ឯកឧត្តម ទៀ សីហា អភិបាលខេត្តសៀមរាប បានសម្រេចអនុញ្ញាតឲ្យអាជីវករក្នុងតំបន់ផាប់ស្ទ្រីត និងតំបន់អង្គរ-ឃ្យុងយូ លក់ដូរជាធម្មតា នៅថ្ងៃឆ្លងឆ្នាំសកលខាងមុខនេះ ប៉ុន្តែត្រូវរឹតបន្តឹងវិធានការការពារជំងឺកូវីដ-១៩នៅតាមកន្លែងនីមួយៗ ព្រមទាំងមានការត្រួតពិនិត្យពីមន្ត្រីជំនាញ។
នេះបើតាមប្រសាសន៍ លោក ពៅ ពិសិដ្ឋ អភិបាលរងខេត្ត និងជាប្រធានគណកម្មការប្រយុទ្ធប្រឆាំង ទប់ស្កាត់ជំងឺកូវីដ-១៩ ក្នុងវិស័យទេសចរណ៍ ខេត្តសៀមរាប ក្នុងជំនួបផ្សព្វផ្សាយបន្ទាន់មួយ ជាមួយក្រុមអាជីវករលក់ដូរ ក្នុងតំបន់អង្គរ-ឃ្យុងយូ ក្រុងសៀមរាប ប្រមាណាជាង៣០០នាក់ នារសៀលថ្ងៃទី២៩ ខែធ្នូ ឆ្នាំ២០២០។
ស្របតាមសេចក្ដីថ្លែងសារពិសេស នៃការបិទបញ្ចប់ព្រឹត្តិការណ៍សហគមន៍២៨វិច្ឆិកា របស់សម្ដេចតេជោ ហ៊ុន សែន នៅព្រឹកថ្ងៃទី២៩ ខែធ្នូ ឆ្នាំ២០២០ សម្តេចនៅតែយកចិត្តទុកដាក់ខ្ពស់ ក្នុងការប្រយុទ្ធប្រឆាំងជំងឺកូវីដ-១៩ ជាពិសេសមុនថ្ងៃបុណ្យឆ្លងឆ្នាំសាកល ២០២០-២០២១ ត្រូវតែបន្តអនុវត្តន៍ឲ្យបានហ្មត់ចត់ នូវវិធានសុវត្ថិភាព ៣ការពារ រួមមាន៖ ពាក់ម៉ាសការពារ លាងសម្អាតដៃ និងរក្សាគម្លាតសុវត្ថិភាពសង្គម។ លើសពីនេះ ការអនុវត្ត ៣កុំ រួមមាន កុំទៅកន្លែងប្រមូលផ្ដុំមានមនុស្សច្រើន កុំទៅកន្លែងបិទជិតប្រើប្រាស់ម៉ាស៊ីនត្រជាក់ និងកុំស្និទ្ធស្នាល អោប រឺចាប់ដៃជាដើម និងបន្ថែមពីលើសនោះ ត្រូវអនុវត្តន៍ការធ្វើចត្តាឡីស័កឱ្យបានត្រឹមត្រូវ។
នៅក្នុងជំនួបផ្សព្វផ្សាយដល់អាជីវករនេះដែរ អាជ្ញាធរខេត្ត បានដាក់ចេញនូវវិធានការយ៉ាងម៉ឺងម៉ាត់ ក្នុងការត្រួតពិនិត្យ-ការបាញ់កម្តៅ ការពាក់ម៉ាស់គ្រប់បណ្តាច្រកចេញចូលទាំង៦កន្លែង ជុំវិញទីតាំងលក់ដូរពេលរាត្រីអង្គរ-ឃ្យុងយូ ដោយមានក្រុមការងារជំនាញ សហការជាមួយកម្លាំងសមត្ថកិច្ចផងដែរ។
អាជ្ញាធរខេត្ត ក៏បានណែនាំ ដល់គ្រប់បណ្តាទីតាំងអាជីវកម្ម ត្រូវតែមានឧបករណ៍-សម្ភារការពារសុវត្ថិភាព រក្សាគម្លាតសុវត្ថិភាពបុគ្គល ចាប់ពី១ម៉ែត្រកន្លះឡើងទៅ និងត្រូវរួមគ្នាធានាបានថា តំបន់អង្គរ-ឃ្យុងយូ នៅថ្ងៃបុណ្យឆ្លងឆ្នាំសាកល ជាទីតាំងមានសុវត្ថិភាព។ ករណីអាជីវករមិនអនុវត្តន៍តាមសេចក្ដីណែនាំរបស់អាជ្ញាធរខេត្ត អាជ្ញាធរមានសមត្ថកិច្ច នឹងធ្វើការផ្អាកដំណើរអាជីវកម្មនោះជាបណ្តោះអាសន្ន៕
អត្ថបទ និងរូបភាព៖ លោក ងិន គឹមឡេង និងលោក ខេង ឧត្តម
កែសម្រួលដោយ៖ លោក សេង ផល្លី
