លោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានច្រានចោលចំពោះការចុះផ្សាយរបស់សារព័ត៌មានខ្មែរថែម៍ ដែលថា មានករណីបុរសម្នាក់មកពីប្រទេសថៃផ្ទុកជំងឺកូវីដ-១៩ ហើយគេចមិនធ្វើចត្តាឡីស័ក បង្កឱ្យមានការព្រួយបារម្ភពីការចម្លងរបស់មេរោគដ៏កាចសាហាវនេះនោះទេ។
លោកជំទាវ ឱ វណ្ណឌីន បញ្ជាក់ថាបុរស អាយុ២៦ឆ្នាំ មកពីប្រទេសថៃ បានចូលមកដល់ ភូមិសាមគ្គី ឃុំព្រែកដំបង ស្រុកមុខកំពូល ខេត្តកណ្តាល នៅពេលយប់ថ្ងៃទី២៣ ខែធ្នូ ឆ្នាំ២០២០។
លោកជំទាវបានបញ្ជាក់ទៀតថា ក្រោយទទួលបានព័ត៌មាន មន្រ្តីសុខាភិបាល និងអាជ្ញាធរមូលដ្ឋានស្រុកបានចុះទៅពិនិត្យអប់រំណែនាំពីវិធានការ និងតម្រូវឱ្យគាត់ធ្វើចត្តាឡីស័កនៅផ្ទះ ដែលមានម្តាយ និងប្អូនស្រី១នាក់ ហើយមានសមត្ថកិច្ចនៅតាមដានប្រចាំការ។
លោកជំទាវ បានបញ្ជាក់បន្ថែមទៀតថា៖ នៅថ្ងៃទី២៥ ខែធ្នូ ឆ្នាំ២០២០ គាត់ត្រូវបានយកសំណាក ហើយលទ្ធផលពីវិទ្យាស្ថានប៉ាស្ទ័រកម្ពុជា គឺអវិជ្ជមាននៅល្ងាចថ្ងៃដដែល និងបន្តតាមដានសុខភាពជូនគាត់ ។ ១៣ថ្ងៃក្រោយ គាត់នឹងត្រូវយកសំណាកធ្វើ តេស្តលើកទី២ ម្តងទៀត៕
អត្ថបទ៖ វិទ្យុជាតិកម្ពុជា
