ឆ្នាំ២០២០នេះ ចំនួនរថយន្ត ចូលត្រួតពិនិត្យលក្ខណៈបច្ចេកទេសក្នុងខេត្តសៀមរាប ឬហៅថា ឆៀក មានចំនួនសរុប ២៨,០៦០គ្រឿង កើនឡើងជិត១៨ភាគរយ បើធៀបនឹងឆ្នាំ២០១៩ ដែលមានចំនួនសរុប ២៣,៨១៣គ្រឿង នេះបើតាមរបាយការណ៍របស់មន្ទីរសាធារណការ និងដឹកជញ្ជូនខេត្តសៀមរាប។
លោក ឈិត ពិសី ប្រធានសាខាត្រួតពិនិត្យ លក្ខណៈបច្ចេកទេសយានយន្ត ខេត្តសៀមរាប នៅថ្ងៃទី៣០ ខែធ្នូ ឆ្នាំ២០២០នេះ លើកឡើងថា ការកើនឡើងនេះ បានបង្ហាញពីការយល់ដឹង ពីច្បាប់ចរាចរណ៍របស់ប្រជាពលរដ្ឋ ព្រមទាំងសុវត្ថិភាពយានយន្តរបស់ខ្លួននៅពេលធ្វើដំណើរផងដែរ។
លោក បញ្ជាក់ថា ជាទូទៅការត្រួតពិនិត្យលក្ខណៈបច្ចេកទេសលើយានយន្ត មានដូចជា ទ្វារ សំបកកង់ ខ្ចៅ រនាំងសុវត្ថិភាព ចំពោះរថយន្តធំ និងពិនិត្យទៅលើប្រព័ន្ឋចង្កៀងភ្លើងបំភ្លឺផ្នែកមុខ និងខាងក្រោយ ប្រព័ន្ឋហ្វ្រាំង នាឡិកាស្ទង់ល្បឿន និងស្លាកលេខជាដើម។
ព័ត៌មានជាតិ ថ្មីៗ
ដោយឡែក ចំពោះយានយន្ដកែច្នៃខុសលក្ខណៈបច្ចេកទេស តាមរបាយការណ៍របស់មន្ទីរសាធារណការ និងដឹកជញ្ជូនខេត្ត បង្ហាញថា ក្រុមការងារមន្ទីរ ចុះត្រួតពិនិត្យមានចំនួនសរុបជាង ៥,០០០គ្រឿង ក្នុងនោះយានយន្ដខុសលក្ខណៈបច្ចេកទេសមានចំនួនសរុបជាង ៤០០គ្រឿង។
អត្ថបទ និងរូបភាព៖ លោក យូ វង្ស
កែសម្រួលដោយ៖ លោក សេង ផល្លី
