សិស្សមធ្យមសិក្សាទុតិយភូមិ ឬហៅថាបាក់ឌុប ក្នុងឆ្នាំសិក្សា២០១៩-២០២០ ក្នុងខេត្តសៀមរាប សរុបជាង៩ពាន់នាក់ បានប្រឡងជាប់ដោយស្វ័យប្រវត្តិ ស្មើនឹង១០០ភាគរយ ដោយមិនកំណត់ឧទ្ទេស នេះបើតាមរបាយការណ៍របស់មន្ទីរអប់រំ យុវជននិងកីឡាខេត្តសៀមរាប ក្នុងថ្ងៃបើកបវេសនកាល ជានិមិត្តរូបតែមួយគត់ នៅវិទ្យាល័យ ១០ មករា ១៩៧៩ ក្នុងក្រុងសៀមរាប នាថ្ងៃទី១១ ខែមករា ឆ្នាំ២០២១។
របាយការណ៍ដដែលនេះ ក៏បានបង្ហាញផងដែរថា លទ្ធផលនៃការប្រឡងសញ្ញាបត្រមធ្យមសិក្សាបឋមភូមិ ឬហៅថា ឌីប្លូម សម្រាប់ឆ្នាំសិក្សា២០១៩-២០២០ ក្នុងខេត្តសៀមរាប សិស្សសរុបជាង១ម៉ឺន៣ពាន់នាក់ ឬស្មើនឹង១០០ភាគរយ ត្រូវបានប្រឡងជាប់ដោយស្វ័យប្រវត្តិ និងដោយមិនកំណត់ឧទ្ទេសផងដែរ។
ជ្រុងមួយនៃសារលិខិត សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលអានទាំងស្រុងដោយឯកឧត្តម ទៀ សីហា អភិបាលខេត្តសៀមរាប ក្នុងឱកាសនោះ បានឆ្លុះបង្ហាញថា៖ ការអនុវត្តវិធានការសុវត្ថិភាព សុខភាព សម្រាប់បុគ្គលិកអប់រំ និងសិស្សានុសិស្ស រួមមានការរៀបចំហេដ្ឋារចនាសម្ព័ន្ធ អនាម័យ បង្គន់អនាម័យ និងទឹកស្អាតនៅតាមសាលារៀន និងការរៀបចំប្រព័ន្ធអប់រំអេឡិចត្រូនិក ការផ្តល់សេវារៀនសូត្រពីចម្ងាយ ការនុញ្ញាតឱ្យដំណើរការគ្រឹះស្ថានសិក្សាឡើងវិញជា៣ដំណាក់កាល ទាំងអស់នេះត្រូវបានធានាឱ្យសិស្សានុសិស្ស-និស្សិតនៅគ្រប់ភូមិសិក្សា នៅតែបន្តទទួលបានសេវាអប់រំតាមរូបភាពការអប់រំតាមបែបចម្រុះ” ឬអាចនិយាយបានថា សិស្សបានរៀននៅក្នុងថ្នាក់ផង រៀនពីចម្ងាយផង និងធ្វើស្វ័យសិក្សាផងដែរ។
ព័ត៌មានជាតិ ថ្មីៗ
គួរបញ្ជាក់ផងដែរថា រាជរដ្ឋាភិបាលកម្ពុជា នឹងផ្តល់អាទិភាពទី១ សម្រាប់វិស័យអប់រំ និងសុខាភិបាល បន្ទាប់ពីកម្ពុជាទទួលផលពីដំណក់ប្រេងដំបូង ស្របពេល នៃខួបលើកទី២២ឆ្នាំ នៃនយោបាយឈ្នះ-ឈ្នះរបស់សម្តេចតេជោ ក្នុងការបញ្ចប់សង្គ្រាម នាំមកនូវសុខសន្តិភាពពេញលេញ ឯកភាពជាតិទាំងស្រុង កសាងបានជាប្រវត្តិសាស្រ្តជូនប្រជាជាតិទាំងមូល ក្នុងរយៈពេល២២ឆ្នាំ កន្លងមកនេះ។
អត្ថបទ និងរូបភាព: ងិន គឹមឡេង
សម្រួលអត្ថបទ: សេង ផល្លី
