ក្នុងឆ្នាំ២០២០ យ៉ាងតិចមនុស្ស ៥នាក់ ត្រូវបានបញ្ជូនទៅសាលាដំបូងខេត្តសៀមរាប និង៦៥នាក់ទៀត បាននិងកំពុងស្រាវជ្រាវរកអត្តសញ្ញាណ ដើម្បីតាមចាប់ខ្លួន ពាក់ព័ន្ធនឹងករណីបទល្មើសជលផលក្នុងខេត្តសៀមរាប នេះបើតាម របាយការណ៍ប្រចាំឆ្នាំ២០២០ ផ្ដល់ខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប នៅថ្ងៃទី០៨ ខែមករា ឆ្នាំ២០២១។
របាយការណ៍ប្រចាំឆ្នាំនេះ បង្ហាញថា បទល្មើសជលផលទាំងនោះ ភាគច្រើនកើតមាននៅក្នុងភូមិសាស្ត្រ ឃុំអន្លង់សំណរ ស្រុកជីក្រែង ឃុំកំពង់ឃ្លាំង ស្រុកសូទ្រនិគម ឃុំកំពង់ភ្លុក ស្រុកប្រាសាទបាគង និងមួយចំនួនទៀត ស្ថិតក្នុងភូមិសាស្ត្រនៃបណ្ដាស្រុកជាប់បឹងទន្លេសាប ក្នុងខេត្តសៀមរាប ។
បទល្មើសដែលសមត្ថកិច្ចជំនាញបង្ក្រាបបាន មានចំនួនសរុប ៣០៧ករណី ថយចុះ ៣ករណី បើធៀបទៅនឹងឆ្នាំ២០១៩។ ករណីបទលើ្មសទាំងនោះ រួមមាន ការប្រើប្រាស់ឧបករណ៍នេសាទខុសច្បាប់ ការកាប់រានព្រៃលិចទឹក និង ជីកប្រឡាយក្នុងដែននេសាទ ។
ព័ត៌មានជាតិ ថ្មីៗ
ក្នុងនោះ ឧបករណ៍នេសាទខុសច្បាប់ភាគច្រើន ត្រូវសមត្ថកិច្ចជំនាញបំផ្លាញចោលនៅនឹងកន្លែង។ រីឯមធ្យោបាយប្រព្រឹត្តិបទល្មើស មានដូចជា កាណូត៣២គ្រឿង ទូកឈើ ២គ្រឿង គ្រឿងចក្រជីកដី ១គ្រឿង ព្រមទាំងឧបករណ៍នេសាទខុសច្បាប់មួយចំនួនទៀត ត្រូវបានសមត្ថកិច្ចជំនាញធ្វើការដកហូត ។
អត្ថបទ និងរូបភាព: យូ វង្ស
សម្រួលអត្ថបទ: សេង ផល្លី
