ការប្រកួតកីឡាប្រណាំងកង់ជ្រើសរើសជើងឯកថ្នាក់ជាតិ និងទិវារត់ប្រណាំងពាក់កណ្តាលម៉ារ៉ាតុងអន្តរជាតិអង្គរ គ្រោងនឹងរៀបចំឡើងវិញ នាថ្ងៃទី២៣ និងថ្ងៃទី២៤ ខែមករា ឆ្នាំ២០២១នេះ បន្ទាប់ពីត្រូវបានលើកពេលជាច្រើនលើក ដោយសារវិបត្តិជំងឺកូវីដ-១៩ កាលពីចុងឆ្នាំ២០២០។
លោក នូ ចំរើន អគ្គលេខាធិការ សហព័ន្ធខ្មែរកីឡាទោចក្រយាន បញ្ជាក់នៅថ្ងៃទី០៤ ខែមករា ឆ្នាំ២០២០នេះថា ការប្រកួតកីឡាប្រណាំងកង់ជ្រើសរើសជើងឯកថ្នាក់ជាតិ ប្រចាំឆ្នាំ២០២០ គ្រោងនឹងរៀបចំឡើងវិញ នាថ្ងៃទី២៣ ខែមករា ឆ្នាំ២០២១ នៅខេត្តសៀមរាប មុនមួយថ្ងៃ នៃទិវារត់ប្រណាំងអន្តរជាតិ ពាក់កណ្តាលម៉ារ៉ាតុងអង្គរ ខួបលើកទី២៥ឆ្នាំ នៅមុខប្រាសាទអង្គរវត្ត ខេត្តសៀមរាប ដែលជាទិវាកីឡាទេសចរណ៍ដ៏ធំប្រចាំឆ្នាំ របស់កម្ពុជា និងទាក់ទាញបានកីឡាករ កីឡាការិនីជាតិ និងអន្តរជាតិជាង១ម៉ឺននាក់មកចូលរួម កាលពីខែធ្នូ ឆ្នាំ២០១៩កន្លងទៅ។ ទិវារត់ប្រណាំងអន្តរជាតិនេះដែរ បានទទួលថវិកាជាង ១០ម៉ឺនដុល្លារអាមេរិក ពីសប្បុសជន ដើម្បីបរិច្ចាគជួយដល់មន្ទីរពេទ្យ អង្គការសង្គមនានា។
ទោះបីជាទិវារត់ប្រណាំងពាក់កណ្តាលម៉ារ៉ាតុង នៅក្នុងតំបន់រមណីដ្ឋានអង្គរ នឹងរៀបចំឡើងវិញ នាចុងខែមករា ឆ្នាំ២០២១នេះក្ដី ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា បានបញ្ជាក់ថា ទិវានេះ ពុំអាចទទួលកីឡាករ-កីឡាការិនីមកពីក្រៅប្រទេស ចូលរួមបាននោះទេ។ ដោយឡែក កីឡាករ-កីឡាការិនី ជាតិ និងអន្តរជាតិ ក្នុងស្រុក ត្រូវបានអនុញ្ញាត ប៉ុន្តែវិធានសុវត្ថិភាពសុខាភិបាល ដើម្បីការពារពីការរីករាលដាលនៃជំងឺកូវីដ-១៩ នៅតែត្រូវបានអនុវត្តន៍យ៉ាងខ្ជាប់ខ្ជួន៕
អត្ថបទ៖ ទីភ្នាក់ងារសារព័ត៌មានកម្ពុជា
រូបភាព៖ ដោយមន្ទីរព័ត៌មានខេត្តសៀមរមាប
សម្រួលអត្ថបទ៖ សេង ផល្លី
