នៅសណ្ឋាគារស៊ីធី-អង្គរ ក្រុងសៀមរាប នាព្រឹកថ្ងៃទី០៥ ខែមករា ឆ្នាំ២០២១ ឯកឧត្តមអ្នកឧកញ៉ា សៀង ណាំ អ្នកតំណាងរាស្រ្តមណ្ឌលសៀមរាប ក្នុងនាមប្រធានក្រុមសម្ព័ន្ធមេត្រីភាព បាននាំយកថវិកា ៦,៤០០ដុល្លារអាមេរិកឧបត្ថម្ភដល់អង្គភាពវរសេនាតូចព្រំដែនលេខ១ ចំណុះតំបន់ប្រតិបត្តិការសឹករងសៀមរាប ដែលបច្ចុប្បន្ននេះ មានទីតាំងឈរជើងនៅក្នុងភូមិត្រពាំងក្រសាំង ឃុំស្រែណូយ ស្រុកវ៉ារិន ខេត្តសៀមរាប។
ឧត្តមសេនីយទោ ស៊ិន ភាត់ មេបញ្ជាការតំបន់ប្រតិបត្តិការសឹករងសៀមរាប បានរំលឹកថា ក្រុមចងសម្ព័ន្ធមេត្រីភាព រវាងស្ថាប័នស៊ីវិលសមរភូមិក្រោយ ជាមួយបណ្តាអង្គភាពប្រដាប់អាវុធនៅសមរភូមិមុខ ត្រូវបានបង្កើតឡើងក្រោមអនុសាសន៍ដ៏ខ្ពង់ខ្ពស់នៃសម្តេចតេជោ ហ៊ុន សែន ប្រមុខនៃរាជរដ្ឋាភិបាលកម្ពុជាកាលពី១២ឆ្នាំមុន ដែលកងទ័ពកម្ពុជាកំពុងស្ថិតក្នុងសមរភូមិការពារបូរណភាពដែនដី កសាងព្រំដែនសន្តិភាព កិច្ចសហប្រតិបត្តិការ និងការអភិវឌ្ឍ។ មកដល់បច្ចុប្បន្ននេះ ក្រុមសម្ព័ន្ធមេត្រីភាពទូទាំងប្រទេស បាននិងកំពុងបំពេញកាត្វកិច្ចរបស់ខ្លួន រួមចំណែកជួយឧបត្ថម្ភដល់ការអភិវឌ្ឍអង្គភាពដៃគូរបស់ខ្លួន។ ជាក់ស្តែង តាមរយៈក្រុមចងសម្ព័ន្ធមេត្រីភាព ដែលដឹកនាំដោយឯកឧត្តមតំណាងរាស្រ្ត សៀងណាំ អង្គភាពវរសេនាតូចព្រំដែនលេខ១ មកដល់ពេលនេះ កសាងបានទីតាំងបញ្ជាការដ្ឋានរឹងមាំមួយកន្លែង នៅចំណុចភូមិសាស្រ្តអូរកូនតឹង នៃស្រុកវ៉ារិន។
ថវិកាឧបត្ថម្ភនេះ បានមកពីការចូលរួម នៃសមាជិករបស់ក្រុមសម្ព័ន្ធមេត្រីភាព រួមមានមន្រ្តីរាជការ ពាណិជ្ជករនិងមួយផ្នែកទៀតជាអាជីវករក្នុងក្រុងសៀមរាប។ ថវិកាឧបត្ថមនាពេលនេះដែរ គ្រោងនឹងប្រើប្រាស់ដើម្បីសាងសង់ផ្ទះបាយថ្មីមួយខ្នង សម្រាប់លើកកម្ពស់អនាម័យ និងសុខភាពជូនដល់កម្លាំងកងទ័ព។
ឯកឧត្តមអ្នកឧកញ៉ា សៀង ណាំ លើកឡើងថា បើទោះបីវិបត្តិជំងឺកូវីដ-១៩ នៅបន្តគម្រាមកំហែងដល់បណ្ដាប្រទេសលើពិភពលោក ប៉ុន្តែក្នុងនាមជាក្រុមសម្ព័ន្ធមេត្រីភាព រវាងសមរភូមិមុខ និងសមរភូមិក្រោយនៅតែពុំអាចកាត់ផ្ដាច់បានឡើយ។ ទន្ទឹមនេះ ការបង្កើតភាពស្និទ្ធស្នាល លើកទឹកចិត្ដ និងធ្វើឱ្យកងកម្លាំងមានភាពជឿជាក់ និងកក់ក្ដៅ ក្នុងការរួមចំណែកការពារ ជាតិ សាសនា ព្រះមហាក្សត្រ ជាពិសេស គឺការពារបូរណភាពទឹកដី និងរដ្ឋធម្មនុញ្ញ ដែលជាច្បាប់កំពូលរបស់ជាតិ។
អត្ថបទ និងរូបភាព៖ លោក ងិន គឹមឡេង និងលោក ទ្រា ពន្លឺ
កែសម្រួលអត្ថបទ៖ លោក សេង ផល្លី
