នៅព្រឹកថ្ងៃទី១៥ ខែមករា ឆ្នាំ២០២១ ក្រុមការងារ សាខាការពារអ្នកប្រើប្រាស់កិច្ចការប្រកួតប្រជែង នឹងបង្ក្រាបការក្លែងបន្លំ (ក.ប.ប) ខេត្តសៀមរាប បានដកហូតពពុះសណ្តែ ផ្ទុកសារធាតុគីមីហាមឃាត់ ទម្ងន់ជិត ៤គីឡូក្រាម ពីអាជីវករ ក្នុងផ្សារស្រីស្នំ ភូមិជ្រោយនាងនួន ឃុំជ្រោយនាងនួន ស្រុកស្រីស្នំ ខេត្តសៀមរាប។
លោក ខៀវ បញ្ញាវឌ្ឈន៍ ប្រធានសាខាការពារអ្នកប្រើប្រាស់កិច្ចការប្រកួតប្រជែង នឹងបង្ក្រាបការក្លែងបន្លំខេត្ត បង្ហាញថា ការចុះត្រួពិនិត្យគុណភាពចំណីអាហារនេះ មន្ត្រីជំនាញ បានផ្តោតសំខាន់ទៅលើការស្វែងរកសារធាតុគីមីហាមឃាត់ ដែលមាននៅក្នុងគ្រឿងឧបភោគបរិភោគ ដោយប្រើប្រាស់ឧបករណ៍តេស្តឃីតនៅនឹងកន្លែងផ្ទាល់តែម្តង ក៏ដូចជាស្វែងរកភាពមិនប្រក្រតីជាច្រើនទៀត ដែលមិនឆ្លើយតបទៅនឹងសុវត្ថិភាពម្ហូបអាហារជាដើម។ ចំពោះចំណីអាហារ ដែលបានដកហូតនេះ ក្រុមការងារយើង នឹងយកមករក្សាទុកនៅសាខា ដើម្បីរង់ចាំធ្វើការដុតកំទេចចោលនាពេលក្រោយ។
បន្ថែមពីនេះ លោកប្រធានសាខា បញ្ជាក់ថា ក្រុមមន្រ្តីជំនាញ ក៏បានធ្វើការណែនាំ ដល់អាជីវករទាំងអស់ ឱ្យពួកគាត់យល់ដឹង និងអនុវត្តន៍ទៅតាមច្បាប់ស្ដីការគ្រប់គ្រងគុណភាព សុវត្ថិភាព លើផលិតផលទំនិញ និងសេវា ព្រមទាំងច្បាប់កិច្ចការពារអ្នកប្រើប្រាស់ ជៀសវាងបង្កផលប៉ះពាល់ដល់សុខភាពប្រពលរដ្ឋ និងអាចប្រឈមចំពោះមុខច្បាប់ផងដែរ។
សូមបញ្ជាក់ថា សាខាការពារអ្នកប្រើប្រាស់កិច្ចការប្រកួតប្រជែង នឹងបង្ក្រាបការក្លែងបន្លំ (ក.ប.ប) ខេត្ត ធ្វើការចុះត្រួតពិនិត្យគុណភាពម្ហូបអាហារ និងស្វែងរកនៅសារធាតុគីមីហាមឃាត់ក្នុងខេត្តសៀមរាប រៀងរាល់មួយខែម្ដង តាមបណ្ដាក្រុងស្រុកទាំង១២ របស់ខេត្ត។
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក សេង ផល្លី
