សម្រាប់ឆ្នាំ២០២០នេះ ករណីគ្រោះថ្នាក់ចរាចរណ៍ក្នុងខេត្តសៀមរាប មានការថយចុះជិត៣០ភាគរយ ប៉ុន្តែចំនួនអ្នកស្លាប់ មានការកើនឡើង បើធៀបទៅនឹងរយៈពេលដូចគ្នានៅឆ្នាំ២០១៩ នេះបើតាមរបាយការណ៍សកម្មភាពការងាររបស់អនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប ប្រចាំឆ្នាំ២០២០ ផ្ដល់ដោយមន្ទីរសាធារណៈការនិងដឹកជញ្ជូនខេត្តសៀមរាប នៅថ្ងៃទី២៩ ខែធ្នូ ឆ្នាំ២០២០នេះ។
របាយការណ៍នេះ បង្ហាញថា នៅឆ្នាំ២០២០ ករណីគ្រោះថ្នាក់ចរាចរណ៍សរុបមានចំនួន៧១ករណី ថយចុះ២៨ករណី បើធៀបនឹងឆ្នាំ២០១៩ មាន៩៩ករណី។ រីឯចំនួនអ្នកស្លាប់ ដោយគ្រោះថ្នាក់ចរាចរណ៍ មានចំនួនសរុប ៨៦នាក់ មានការកើនឡើង៥នាក់ បើធៀបនឹងឆ្នាំ២០១៩ មានតែ៨១នាក់ប៉ុណ្ណោះ។
លោក គី វីរិន្ទ ប្រធានមន្ទីរសាធារណៈការ និងដឹកជញ្ជូនខេត្ត និងជាប្រធានលេខាធិការដ្ឋាន នៃអនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប បញ្ជាក់ថា ករណីគ្រោះថ្នាក់ភាគច្រើនបណ្ដាលមកពី ការបើកបរលើសល្បឿនកំណត់ វ៉ាជែងក្នុងស្ថានភាពគ្រោះថ្នាក់ បើកបរក្នុងស្ថានភាពងងុយគេង ឬស្រវឹង។ល។
តាមរបាយការណ៍ដដែលនេះ បង្ហាញដែរថា ការផាកពិន័យម៉ូតូ មានចំនួនសរុបជាង ១៨,០០០គ្រឿង ភាគច្រើនជាអ្នកបើកបរមិនពាក់មួកសុវត្ថិភាព។ ដោយឡែក ការផាកពិន័យរថយន្ត មានចំនួនសរុបជិត ១០,០០០គ្រឿង ភាគច្រើនជាអ្នកបើកបររថយន្ត បើកលើសល្បឿនកំណត់ និងមិនពាក់ខ្សែក្រវាត់សុវត្ថិភាព។
លោក ប្រធានមន្ទីរសាធារណៈការ និងដឹកជញ្ជូនខេត្ត ក៏បានបង្ហាញពីទិសដៅបន្ត របស់អនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប សម្រាប់ឆ្នាំ២០២១ខាងមុខ ដោយបន្តសកម្មភាព អប់រំផ្សព្វផ្សាយពីច្បាប់ និងសុវត្ថិភាពចរាចរណ៍ នៅតាមបណ្ដាក្រុង-ស្រុក ព្រមទាំងសិស្សានុសិស្សនៅតាមវិទ្យាល័យ តាមរូបភាពជាច្រើនទៀត ក្នុងនោះមន្រ្តីត្រូវតែអនុវត្តន៍ជាគម្រូ ។ បន្ថែមពីនេះ ក្រុមការងារនឹងនៅតែបន្ត ត្រួតពិនិត្យលក្ខណៈបច្ចេកទេសយានយន្តខុសលក្ខណៈបច្ចេកទេស លើរថយន្តនានា រួមទាំងរថយន្តដឹកដីខ្សាច់ ដែលតែងតែបង្កផលប៉ះពាល់ដល់សុខភាព បរិស្ថាន និងគ្រោះថ្នាក់ចរាចរណ៍។
អត្ថបទ និងរូបភាព ៖ លោក យូ វង្ស
កែសម្រួលដោយ៖ លោក សេង ផល្លី
