លោក នួន ពុទ្ធារ៉ា អភិបាលក្រុងសៀមរាប បានមានប្រសាសន៍ថា ក្នុងផែនការ៥ឆ្នាំនៃការអភិវឌ្ឍខេត្តសៀមរាប បានកំណត់យកគោលដៅធំៗមួយចំនួន ក្នុងនោះ ការគិតគូរពីជីវភាពភាពរបស់បងប្អូនប្រជាពលរដ្ឋ ដែលរស់នៅលើសំណង់មិនរៀបរយ ក៏ជាគោលដៅមួយដែលអាជ្ញាធរបានគិតគូរខ្ពស់បំផុត។ លោកអភិបាលក្រុងសៀមរាប មានប្រសាសន៍បែបនេះ ក្នុងឱកាសដែលលោក អញ្ជើញចែកអំណោយដល់ប្រជាពលរដ្ឋងាយរងគ្រោះចំនួន៨០គ្រួសារ ដែលរស់នៅក្នុងសំណង់មិនរៀបរយ ក្នុងសង្កាត់គោកចក ក្រុងសៀមរាប កាលពីរសៀលថ្ងៃ ទី១៧ ខែមករា ឆ្នាំ២០២១។
លោក នួន ពុទ្ធារ៉ា មានប្រសាសន៍ទៀតថា ក្នុងផែនការអភិឌ្ឍន៍៥ឆ្នាំ របស់ខេត្តសៀមរាប បានកំណត់យកគោលដៅធំៗ ដូចជា បញ្ហាផ្លូវថ្នល់ បរិស្ថាន ការស្តារវិស័យទេសចរណ៍ និងការរៀបចំធ្វើយ៉ាងណាលើកកម្ពស់ជីភាពប្រជាពលរដ្ឋ ជាពិសេសប្រជាពលរដ្ឋដែលរស់នៅលើសំណង់មិនរៀបរយ ឬសំណង់បណ្តោះអាសន្ន។ ក្នុងផែនការស្តារហេដ្ឋារចនាសម្ព័ន្ធផ្លូវថ្នល់ ក្នុងក្រុងសៀមរាប អាជ្ញាធរខេត្តសៀមរាប បានសហការជាមួយអាជ្ញាធរជាតិអប្សរា បានធ្វើការបម្លាស់ទីលំនៅបងប្អូនប្រជាពលរដ្ឋដែលរស់នៅតាមមាត់ស្ទឹងសៀមរាប ចំនួន៤៣០គ្រួសារ ទៅកាន់ទីតាំងថ្មី ដោយផ្តល់ដីកម្មសិទ្ធិស្របច្បាប់ ក្នុងភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី ដែលនេះ ជាផ្នែកមួយនៃការយកចិត្តទុកដាក់របស់អាជ្ញាធរចំពោះប្រជាពលរដ្ឋ។
លោកអភិបាលក្រុង បានបញ្ជាក់ថា នៅទូទាំងក្រុងទេសចរណ៍នេះទាំងមូល មានប្រជាពលរដ្ឋចំនួនជាង៣ពាន់គ្រួសារ បានរស់នៅក្នុងសំណង់មិនរៀបរយ ឬសំណង់បណ្តោះអាសន្ន តាមដីចំណីផ្លូវ មាត់ប្រលាយ មាត់លូជាដើម។ ចំពោះអំណោយដែលចែកជូនប្រជាពលរដ្ឋទាំង៨០គ្រួសារនាពេលនោះ ជាជំនួយសប្បុរសធម៌របស់សប្បុរសជននានា តាមរយៈសាលាអន្តរជាតិវេសហ្គេតសៀមរាប។
លោក រ័ត្ន រស្មី នាយកសាលាវេសហ្គេត និងជាតំណាងសប្បុរសជន បានមានប្រសាសន៍ថា អំណោយសម្រាប់ពេលនេះ គឺជាការចែករំលែកនូវក្តីស្រលាញ់ ជួយគ្នាក្នុងគ្រាលំបាក ជាពិសេសនៅក្នុងវិបត្តិកូវីដ១៩នេះ ហើយវាក៏ជាការដាស់ស្មារតី ឲ្យប្រជាពលរដ្ឋយើងចេះជួយគ្នា ចេះចែករំលែកទុក្ខលំបាកជាមួយគ្នា ស្របតាមអនុសាសន៍ដ៏ខ្ពង់ខ្ពស់របស់សម្តេចតេជោ ប្រមុខរាជរដ្ឋាភិបាលកម្ពុជា។ លោកក៏បានសំណូមពរដល់បងប្អូនដែលជាពលរដ្ឋងាយរងគ្រោះទាំងអស់ថា បើទោះជាលំបាកយ៉ាងណា ក៏ត្រូវបញ្ជូនកូនទៅសាលារៀនឲ្យបានគ្រប់ៗគ្នា ព្រោះពេលនេះប្រទេសកម្ពុជា ក្រោមការដឹកនាំប្រកបដោយគិតិបណ្ឌិតរបស់សម្តេចតេជោ គឺសាលារៀនទាំងរដ្ឋ ទាំងឯកជន បានរំកិលខ្លួនទៅជិតបងប្អូនគ្រប់ទីតំបន់៕
អត្ថបទ រូបភាព៖ ជា ស្រស់, ទ្រា ពន្លឺ
