អាជ្ញាធរជាតិអប្សរា នៅថ្ងៃទី១១ ខែមករា ឆ្នាំ២០២០នេះ បានចាប់ផ្តើមការងារកែលម្អសោភណ្ឌភាព នៅមុខព្រះលានជល់ដំរី ដែលកិច្ចការនេះ ត្រូវបានធ្វើឡើងក្នុងគោលបំណង លើកតម្កើងតម្លៃនៃមរតកដូនតាខ្មែរ។
ឯកឧត្តម យិត ចាន់ដារ័ត្ន អគ្គនាយករងអាជ្ញាធរជាតិអប្សរា បានមានប្រសាសន៍ថា ការកែលម្អនៅបរិវេណមុខព្រះលានជល់ដំរីនេះ អ្នកជំនាញអាចនឹងប្រើពេល៦ខែ ដោយក្រុមការងារនឹងប្រែក្លាយផ្លូវកៅស៊ូ ដែលនៅជាប់នឹងព្រះលានជល់ដំរីឲ្យក្លាយជាផ្លូវថ្មើរជើងដោយមានដាំស្មៅ និងដើមឈើ ដើម្បីបង្កើនសោភណ្ឌភាពនៅបរិវេណនេះ ឲ្យវិលរកលក្ខណៈដើម និងភាពស្រស់បំព្រង។ ក្នុងនោះដែរប្រជាពលរដ្ឋដែលធ្វើដំណើដោយយានយន្ត ពួកគាត់នឹងត្រូវបង្វែរឲ្យធ្វើដំណើរ នៅលើផ្លូវប្រាសាទសួរព្រ័ត។
ឯកឧត្តម យិត ចាន់ដារ័ត្ន បានមានប្រសាសន៍បន្ថែមថា ការកែលម្អនេះដែរធ្វើឡើងតាមឯកសារប្រវត្តិសាស្ត្រ ដែលបានបង្ហាញថា នៅមុនឆ្នាំ១៩០៩ នៅមុខព្រះលានជល់ដំរីនេះ មិនមានផ្លូវធ្វើដំណើរទេ ទើបមកដល់ឆ្នាំ១៩១២ គេឃើញមានស្លាកស្នាមផ្លូវមួយខ្សែដែលនៅប្របប្រាសាទសួរព្រ័ត ចំណែកផ្លូវដែលនៅជាប់នឹងព្រះលានជល់ដំរីនោះ គឺមិនទាន់ឃើញមាននោះទេ។
សូមបញ្ជាក់ថា ជាមួយគម្រោងកែលម្អនេះ នៅព្រឹកថ្ងៃទី១១ ខែមករា ឆ្នាំ២០២១នេះ អាជ្ញាធរជាតិអប្សរា បានចេញលិខិតជូនដំណឹងដល់អ្នកទេសចរ ក៏ដូចជាប្រជាពលរដ្ឋ ស្តីពីការបិទផ្លូវកៅស៊ូមុខព្រះលានជល់ដំរី ចាប់ពីចំណុចខាងជើងប្រាសាទបាយ័ន ដល់ចំណុចផ្លូវបំបែក ខាងជើងព្រះពន្លាស្តេចគម្លង់ ដោយមិនអនុញ្ញាត ឲ្យធ្វើដំណើរចាប់ពីថ្ងៃជូនដំណឹងនេះតទៅ។ ក្នុងសេចក្តីជូនដំណឹងនេះ អាជ្ញាធរជាតិអប្សរា ក៏បានជម្រាបជូនសាធារណៈជន អាចធ្វើដំណើរបានតាមផ្លូវកៅស៊ូថ្មី ដែលនៅប្របនឹងប្រាសាទសួរព័ត្រវិញ៕
អត្ថបទ និង រូបភាព៖ ជា ស្រស់
