ការជួបប្រជុំគ្នានៃថ្នាក់ដឹកនាំខេត្តសៀមរាប បានបង្ហាញនូវសុទិដ្ឋិនិយមចំពោះការដឹកនាំរបស់ប្រមុខនៃរាជរដ្ឋាភិបាល ដោយរំពឹងទុកថា ហានីភ័យនៃវិបត្តិកូវីដ-១៩ វាមិនមែនជាឧបស័គ្គដែលមិនអាចពុះពារបាននោះទេ វាក៏ត្រូវបានក្លាយជាបទពិសោធន៍សម្រាប់ការអភិវឌ្ឍនាពេលអនាគត អាស្រ័យដោយភាពឈ្លាសវៃរបស់ថ្នាក់ដឹកនាំ និងការចូលរួមនៃប្រជាជាតិទាំងមូល។
ឯកឧត្តម អ៊ាន ឃុន ប្រធានស្តីទីក្រុមប្រឹក្សាខេត្តសៀមរាប បានលើកឡើងថា រយៈពេលពេញ១ឆ្នាំនៃឆ្នាំ២០២០កន្លងទៅ នៅក្រោមសម្ពាធនៃវិបត្តិកូវីដ-១៩ វាពិតជាបានបង្កើតឡើងនូវបញ្ហាប្រឈមមួយចំនួននៅក្នុងវិស័យសេវាកម្មនិងទេសចរណ៍ ក៏ប៉ុន្តែយ៉ាងណាក៏ដោយ ការជួបប្រទះនូវផលវិបាកទាំងនោះ វាគ្រាន់តែជាវិញ្ញាសារថ្មីដែលមិនមិនធ្លាប់មានពីមុនមកតែប៉ុណ្ណោះ ហើយវាក៏បានប្រែក្លាយជាបទពិសោធន៍ ក្នុងការបង្កើតឱកាស ប្រើប្រាស់វិធានការ ដើម្បីស្តារឡើងវិញ និងត្រៀមចូលក្នុងវិថីនៃការអភិវឌ្ឍ នាពេលអនាគត។
ការលើកឡើងយ៉ាងដូច្នេះ ដោយយោងតាមរបាយការណ៍ ស្តីពីការអនុវត្តការងាររបស់រដ្ឋបាលខេត្តសៀមរាបប្រចាំឆ្នាំ២០២០ ដែលបានបង្ហាញនៅក្នុងរបៀបវារៈនៃកិច្ចប្រជុំសាមញ្ញលើកទី២០ របស់ក្រុមប្រឹក្សាខេត្តអណត្តិទី៣ នាព្រឹកថ្ងៃទី០៨ ខែមករា ឆ្នាំ២០២១។ សមាជិក សមាជិកា នៃក្រុមប្រឹក្សាខេត្ត គណអភិបាលខេត្ត ប្រធាន អនុប្រធានមន្ទីរអង្គភាពជំនាញជុំវិញខេត្ត បានចូលរួមនៅក្នុងកិច្ចប្រជុំនេះ។
ថ្លែងក្នុងកិច្ចប្រជុំនោះ ឯកឧត្តម ទៀ សីហា អភិបាលខេត្តសៀមរាប គូសបញ្ជាក់ថា ៖ ការទប់ស្កាត់ការនាំចូលវារុសកូវីដ-១៩ពីខាងក្រៅ ប្រសិទ្ធភាពនៃការព្យាបាល រួមទាំងការរុញច្រានមិនឲ្យមានការចម្លងចូលក្នុងសហគមន៍ គឺជាជោគជ័យដ៏ធំក្នុងការគ្រប់គ្រងជម្ងឺកូវីដ-១៩។
ឯកឧត្តមអភិបាលខេត្ត បានបង្ហាញនូវការគាំទ្រយ៉ាងពេញទំហឹង ចំពោះចំណាត់ការដ៏ឈ្លាសវៃ នៃសម្តេចតេជោប្រមុខនៃរាជរដ្ឋាភិបាលកម្ពុជា ខណៈពេលដែលប្រទេសថៃកំពុងស្ថិតក្នុងស្ថានភាពធ្ងន់ធ្ងរនៃការរីករាលដាលវារុសកូវីដ-១៩ ដោយចាត់វិធានការទទួលពលរដ្ឋកម្ពុជាធ្វើចំណូលស្រុក ឲ្យធ្វើចត្តាឡីស័កនៅតាមបណ្តាខេត្តជាប់ព្រំដែន និងត្រូវធ្វើវិភាគសំណាក មុនមានការអនុញ្ញាតិឲ្យវិលចូលសហគមន៍វិញ។
ការពង្រឹងយុទ្ធសាស្រ្តលើវិធានការប្រយុទ្ធប្រឆាំងជម្ងឺកូវីដ-១៩ នៅតែជាប្រធានបទសំខាន់សម្រាប់កិច្ចប្រជុំនេះ ជាមួយនិងការជម្រុញផងដែរលើការពិភាក្សា អំពីយុទ្ធសាស្រ្តនៃការស្តារសេដ្ឋកិច្ចសង្គមឆ្នាំ២០២១របស់រដ្ឋបាលខេត្តសៀមរាប ដោយការពង្រឹងថែមទៀតជាពហុវិស័យ ដូចជា សុខាភិបាល ទេសចរណ៍ កសិកម្ម និងទីផ្សារ។ ជាមួយគ្នានេះ ការស្ថាបនាផ្លូវ៣៨ខ្សែ និងការកែលម្អសោភ័ណភាពដងស្ទឹងសៀមរាប ការបំពាក់សំណង់សិល្បការនានាជុំវិញហេដ្ឋរចនាសម្ព័ន្ធទាំងនោះ ដែលគាំទ្រដោយថវិកាជាតិ នឹងធ្វើឲ្យសៀមរាប-អង្គរ ក្លាយជាទីក្រុងទេសចរណ៍ដ៍ប្រណិត-វៃឈ្លាត នាពេលអនាគតដ៏ខ្លីខាងមុខ៕
អត្ថបទ និងរូបភាព: ងិន គឹមឡេង
