទូរគមនាគមន៍ កាលពីថ្ងៃទី១៥ ខែធ្នូ ឆ្នាំ២០២០ ឧក្រិដ្ឋជនឬ ហៅថា ហេកគ័រ (Hacker) បានប្រើកម្មវិធីតេលេក្រាម (Telegram) និងបន្លំប្រើឈ្មោះថ្នាក់ដឹកនាំនៃរាជរដ្ឋាភិបាល ឬឈ្មោះបុគ្គលដទៃទៀត ដើម្បីផ្ញើសារភ្ជាប់នឹងមេរោគ ក្នុងការលួចយកព័ត៌មានចាំបាច់របស់ម្ចាស់គណនី។
សេចក្ដីជូនដំណឹងនេះ បង្ហាញថា បន្ទាប់ពីម្ចាស់គណនី ដែលបានចុចបើកឯកសារ ឬកម្មវិធីដែលមានផ្ទុកមេរោគនោះ
ឧបករណ៍អេឡិចត្រូនិច របស់ជនរងគ្រោះ នឹងត្រូវគ្រប់គ្រង និងប្រើប្រាស់ពីចម្ងាយដោយជោគជ័យ។ ជាមួយនោះ ឧក្រិដ្ឋជនលួចអាចលួចយកទិន្នន័យនានា ដូចជា ឯកសារ លេខកូដសម្ងាត់ (Password/ Passcode) សម្រាប់ប្រើកម្មវិធីផ្សេងៗ ព្រមទាំងបញ្ជាលើម៉ាស៊ីនថតរូប (Camera) ឬប្រើឧបករណ៍ថតសំឡេងលើឧបករណ៍អេឡិចត្រូនិចទាំងនោះផងដែរ។
ដើម្បីជៀសវាងការធ្លាក់ទៅក្នុងអន្ទាក់បោកប្រាស់របស់ឧក្រិដ្ឋជន សេចក្ដីជូនដំណឹងដដែលនេះ បង្ហាញថា អ្នកប្រើប្រាស់កម្មវិធីតេឡេក្រាមទាំងអស់ គួរតែផ្ទៀងផ្ទាត់ និងត្រួតពិនិត្យគណនីរបស់បុគ្គលដែលបានផ្ញើសារមក ដូចជា លេខទូរសព្ទ និងឈ្មោះ ឱ្យបានច្បាស់លាស់ មុននឹងចុចបើកឯកសារ និងកម្មវិធីណាមួយក្នុងសារទាំងនោះ ជាពិសេស ចំពោះសារ ទាំងឡាយណា ដែលបានផ្ញើមកជាលើកដំបូង មិនមានប្រវត្តិឆ្លើយតប ទោះបីជាមានរូបភាព និងឈ្មោះរបស់ថ្នាក់ដឹកនាំក្នុងជួររាជរដ្ឋាភិបាល ឬអ្នកធ្លាប់ស្គាល់ក៏ដោយ។ ប្រសិនបើ បានយល់ថា ម្ចាស់គណនីមិនមែនជាម្ចាស់គណនីពិតប្រាកដ ឬពុំធ្លាប់ស្គាល់ អ្នកប្រើប្រាស់អាចបិទ ឬពាក្យបច្ចេកទេសហៅថា Block លើគណនីនោះ៕
អត្ថបទ៖ លោក សេង ផល្លី
