សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា នៅក្នុងសេចក្តីថ្លែងសារពិសេសទៅកាន់ជនរួមជាតិ នាព្រឹកថ្ងៃទី២៩ ខែធ្នូ ឆ្នាំ២០២០នេះ ស្តីពីការប្រកាសបិទបញ្ចប់ព្រឹត្តិការណ៍សហគមន៍២៨វិច្ឆិកា ដោយបង្ហាញនូវការសម្រេចចិត្ត អនុញ្ញាតឲ្យក្រសួងអប់រំយុវជន និងកីឡា រៀបចំបើកបវេសនកាលឆ្នាំសិក្សាថ្មី ២០២០-២០២១ នាថ្ងៃទី១១ ខែមករា ឆ្នាំ២០២១ខាងមុខនេះ។
សម្តេចតេជោ ក៏បានបង្ហាញឲ្យដឹងផងដែរ អំពីមូលហេតុចម្បងៗ នៃការប្រកាសបិទបញ្ចប់ព្រឹត្តិការណ៍សហគមន៍២៨វិច្ឆិកា ដោយភ្ជាប់ជាមួយនឹងការសម្រេចឲ្យមានការបើកបវេសនកាលឆ្នាំសិក្សាថ្មីនោះថា កម្ពុជាអាចគ្រប់គ្រងបានការរីករាលដាលនៃវារុសកូវីដ-១៩។ ក្នុងរយៈពេល១៤ថ្ងៃចុងក្រោយនេះ គិតត្រឹមថ្ងៃទី២៨ខែធ្នូ គ្រូពេទ្យជំនាញពុំមានរកឃើញវិជ្ជមានវារុសកូវីដ១៩នៅលើសំណាកដែលសង្ស័យណាមួយនោះឡើយ ហើយការគ្រប់គ្រងពលករចំណូលស្រុកមកពីប្រទេសថៃ ទាំងការធ្វើចត្តាឡីស័ក នឹងលទ្ធផលតេស្តសំណាក អាចបញ្ចាក់បានថា ពុំមានករណីនាំចូលក្នុងសហគមន៍នោះទេ។
សម្តេចនៅបានរំលឹកដែរថា ការបិទបញ្ចប់ព្រឹត្តិការណ៍សហគមន៍២៨វិច្ឆិកា វាមិនមែនជាការបិទបញ្ចប់ការប្រុងប្រយ័ត្ននោះទេ តែត្រូវបន្តអនុវត្តវិធានការសុវត្ថិភាព ៣ការពារ រួមមាន ពាក់ម៉ាស់, លាងដៃ, រក្សាគម្លាតសុវត្ថិភាពសង្គម និងគម្លាតសុវត្ថិភាពបុគ្គល ដោយប្រើជម្រើសស្តង់ដារ ចាប់ពី១ម៉ែត្រកន្លះឡើងទៅឲ្យបានគ្រប់គ្នា និងនៅគ្រប់ទីកន្លែង។ នៅតាមកន្លែងលក់ដូរ ភោជនីយដ្ឋាន អាហារដ្ឋាន ផ្សារទំនើប និងធនាគារ ត្រូវមានការត្រួតពិនិត្យ បើមិនពាក់ម៉ាស់គឺមិនឱ្យចូល ហើយត្រូវវ៉ាស់កម្តៅ និងរៀបចំកន្លែងអង្គុយរក្សាគម្លាត តាមបន្ទប់ទឹកត្រូវមានសាប៊ូលាងដៃ ជាដើម។ល។
យ៉ាងណាក៏ដោយ សម្តេចតេជោ បានរំលឹកឲ្យអាជ្ញាធរនិងសមត្ថកិច្ចពាក់ព័ន្ធ ឲ្យតាមដានពិនិត្យបញ្ហានេះតាមគោលដៅខាងលើ បើមិនអនុវត្តន៍តាមគោលការណ៍៣កុំនេះទេ ត្រូវបិទទ្វារជាបណ្តោះអាសន្ន។
ការអនុវត្តវិធានការ ៣កុំ ក៏ត្រូវបានសម្តេចតេជោរំលឹកឡើងវិញផងដែរ ដូចជា កុំចូលទៅកន្លែងបិទជិតគ្មានខ្យល់ចេញចូល កុំចូលទៅក្នុងកន្លែងប្រើម៉ាស៊ីនត្រជាក់ច្រើនពេក កុំទៅកន្លែងមនុស្សច្រើនកុះករ កុំប៉ះពាល់ចាប់ដៃគ្នា កុំកៀកស្មាគ្នា កុំឱបគ្នា អ្នកមានជម្ងឺផ្តាសាយ ឬសង្ស័យមានវារុសកូវីដ-១៩ កុំចេញក្រៅ ហើយត្រូវទាក់ទងទៅគ្រូពេទ្យជំនាញជាបន្ទាន់។
ជាការលើកបង្ហាញបន្ថែមជាថ្មីម្តងទៀត សម្តេចបានចេញបទបញ្ចាឲ្យក្រសួងសេដ្ឋកិច្ចនិងហិរញ្ញវត្ថុ ត្រៀមការឆ្លើយតបទៅនឹងទំហំការងារប្រយុទ្ធប្រឆាំងកូវីដ-១៩ ដែលក្នុងនោះ សម្រាប់វិស័យអប់រំ គឺត្រៀមផ្តល់ជូននូវដំណោះស្រាយឧបករណ៍សម្ភារការពារសុវត្ថិភាព សម្រាប់សិស្សនិងគ្រូបង្រៀន។ ដោយឡែក នៅលើសមរភូមិជួរមុខកូវីដ-១៩ សម្រាប់ឆ្នាំ២០២១ ក្របខណ្ឌគ្រូពេទ្យចំនួន៣,០០០នាក់ ត្រូវបានផ្តល់ជូនក្រសួងសុខាភិបាល ដើម្បីដាក់ពង្រាយតាមគោលដៅមូលដ្ឋានសហគមន៍ ហើយបើសិនជាមិនគ្រប់គ្រាន់ទេនោះ នឹងត្រូវបន្ថែមទៀត ប៉ុន្តែត្រូវប្រាកដថា ជាគ្រូពេទ្យស្របតាមលក្ខខណ្ឌតម្រូវ សម្រាប់ការប្រយទ្ធក្នុងសមរភូមិកូវីដ-១៩៕
អត្ថបទ ៖ លោក ងិន គឹមឡេង
រូបភាព ៖ facebook (Samdech Hun Sen, Cambodian Prime Minister)
