ក្នុងឱកាសបើកកិច្ចប្រជុំពិភាក្សារួមលើការងារគ្រប់គ្រង ការងារបរិស្ថាន សន្តិសុខសណ្តាប់ធ្នាប់ របៀបរៀបរៀបរយសាធារណៈនៅក្នុងមណ្ឌលរដ្ឋបាលមន្ទីរខេត្ត នាព្រឹកថ្ងៃទី១៥ខែមករាឆ្នាំ២០២១ លោក សុខ ថុល នាយករដ្ឋបាលសាលាខេត្តសៀមរាប បានមានប្រសាសន៍ថា មណ្ឌលរដ្ឋបាលមន្ទីរខេត្តសៀមរាប ជាកន្លែងប្រមូលផ្ដុំគ្រប់មន្ទីរជំនាញសម្រាប់បម្រើសេវារួមជូនដល់ប្រជាពលរដ្ឋ។ ដូច្នេះជាគោលការណ៍ របស់ឯកឧត្ដមអភិបាលបាលខេត្ត គឺត្រូវរៀបចំទីកន្លែងនេះ ឲ្យកាន់តែមានភាពស្រស់ស្អាតទាំងសោភ័ណភាព អនាម័យ និង បរិស្ថាន រួមទាំងការងារសន្តិសុខសណ្តាប់ធ្នាប់សាធារណៈផងដែរ ដូច្នេះកិច្ចប្រជុំនាថ្ងៃនេះ គឺដើម្បីប្រមូលមតិយោបល់រួមសម្រាប់ស្នើសុំគោលការណ៍ពីឯកឧត្តម អភិបាលខេត្ត ពិនិត្យនិងសម្រេច ។
លោក សុខ ថុល មានប្រសាសន៍ទៀតថា យោងតាមស្មារតីនៃកិច្ចប្រជុំនេះ គឺបានឯកភាពគ្នាដោយធ្វើបណ្ណសម្រាប់ឱ្យមន្ត្រីរាជការ និងបុគ្គលិកនៃមណ្ឌលរដ្ឋបាលមន្ទីរខេត្តទាំងអស់ ត្រូវពាក់ប័ណ្ណសំគាល់ខ្លួនពេលចូលបម្រើការងារដោយយកទម្រង់តែមួយ និងចុះហត្ថលេខាដោយប្រធានមន្ទីរនីមួយៗ , រៀបចំជាចំណតយានយន្តសម្រាប់សាធារណៈជនមកទទួលនិងស្វែងរកសេវាពាក់ព័ន្ឋនៅទីនេះ ដែលគ្រោងនឹងមានការរៀបចំចាក់ដី ក្រាលការ៉ូឡា និងរៀបចំជាសួន ការប្រមូល និង ទុកដាក់សំរាមឲ្យបានត្រឹមត្រូវ រួមទាំងឱ្យមានអាហារដ្ឋានដែលមានលក្ខណៈសមរម្យនៅក្នុងមណ្ឌលរដ្ឋបាលមន្ទីរខេត្តផងដែរ ។
ក្នុងឱកាសនោះដែរ លោក សុខ ថុល បានស្នើដល់កម្លាំងនគរបាលដែលប្រចាំការនៅមណ្ឌលរដ្ឋបាលមន្ទីរខេត្ត នៅពេលមានប័ណ្ណសំគាល់ខ្លួននិងប័ណ្ណសំគាល់យានយន្តចេញចូល ត្រូវបែងចែកវេនប្រចាំការឱ្យបានច្បាស់លាស់ ដើម្បីបំពេញការងារភារកិច្ចប្រកបដោយភាពទទួលខុសត្រូវ ដើម្បីធានាបាននូវសន្តិសុខសណ្តាប់ធ្នាប់ របៀបរៀបរយសាធារណៈនៅទីនេះ និងគួរពិនិត្យលទ្ឋភាពរៀបចំឱ្យបានល្អឡើងវិញនូវប៉ុស្តិ៍ប្រចាំការ គឺប្រើសម្រាប់តែអ្នកប្រចាំការប៉ុណ្ណោះ ព្រោះជាច្រកចេញចូលសំខាន់សម្រាប់មន្ត្រីរាជការ និងសាធារណៈជនទូទៅដែលមកទទួលសេវាផ្សេងៗ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
