សមាជិកក្រុមប្រឹក្សាខេត្ត ប្រគល់យានយន្តនិងទូកនេសាទ ជូនគ្រួសារខ្មែរឥស្លាមក្រីក្រ ក្នុងក្រុងសៀមរាប
នាព្រឹកថ្ងៃទី២៣ ខែធ្នូ ឆ្នាំ២០២០ ឯកឧត្តម អែល សៀត សមាជិកក្រុមប្រឹក្សាខេត្ត និងជាអនុប្រធានសាសនាឥស្លាមខេត្តសៀមរាប បាននាំយក ម៉ូតូ៦គ្រឿង. រ៉ឺម៉កសណ្ដោង ៥គ្រឿង និង ទូកនេសាទ ប្រភេទទូកស្មាច់ ចំនួន៧គ្រឿង ប្រគល់ជូនគ្រួសារខ្មែរឥស្លាមក្រីក្រចំនួន ១៣គ្រួសារ រស់នៅក្នុងក្រុងសៀមរាប។
ឯកឧត្តម សមាជិកក្រុមប្រឹក្សាខេត្ត បង្ហាញថា អំណោយនេះ ទទួលបានពី សមាគមសម្របសម្រួល និងអភិវឌ្ឍន៍សង្គម និងរួមសហការជាមួយ សមាគមពិភពលោកនៃក្តីមេត្តា នៃរដ្ឋគូវ៉ែត ដើម្បីចូលរួមជាមួយរាជរដ្ឋាភិបាលកម្ពុជា ក្នុងការកាត់បន្ថយភាពក្រីក្ររបស់ប្រជាពលរដ្ឋ។
ឯកឧត្តម លើកឡើងថា នាពេលកន្លងមក គណៈគ្រប់គ្រងសាសនាឥស្លាមខេត្ត តែងតែគៀងគររកមូលនិធិពីសប្បុរសជនទាំងក្នុង និងក្រៅប្រទេស ដើម្បីជួយសម្រាលជីវភាពខ្វះខាតរបស់ប្រជាពលរដ្ឋ។ នេះជាលើកទី១ហើយ សមាគមសម្របសម្រួលនិងអភិវឌ្ឍន៍សង្គម ប្រគល់អំណោយជាយានជំនិះ សម្រាប់គ្រួសារខ្វះខាតយកទៅប្រកបរបរចិញ្ចឹមជីវិត ហើយគម្រោងសាកល្បងនេះ នឹងមានជាបន្តបន្ទាប់ប្រសិនបើ ប្រជាពលរដ្ឋយកទៅប្រើប្រាស់ជួយដល់ជីវភាពបានល្អប្រសើរ។
ឆ្លៀតក្នុងឱកាសនោះ ឯកឧត្តម សមាជិកក្រុមប្រឹក្សាខេត្ត ក៏បានក្រើនរំលឹក បងប្អូនប្រជាពលរដ្ឋទាំងអស់ បង្កើនការប្រុងប្រយ័ត្ន នូវការផ្ទុៈឡើងវិញ នៃជំងឺកូវីដ-១៩ ចូលក្នុងសហគម សូមបន្តគោរពតាមគោលការណ៍អនាម័យ របស់ក្រសួងសុខាភិបាល ក៏ដួចជា បទបញ្ជាផ្សេងៗរបស់រាជរដ្ឋាភិបាលកម្ពុជា៕
អត្ថបទ និងរូបភាព ៖ លោក ទ្រា ពន្លឺ
កែសម្រួលដោយ៖ លោក សេង ផល្លី
