អាជ្ញាធរជាតិអប្សរា សហការជាមួយសហការជាមួយស្ថាប័ន ចាសា (JASA) នៃប្រទេសជប៉ុន និងអង្គការយូណេស្កូ គ្រោងនឹងជួសជុលរួតទី៣ នៃប្រាសាទបាយ័ន នៅដើមឆ្នាំ២០២១នេះ ខណៈចំណុចមួយចំនួន នៃសំណង់ប្រាសាទអាចរលំ និងបង្កជាគ្រោះថ្នាក់ដល់ភ្ញៀវទេសចរ នេះបើតាមការឲ្យដឹងពី ឯកឧត្តម គឹម សុធិន អគ្គនាយករងអាជ្ញាធរជាតិអប្សរា នៅព្រឹកថ្ងៃទី០៦ ខែមករា ឆ្នាំ២០២១ ក្នុងពិធីបួងសួងសុំសេចក្ដីសុខ និងបើកការដ្ឋានលើប្រាសាទបាយ័ន។
តាមការបង្ហាញរបស់ ឯកឧត្តមអគ្គនាយករង៖ ដោយសារតែ កត្តាអាកាសធាតុ និងអាយុកាលនៃសំណង់ប្រាសាទទាំងមូល បានធ្វើឲ្យរចនាសម្ព័ន្ធនៃប្រាសាទ មានសភាពទ្រុឌទ្រោម និងក្រៀកចេញពីគ្នា ដែលទាមទារឲ្យមានការជួសជុលទាន់ពេលវេលា។
ចំពោះដំណើរការជួសជុលនាពេលខាងមុខ ឯកឧត្តម បញ្ជាក់ថា៖ ចំណុចដែលមានហានិភ័យ អាចដួលរលំថ្ម មាន៥៦ចំណុចផ្សេងៗគ្នា ដែលតម្រូវឲ្យអ្នកជំនាញ ធ្វើការរើថ្មចេញ និងរុញចូលទៅវិញនៅចំណុច ដែលអាចរលំនោះ។ ក្នុងនោះ ក៏នឹងមានការរៀបចំបិទភ្ជិត លើថ្នេរថ្ម ដែលបានប្រេះ កុំឲ្យជ្រាបទឹក ព្រមទាំងសម្រួល ថ្មរដិបរដុបមិនរាបស្មើ ចៀសវាងបង្កគ្រោះថ្នាក់ដល់ភ្ញៀវទេសចរ ពេលដើរទស្សនាផងដែរ។ កិច្ចការជួសជុលទាំងនេះ គ្រោងនឹងប្រើរយៈពេលមួយឆ្នាំ នោះបើពុំមានបញ្ហា ប៉ះពាល់ដល់ការរៀបចំគូសប្លង់សិក្សាស្រាវជ្រាវចងក្រង ឯកសារ និងឆ្លងយោបល់ពីអ្នកជំនាញការអាដហុកនោះទេ។
ព័ត៌មានជាតិ ថ្មីៗ
បើតាមការចុះផ្សាយ របស់អាជ្ញាធរជាតិអប្សរា ប្រាសាទបាយ័ន មានទីតាំងស្ថិតនៅចំកណ្តាល នៃរាជធានីអង្គរធំបុរាណ។ ប្រាសាទនេះកសាងនៅចុងសតវត្សរ៍ទី ១២ និងដើមសតវត្សរ៍ទី ១៣ ដោយព្រះបាទជ័យវរ្ម័នទី៧។ ប្រាសាទនេះមាន តួប៉មសរុប ៤៩កំពូល រួមនិងកំពូលក្លោងទ្វារច្រកចូលចំនួន ៥ទៀត សរុប ៥៤កំពូល ដែលសុទ្ធតែមានមុខបដិមាចំនួន៤បួន បែរទៅទិសផ្សេងគ្នា និងតំណាងឲ្យខេត្តក្រុងខ្មែរ ទាំង ៥៤ នាសម័យកាលនោះ។
អត្ថបទ និងរូបភាព៖ លោក បូ សាវី
កែសម្រួលអត្ថបទ៖ លោក សេង ផល្លី
