តម្លៃស៊ុតទា ក្នុងខេត្តសៀមរាប បានធ្លាក់ថ្លៃពីតម្លៃមធ្យម៤០០រៀល មកនៅចន្លោះ៣៨០រៀល និង៣៦០រៀល តែការធ្លាក់ថ្លៃនេះ ត្រូវបានកសិករបញ្ជាក់ថា តែងតែកើតមាននៅចុងឆ្នាំ ហើយពួកគាតរំពឹងថានឹងឡើងថ្លៃមកវិញនៅដើមឆ្នាំ២០២១ នេះបើតាមការលើកឡើងប្រហាក់ប្រហែលគ្នារបស់កសិករ ក្នុងខេត្តសៀមរាបកាលពិថ្ងៃទី២៥ ខែធ្នូ ឆ្នាំ២០២០។
តាមការពិនិត្យជាក់ស្តែងឆ្នាំនេះ លោក ប៉ែន ប៊ុនធឿន អនុប្រធានមន្ទីរកសិកម្មរុក្ខាប្រមាញ់និងនេសាទខេត្ត បង្ហាញថាការចិញ្ចឹមទាយកស៊ុត អំឡុងវិបត្តិជំងឺកូវីដ-១៩ នៅតាមបណ្ដាស្រុកមានកើនឡើង ដែលធ្វើឲ្យបរិមាណផ្គត់ផ្គង់មានការកើនឡើង ខណៈការប្រមូលផលសាច់សត្វត្រីជាដើម បាននិងកំពុងធ្វើឡើងនៅដំណាច់ឆ្នាំនេះផងដែរ។
បើតាមរបាយការណ៍ របស់មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប កសិករចិញ្ចឹមទាយកស៊ុតក្នុងខេត្តសៀមរាប មានចំនួនជាង៤៨ម៉ឹនក្បាល ដែលផលិតស៊ុតបានមួយថ្ងៃជិត៣៤ម៉ឹនគ្រាប់(៣៣៧០០០) ធៀបនឹងឆ្នាំមុនមានតែជាង២៨ម៉ឹនគ្រាប់ កើនឡើងជាង១២ម៉ឹនគ្រាប់។ ទោះបី ក្នុងវិបត្តិជំងឺកូវីដ-១៩ តម្រូវការស៊ុតមាន់និងទានៅលើទីផ្សារមានការកើនឡើង លើសឆ្នាំមុនជាង១០ម៉ឹនគ្រាប់ ពោលគឺចំនួនសរុបប្រមាណ ៣០ម៉ឹនគ្រាប់។
អត្ថបទ និងរូបភាព ៖ លោក យូ វង្ស
កែសម្រួលដោយ៖ លោក សេង ផល្លី
