យ៉ាងយូរនៅដើមឆ្នាំ២០២៣ បណ្ដាញខ្សែទូរគមនាគមន៍លើអាកាសនៃផ្លូវសំខាន់ៗ ក្នុងក្រុងសៀមរាប នឹងត្រូវដាក់បង្កប់ក្រោមដីរួចរាល់ ដើម្បីលើកកម្ពស់សោភណ្ឌភាពក្រុងសៀមរាប នេះបើតាមការឲ្យដឹងពីលោក សុខ សីហា ប្រធានមន្ទីរប្រៃសណីយ៍ និងទូរគមនាគមន៍ ខេត្តសៀមរាប នៅថ្ងៃទី០៧ ខែមករា ឆ្នាំ២០២១។
លោក សុខ សីហា បញ្ជាក់ថា÷ កាលពីឆ្នាំ២០១៩ មន្ទីរ បានសហការជាមួយស្ថាប័នឯកជន រួមនិងអាជ្ញាធរពាក់ព័ន្ធ បានកាត់ទម្លាក់ខ្សែលើអាកាសលើផ្លូវសំខាន់ៗក្នុងក្រុងចំនួន១២ខ្សែ។ នៅឆ្នាំ២០២០ មន្ទីរមានគម្រោងកាត់ទម្លាក់ខ្សែលើអាកាសចំនួន១២ខ្សែបន្ថែមទៀត ប៉ុន្តែដោយសារវិបត្តិនៃជំងឺកូវីដ-១៩ ការងារនេះរាំងស្ទះ និងសម្រេចបានផ្លូវចំនួន ២ខ្សែប៉ុណ្ណោះ ស្មើនឹងប្រវែងជាង ៥គ.ម។
លោកប្រធានមន្ទីរ បញ្ជាក់បន្ថែមថា÷ បន្ទាប់ពីខេត្តសៀមរាប ទទួលបានគម្រោងអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់ ៣៨ខ្សែក្នុងក្រុង ផ្ដល់ដោយសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា មន្ទីរប្រៃសណីយ៍ និងទូរគមនាគមន៍ខេត្ត បាននិងកំពុង ពិនិត្យតាមដានដំណើរការសាងសង់ផ្លូវ ដើម្បីរៀបចំបំពង់បណ្ដាញទូរគមនាគមន៍ក្រោមដី ឲ្យស្របទៅនឹងដំណាក់កាលនៃការសាងសង់ផ្លូវទាំងអស់នោះ។
គួររំលឹកថា យុទ្ធនាការកាត់បណ្ដាញខ្សែទូរគមនាគមន៍លើអាកាស ក្នុងក្រុងសៀមរាបនេះ ត្រូវបានចាប់ផ្តើមអនុវត្តកាលពីថ្ងៃទី១៦ ខែសីហា ឆ្នាំ២០១៨ បន្ទាប់ពីរដ្ឋបាលខេត្តសៀមរាប បានចេញសេចក្តីជូនដំណឹង ចុះថ្ងៃទី១១ ខែឧសភា ឆ្នាំ២០១៨ ស្តីពីការរៀបចំសោភណ្ឌភាព សណ្តាប់ធ្នាប់ និងរបៀបរៀបរយសាធារណៈ បណ្តាញខ្សែលើអាកាសក្នុងក្រុងសៀមរាប ។
អត្ថបទ: យូ វង្ស
សម្រួលអត្ថបទ: សេង ផល្លី
