បន្ទាប់ពីបាត់បង់ភ្ញៀវទេសចរអន្តរជាតិ អំឡុងវិបត្តិជំងឺកូវីដ-១៩ ប្រជាពលរដ្ឋក្នុងស្រុកបន្ទាយស្រី ខេត្តសៀមរាប បានបាត់បង់ប្រាក់ចំណូលស្ទើរទាំងស្រុងពីវិស័យទេសចរណ៍ និងពឹងផ្អែកលើវិស័យកសិកម្មជាប្រភពចំណូលចម្បង។ តាមរយៈសក្ដានុពលទេសចរណ៍របស់ស្រុក រដ្ឋបាលស្រុកបន្ទាយស្រី បានលើកទឹកចិត្តដល់ប្រជាពលរដ្ឋ ប្រែក្លាយពីការ ដាំដុះបែបបុរាណ និងឧស្សាហកម្ម ទៅជាការដាំដុះបែបកសិទេសចរណ៍វិញ។
នៅថ្ងៃទី០៥ ខែមករា ឆ្នាំ២០២១ ក្នុងកម្មវិធីសន្ទនាមតិ របស់ទូរទស្សន៍ជាតិខេត្តសៀមរាប លោក ឃឹម ហ្វីណង់ អភិបាលស្រុកបន្ទាយស្រី លើកឡើងថា ដោយសារស្រុកបន្ទាយស្រី ស្ថិតក្នុងតំបន់ភ្នំ ទីនេះសំបូរទៅដោយ តំបន់រមណីដ្ឋានធម្មជាតិ និងប្រាសាទបុរាណជាច្រើន ដែលជាសក្ដានុពលទាក់ទាញភ្ញៀវទេសចរណ៍ជាតិ និងអន្តរជាតិ។ ដូច្នេះការដាំដុះ និងចិញ្ចឹមសត្វ សម្រាប់ភ្ញៀវទេសចរណ៍ នឹងផ្ដល់ឱកាសការងារ និងចំណូលកាន់តែច្រើនបន្ថែមទៀត ដល់ប្រជាពលរដ្ឋក្នុងមូលដ្ឋាននេះ។
លោកអភិបាលស្រុក បង្ហាញថា បច្ចុប្បន្នអាជ្ញាធរស្រុក បាននិងកំពុងតម្រង់ទិសដល់ប្រជាពលរដ្ឋ ឲ្យចាកចេញពីការដាំដុះបែបបុរាណ និងឧស្សាហកម្ម ទៅជាកសិទេសចរណ៍ ខណៈប្រជាពលរដ្ឋមួយចំនួន បានសាកល្បងដាំដំណាំ ទុរេន ល្មើ សាវម៉ៅ ឪឡឹកពូជ និងត្រសក់ផ្អែមជាដើម។ ក្នុងនោះ អាជ្ញាធរស្រុក ក៏បានស្វែងដៃគូពាក់ព័ន្ធ និងចងក្រងសហគមន៍ប្រាក់សន្សំ ដើម្បីជួយជា បច្ចេកទេស ពូជ ទុនផលិត រកទីផ្សារផងដែរ។ បន្ថែមពីនោះ អាជ្ញាធរស្រុក ក៏គ្រោងនឹងរៀបចំភូមិដ្ឋានមួយចំនួន ឲ្យក្លាយជាភូមិទេសចរណ៍ ដោយរំពឹងថា រយៈពេល ២ទៅ៣ឆ្នាំខាងមុខ ស្រុកបន្ទាយស្រី នឹងមានការផ្លាស់ប្ដូរមុខមាត់ថ្មី។
គួរជម្រាបថា ក្នុងអាណត្តិរបស់ លោក ឃឹម ហ្វីណង់ ជាអភិបាលស្រុកបន្ទាយស្រី លោកបានបញ្ជាក់ថា វិស័យទេសចរណ៍ គឺជាវិស័យអាទិភាពរបស់ស្រុក ដែលទាញស្រូបវិស័យដទៃទៀត ឲ្យគាំទ្រដល់វិស័យនេះ។ ជាមួយនោះ រដ្ឋបាលស្រុក បានត្រៀមខ្លួនរួចជាស្រេច ក្នុងការជួយសម្របសម្រួល និងគាំទ្រដល់អ្នកវិនិយោគទាំងអស់ ដែលមានបំណងចង់អភិវឌ្ឍ និងបង្កើតការងារក្នុងស្រុកបន្ទាយស្រី។
អត្ថបទ៖ លោក សេង ផល្លី
