នៅព្រឹកថ្ងៃទី៣១ ខែធ្នូ ឆ្នាំ២០២០ លោក នាក់ ណេរ៉ុន អភិបាលរងខេត្ដសៀមរាប និងជាប្រធានក្រុមការងារត្រួតពិនិត្យ តាមដានការអនុវត្តវិធានសុវត្ថិភាពទេសចរណ៍ សម្រាប់មូលដ្ឋានអាជីវកម្ម ក្នុងខេត្តសៀមរាប តំបន់ផាប់ស្រ្ទីត បានដឹកនាំក្រុមការងារចុះផ្សព្វផ្សាយពីវិធានសុវត្ថិភាពការពារ ទប់ស្កាត់ការរីករាលដាលជំងឺកូវីដ-១៩ ក្នុងឱកាសពិធីបុណ្យឆ្លងឆ្នាំសកល២០២០-២០២១ ដល់អាជីវករ ភ្នាក់ងារផ្ដល់សេវាទេសចរណ៍នានា ក្នុងតំបន់ផាប់ស្រ្ទីត សរុបជាង១០០នាក់។
លោកអភិបាលរងខេត្ដ បង្ហាញថា អាជ្ញាធរខេត្ត នឹងរៀបចំក្រុមការងារត្រួតពិនិត្យវិធានសុវត្ថិភាព នៅតាមច្រកនីមួយៗ ក្នុងតំបន់ផាប់ស្ទ្រីត ក្នុងនោះម្ចាស់ទីតាំងអាជីវកម្មទាំងអស់ ត្រូវតែមានឧបករណ៍-សម្ភារការពារសុវត្ថិភាព រក្សាគម្លាតសុវត្ថិភាពបុគ្គល ចាប់ពី១ម៉ែត្រកន្លះឡើងទៅ និងត្រូវរួមគ្នាធានាបានថា នៅថ្ងៃបុណ្យឆ្លងឆ្នាំសកល តំបន់នេះជាទីតាំងមានសុវត្ថិភាព។ ករណីម្ចាស់អាជីវកម្ម មិនអនុវត្តន៍តាមសេចក្ដីណែនាំរបស់អាជ្ញាធរខេត្ត កម្លាំងមានសមត្ថកិច្ច នឹងផ្អាកដំណើរអាជីវកម្មនោះជាបណ្តោះអាសន្ន។
គួររំលឹកថា ទោះបីព្រឹត្តិការណ៍សហគមន៍២៨វិច្ឆិកា ត្រូវបានសម្ដេចតេជោ ហ៊ុន សែន ប្រកាសបិទបញ្ចប់ កាលពីថ្ងៃទី២៩ ខែធ្នូកន្លងទៅក្ដី ប៉ុន្តែសម្តេចនៅតែយកចិត្តទុកដាក់ខ្ពស់ ក្នុងការប្រយុទ្ធប្រឆាំងជំងឺកូវីដ-១៩ និងត្រូវតែបន្តអនុវត្តន៍ឲ្យបានហ្មត់ចត់ នូវវិធានសុវត្ថិភាព ៣ការពារ រួមមាន៖ ពាក់ម៉ាសការពារ លាងសម្អាតដៃ និងរក្សាគម្លាតសុវត្ថិភាពសង្គម។ លើសពីនេះ ការអនុវត្ត ៣កុំ រួមមាន កុំទៅកន្លែងប្រមូលផ្ដុំមានមនុស្សច្រើន កុំទៅកន្លែងបិទជិតប្រើប្រាស់ម៉ាស៊ីនត្រជាក់ និងកុំស្និទ្ធស្នាល អោប រឺចាប់ដៃជាដើម និងបន្ថែមពីលើសនោះ ត្រូវអនុវត្តន៍ការធ្វើចត្តាឡីស័កឱ្យបានត្រឹមត្រូវ។
ព័ត៌មានជាតិ ថ្មីៗ
អត្ថបទ និងរូបភាព៖ លោក ស៊ាន សុផាត
កែសម្រួលដោយ៖ លោក សេង ផល្លី
