អង្គការ LotusWorld សហការជាមួយអាជ្ញាធរមូលដ្ឋាន ចែកស្បៀងអាហារប្រចាំខែជូនប្រជាពលរដ្ឋរងផលប៉ះពាល់ដោយសារជំងឺកូវីដ-១៩
នៅព្រឹកថ្ងៃទី២៣ ខែធ្នូ ឆ្នាំ២០២០នេះ អង្គការក្រៅរដ្ឋាភិបាល ឡតទុសវើល (LotusWorld) ក្រោមជំនួយឧបត្ថម្ភរបស់ ទីភ្នាក់ងារសហប្រតិបត្តិការណ៍អន្តរជាតិនៃសាធារណរដ្ឋកូរ៉េ ដែលហៅកាត់ថា KOICA បានចូលរួមចំណែកជាមួយរាជរដ្ឋាភិបាលកម្ពុជា តាមរយៈការផ្តល់ស្បៀងអាហារដោយផ្ទាល់ សម្រាប់ប្រជាពលរដ្ឋរងផលប៉ះពាល់ដោយសារវិបត្តិកូវីដ១៩ រយៈពេល៥ខែ ក្នុងស្រុកគោលដៅចំនួន៣ នៃខេត្តសៀមរាប។
កញ្ញា ម៉ម ម៉ុប មន្រ្តី ទទួលបន្ទុកផ្នែកសង្គមកិច្ចរបស់អង្គការ ឡតទុសវើល (LotusWorld) បញ្ជាក់ឲ្យដឹងថា៖ ការចែកជូនស្បៀងអាហារដល់ប្រជាពលរដ្ឋ ដែលទទួលរងការខ្វះខាតដោយសារតែវិបត្តកូវីដ-១៩ នៅសង្កាត់នគរធំនេះ មានចំនួន៨៨គ្រួសារ នៃប្រជាពលរដ្ឋរងការខ្វះខាតសរុបចំនួន ៥០០ របស់កម្មវិធីចែកគ្រឿងឧបភោគបរិភោគ និងសម្ភារៈការពារជំងឺឆ្លង ដល់ប្រជាពលរដ្ឋ ដែលកំពុងរងផលប៉ះពាល់ដោយសារជំងឺកូវីដ-១៩។ ចំពោះចំនួនគ្រួសារមានជីវភាពខ្វះខាតទាំងអស់នេះ អង្គការ រួមនិងមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តសៀមរាប និងអាជ្ញាធរមូលដ្ឋាន បានសហការគ្នា ធ្វើការវាយតម្លៃទៅលើស្ថានភាពគ្រួសារ និងយោងទៅតាមបណ្ណសមធម៌ ប្រភេទក្រ ១ និងក្រ ២។
មន្រ្តីអង្គការដដែលនេះ បញ្ជាក់បន្ថែមថា សម្រាប់ខែធ្នូនេះ ជាខែចុងក្រោយ នៃកម្មវិធីជួយប្រជាពលរដ្ឋរងផលប៉ះពាល់ដោយវិបត្តកូវីដ-១៩នេះ ដែលមានរយៈពេលប្រាំខែហើយ ដោយក្នុងមួយខែៗ ក្នុងមួយគ្រួសារទទួលបាន អង្ករ ៣២គ.ក ត្រី-ខ ប្រេងឆា និងសាប៊ូលាងចានជាដើម។ ក្រៅពីចែកស្បៀងអាហារ កម្មវិធីនេះ ក៏មានចុះទៅតាមភូមិគោលដៅមួយចំនួន ដើម្បីចែកម៉ាស បង្រៀនពីវិធីទប់ស្កាត់ការចម្លងនៃជំងឺកូវីដ-១៩ និងបាញ់ថ្នាំសម្លាប់មេរោគនៅតាមសាលារៀន វត្តអារាម និងទីផ្សាយជាដើម។
សកម្មភាពសប្បុរសធម៌របស់ កយកា និង ឡតទុសវើល (LotusWorld) គឺជាការចូលរួមចំណែក ជាមួយរាជរដ្ឋាភិបាលកម្ពុជា ដែលបានយកចិត្តទុកដាក់ខ្ពស់ចំពោះជីវភាពរស់នៅរបស់ប្រជាពលរដ្ឋក្នុងវិបត្តិកូវីដ-១៩ ដូចជាការផ្តល់ជូនសាច់ប្រាក់ជំនួយសង្គមជាដើម។
ស្រ្តី២រូប ដែលទទួលបានជំនួយឧបត្ថម្ភក្នុងគម្រោងនេះ លើកឡើងថា វិបត្តិកូវីដ-១៩ បានធ្វើឲ្យជីវភាពគ្រួសាររបស់ពួកគាត់ជួបការលំបាកកាន់ខ្លាំង និងពុំមានការងារធ្វើឡើយ។ ជំនួយរបស់រាជរដ្ឋាភិបាល និងកយកា បានជួយសម្រាលការលំបាករបស់ពួកគាត់ក្នុងគ្រាដ៏លំបាកនេះ។
គួរជម្រាបថា អង្គការ ឡតទុសវើល (LotusWorld) បានបង្កើតឡើងក្នុងឆ្នាំ២០០៦ ដើម្បីបេសកកម្មការងារជួយគាំពារកុមារ លើកកម្ពស់ជីវភាព សុខុមាលភាពប្រជាពលរដ្ឋ និងកិច្ចការសង្គមក្នុងខេត្តសៀមរាប។ ក្នុងនោះ អង្គការ បាននិងកំពុងជួយគាំទ្រ លើកទឹកចិត្ត និងឧបត្ថម្ភសិស្សក្រីក្រ បង្កនូវលទ្ធភាពសិក្សា ក្នុង១ឆ្នាំៗ ប្រមាណជាង៤០០នាក់ ចាប់ពីថ្នាក់ទី១ រហូតដល់ថ្នាក់ទី១២ តាមរយៈនៃគម្រោង សប្បុរសជនម្នាក់ ជួយសិស្សម្នាក់ ( one on one sponsor ) ៕
អត្ថបទ និងរូបភាព ៖ លោក ងិន គឹមឡេង
កែសម្រួលដោយ៖ លោក សេង ផល្លី
