មានប្រសាសន៍ក្នុងកិច្ចប្រជុំបូកសរុបការអនុវត្តការងារប្រចាំឆ្នាំ២០២០ និងទិសដៅអនុវត្តបន្តឆ្នាំ ២០២១ របស់មន្ទីរទេសចរណ៍ខេត្តសៀមរាប កាលពីថ្ងៃទី១៤ ខែមករា ឆ្នាំ២០២១ម្សិលមិញនេះ លោក ពៅ ពិសិដ្ឋ អភិបាលរងខេត្ត បានបញ្ជាក់ថា បច្ចុប្បន្ននេះ ការឆ្លងរាតត្បាតជាសកលនូវជំងឺកូវីដ-១៩ នៅមិនទានស្រាកស្រាន្តនោះទេ ដោយនៅតែបន្តការឆ្លងដល់មនុស្សច្រើនជារៀងរាល់ថ្ងៃ ដូច្នេះក្នុងឆ្នាំ២០២១នេះ គឺនៅមិនទាន់បិទបញ្ចប់ការការឆ្លងរាលដាលជំងឺកូវីដ-១៩នេះទេ បើទោះបីមានការវិវត្តន៍ល្អនូវវ៉ាក់សាំងកូវីដ-១៩ក៏ដោយ ហេតុនេះ យើងទាំងអស់គ្នាត្រូវតែប្រុងប្រយ័ត្នខ្ពស់ ។
លោក ពៅ ពិសិដ្ឋ មានប្រសាសន៍ទៀតថា ម៉្យាងទៀតបើទោះបីប្រមុខរាជរដ្ឋាភិបាលប្រកាសបិទបញ្ចប់ ព្រឹត្តិការណ៍សហគមន៍ ២៨វិច្ឆិកាក៏ពិតមែន តែការឆ្លងរាតត្បាតជំងឺកូវីដ-១៩នៅតែកើតមានជារៀងរាល់ថ្ងៃ ដូច្នេះក្នុងឱកាសនេះ សូមឲ្យថ្នាក់ដឹកនាំនិងមន្ត្រីទាំងអស់ នៃមន្ទីរទេសចរណ៍ខេត្ត ត្រូវបន្តយកចិត្តទុកខ្ពស់ចំពោះវិធានការការពារការឆ្លងវីរុសកូវីដ-១៩ និងអនុវត្តតាមការណែនាំរបស់ក្រសួងសុខាភិបាល , បន្តចុះផ្សព្វផ្សាយនិងណែនាំដល់ម្ចាស់អាជីវកម្ម និងមណ្ឌលកំសាន្តមនុស្សពេញវ័យ , ភោជនីយដ្ឋាន ឲ្យបន្តអនុវត្តតាមការណែនាំរបស់ក្រសួងសុខាភិបាល ដើម្បីទប់ស្កាត់ការរីករាលដានវីរុសកូវីដ-១៩ , ត្រូវរៀបចំផែនការស្តារ និងលើកស្ទួយវិស័យទេសចរណ៍ក្នុងខេត្តសៀមរាប ទាំងក្នុង និងក្រោយវិបត្តិជំងឺកូវីដ-១៩ ។
ពាក់ព័ន្ធនឹងវិធានការការពារជំងឺកូវីដ-១៩នេះដែរ នៅព្រឹកថ្ងៃទី១៥ ខែមករា ឆ្នាំ២០២១នេះ លោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានមានប្រសាសន៍ថា ថ្ងៃនេះក្រសួងសុខាភិបាលបានរកឃើញ អ្នកដែលមានវិជ្ជមានជំងឺកូវីដ-១៩ថ្មី រហូតដល់ទៅចំនួន១៥នាក់ ដែលជាពលករ ធ្វើដំណើរពីប្រទេសថៃ ដែលចំនួនឆ្លងនេះគឺច្រើន ហើយអាចនឹងមានអ្នកឆ្លងកូវីដ១៩នេះ ជាបន្ដបន្ទាប់ទៀត ដូច្នេះសូមបងប្អូនយើង កុំមានធ្វេសប្រហែសឱ្យសោះ សូមបន្ដការប្រុងប្រយ័ត្នខ្ពស់នឹងជំងឺកូវីដ១៩ ដោយបន្ដគោរព និងអនុវត្ដវិធាននានា ដើម្បីការពារ ទប់ស្កាត់នូវជំងឺកូវីដ-១៩ ដែលសម្ដេចតេជោ ហ៊ុនសែន នាយករដ្ឋមន្ដ្រីកម្ពុជា តែងតែធ្វើការអំពាវនាវ និងក្រសួងបានដាក់ចេញ។
គួររំលឹកថា សម្រាប់វិស័យទេសចរណ៍នៅខេត្តសៀមរាបក្នុងឆ្នាំ២០២០នេះ ខេត្តទទូលភ្ញៀវទេសចរសរុបចំនួន ១.១០៤.០៣៦ នាក់ ថយចុះចំនួន៧៤,៦៨ភាគរយ បើប្រៀបធៀបរយៈពេលដូចគ្នាឆ្នាំ២០១៩ ដែលមានចំនួន ៤.២៦២.៣០៦នាក់ ក្នុងនោះភ្ញៀវទេសចរអន្តរជាតិមានចំនួន ៤០០.៨៨៩ នាក់ ថយចុះចំនួន៧៩,៩៨ភាគរយ និងភ្ញៀវទេសចរជាតិមានចំនួន ៧០៣.១៤៧ នាក់ ថយចុះចំនួន៧៦,៧០ភាគរយ ៕
អត្ថបទ និង រូបថត ៖ រដ្ឋបាលខេត្ត
កែសម្រួលអត្ថបទ ៖ លោក លីវ សាន្ត
