សម្រាប់ថ្ងៃទី១៤ ខែមករា ឆ្នាំ២០០២០នេះ នឹងពុំមាន ពិធីជំនួបរវាងសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាមួយអ្នកសារព័ត៌មានកម្ពុជា ដូចបណ្ដាឆ្នាំកន្លងមកនោះទេ នេះបើយោងតាមសារលិខិតរបស់សម្ដេចតេជោ ផ្ញើជូនអ្នកសារព័ត៌មានជាតិ និងអន្តរជាតិ កាលពីម្សិលមិញនេះ។
តាមរយៈសារលិខិតដដែលនេះ បង្ហាញថា នេះជាឆ្នាំទី៥ហើយ ដែលត្រូវរៀបចំជំនួបរវាងប្រមុខរាជរដ្ឋាភិបាលកម្ពុជា ជាមួយអ្នកសារព័ត៌មានកម្ពុជា ហើយពិធីនេះ តែងតែរៀបចំឡើងថ្ងៃទី១៤ ខែមករា ដែលមានរយៈពេល៤ឆ្នាំកន្លងមកហើយ។ ពិធីនេះមានគោលបំណង បង្កើនសាមគ្គីភាព និងពង្រឹងភាពជាដៃគូរវាងប្រមុខរាជរដ្ឋាភិបាលជាមួយសា្ថប័នព័ត៌មាន ដើម្បីលើកស្ទួយសិទ្ធិសេរីភាពក្នុងការបញ្ចេញមតិ សេរីភាពសារព័ត៌មានដែលគាំពារដោយច្បាប់រដ្ឋ និងធានាបានសុខដុមនីយកម្មក្នុងសង្គម ការថែរក្សាសុខសន្តិភាព និងជំរុញការអភិវឌ្ឍប្រកបដោយចីរភាពយូរអង្វែង នៅព្រះរាជាណាចក្រកម្ពុជា។
ដោយឡែក ចំពោះការអាកខាន នៃការរៀបចំជំនួបនៅឆ្នាំ២០២១នេះ គឺដោយសារតែ វិបត្តិនៃជំងឹកូវីដ-១៩ នៅតែបន្តគម្រាមគំហែងដល់សុខភាពសាធារណៈ និងអាយុជីវិតប្រជាជនកម្ពុជា ក៏ដូចជាពិភពលោកទាំងមូលផងដែរ។
ទោះបីព្រឹត្តិការណ៍ឆ្លងសហគមន៍លើកដំបូងរបស់កម្ពុជា ពោលគឺកាលពីថ្ងទី២៨ ខែវិច្ឆិកា ឆ្នាំ២០២០ បានបិទបញ្ចប់ទាំងស្រុងក្ដី ប៉ុន្តែសម្ដេចតេជោ ហ៊ុន សែន បានគូសបញ្ជាក់ថា ឱកាសនៃការវិលត្រឡប់នៃមេរោគដ៏កាចសាហាវនេះ នៅតែមាន ដែលពុំអាចមើលស្រាលបាន។
តែទោះជាយ៉ាងណាក៏ដោយ ប្រៀបធៀបនឹងបណ្ដាប្រទេសក្នុងតំបន់ កម្ពុជាមានចំនួនអ្នកឆ្លងមេរោគកូវីដ-១៩តិច ជាពិសេសមិនមានអ្នកស្លាប់ដោយសារមេរោគនេះឡើយ។ ទាំងនេះ គឺជាការចាត់វិធានការ និងឆ្លើយតបបានទាន់ពេលវេលា របស់រាជរដ្ឋាភិបាលកម្ពុជា ដែលអាចគ្រប់គ្រងស្ថានការណ៍បានដោយកាត់ផ្ដាច់មធ្យោបាយ ចម្លងមេរោគកូវីដ-១៩ ទៅក្នុងសហគមន៍ទ្រង់ទ្រាយធំ។
គួររំលឹកថា ជំនួបរវាងប្រមុខរាជរដ្ឋាភិបាលកម្ពុជា ជាមួយអ្នកសារព័ត៌មានកម្ពុជា លើកទី៤ មានអ្នកសារព័ត៌មានចូលរួមសរុបជាង៥០០០នាក់ នៅសាលសន្និសីទកោះពេជ្រ រាធានីភ្នំពេញ។
អត្ថបទ៖ សេង ផល្លី
