ជាមួយនឹងការគម្រាមកំហែងលើសុខភាពសាធារណៈ ក៏ដូចជាវិបត្តិសេដ្ឋកិច្ច ក្នុងស្ថានភាពនៃវិបត្តិជំងឺកូវីដ-១៩ ឯកឧត្តម ទៀ សីហា អភិបាលខេត្តសៀមរាប បង្ហាញថា វិស័យកសិកម្ម បាននិងកំពុងមានសន្ទុះកើនឡើង គួរឱ្យកត់សម្គាល់ ខណៈវិស័យទេសចរណ៍ក្នុងប្រទេស និងទូទាំងពិភពលោក កំពុងរងផលប៉ះពាល់យ៉ាងធ្ងន់ធ្ងរ។
ថ្លែងក្នុងពិធីសម្ពោធការិយាល័យសភាពាណិជ្ជកម្មមណ្ឌលខេត្តសៀមរាប-ឧត្តរមានជ័យ នាព្រឹកថ្ងៃទី១៤ ខែមករា ឆ្នាំ២០២១នេះ ឯកឧត្តម ទៀ សីហា គូសបញ្ជាក់ថា តាមរយៈការជំរុញ និងលើកទឹកចិត្ត របស់រាជរដ្ឋាភិបាល ក៏ដូចជាអាជ្ញាធរខេត្ត ឱ្យប្រជាពលរដ្ឋ ជាពិសេសកសិករ បែរមកចាប់អារម្មណ៍ការធ្វើកសិកម្មតាមបច្ចេកទេសថ្មី បណ្តាស្រុកមួយចំនួនរបស់ខេត្តសៀមរាប បាននិងកំពុងប្រែក្លាយភូមិដ្ឋានរបស់ខ្លួន ទៅជាតំបន់ដែលមានសក្តានុពលលើវិស័យកសិកម្ម និងកសិទេសចរយ៉ាងខ្លាំង។
ចំពោះបរិបទថ្មី ក្នុងវិបត្តិជំងឺកូវីដ-១៩ សក្ដានុពលនៃវិស័យទេសចរណ៍ ដែលខេត្តសៀមរាបធ្លាប់មាន ពុំមែនជាវិស័យអាទិភាព ដើម្បីលើកកម្ពស់ជីវភាពប្រចាំថ្ងៃរបស់ប្រជាពលរដ្ឋទៀតនោះទេ ឯកឧត្តមអភិបាលខេត្តរំពឹងថា ក្រោយពេលផ្លូវថ្នល់ទាំង៣៨ខ្សែ ស្ថាបនារួចរាល់ជាស្ថាពរ បណ្តាស្រុកដែលនៅកៀកនឹងក្រុងសៀមរាប នឹងកាន់តែមានភាពងាយស្រួល ក្នុងការនាំយកផលិតផលកសិកម្មរបស់ខ្លួនមកកាន់ទីផ្សារ និងពង្រីកការផ្គត់ផ្គង់បន្ថែមទៀត។
ឯកឧត្តមអភិបាលខេត្ត ក៏បានថ្លែងកោតសសើរ ដល់សភាពាណិជ្ជកម្មមណ្ឌលខេត្តសៀមរាប-ឧត្តរមានជ័យ ដែលបានខិតខំប្រឹងប្រែងក្នុងការសម្របសម្រួល វិស័យពាណិជ្ជកម្ម កសិកម្ម សេវាកម្ម ឧស្សាហកម្ម និងសិប្បកម្ម ជាពិសេសការខិតខំទាក់ទាញវិនិយោគទុនជាច្រើន មកកណ្តាក់ទុកនៅក្នុងខេត្តសៀមរាប ដើម្បីជំរុញកំណើនសេដ្ឋកិច្ចរបស់ខេត្ត ឱ្យកាន់តែប្រសើឡើង និងបានចូលរួមកាត់បន្ថយភាពក្រីក្ររបស់បងប្អូនប្រជាពលរដ្ឋផងដែរ។
ការសម្ពោធន៍ការិយាល័យសភាពាណិជ្ជកម្មថ្មីនេះ លោកឧកញ៉ា បណ្ឌិត ហ៊ុយ ភៀវ ប្រធានសភាពាណិជ្ជកម្មមណ្ឌលសៀមរាប-ឧត្តរមានជ័យ បង្ហាញថា ជាការបង្ខិតខ្លួនឲ្យកាន់តែមកជិតប្រជាពលរដ្ឋ ដើម្បីសម្របសម្រួលបញ្ហាលំបាករបស់ប្រជាពលរដ្ឋ អាជីវករ ពាណិជ្ជករ និងបន្តរួមគ្នាបំពេញការងារសកម្មភាពលើវិស័យសេដ្ឋកិច្ចពាណិជ្ជកម្ម បានងាយស្រួលជាងមុន ដែលជាប្រយោជន៍ក្នុងការបង្កើនប្រភពចំណូល សម្រាប់សេដ្ឋកិច្ចក្នុងខេត្ត ឲ្យកាន់តែមានភាពរស់រវើឡើងវិញ។
អត្ថបទ និងរូបភាព: ជា ស្រស់
សម្រួលអត្ថបទ: សេង ផល្លី
