ក្នុងកិច្ចប្រជុំពិភាក្សាស្តីពីការកំណត់ព្រំប្រទល់រដ្ឋបាល ដែលមិនច្បាស់លាស់រវាងរដ្ឋបាលខេត្តសៀមរាប និងរដ្ឋបាលខេត្តឧត្តរមានជ័យ នៅព្រឹកថ្ងៃទី១៣ ខែមករា ឆ្នាំ២០២១ ដឹកនាំដោយ ឯកឧត្តម ទៀ សីហា អភិបាលខេត្តសៀមរាប បង្ហាញថា ភូមិចំនួន១៩ ស្ថិតក្នុងស្រុកចំនួន៣ នៃខេត្តសៀមរាប នៅពុំទាន់កំណត់ព្រំប្រទល់បានច្បាស់លាស់នៅឡើយ ដែលបង្កឲ្យប៉ះពាល់ដល់ការរស់នៅប្រចាំថ្ងៃរបស់ប្រជាពលរដ្ឋនៅក្នុងភូមិសាស្ត្រទាំងអស់នោះ។
តាមការបញ្ជាក់របស់លោក ទិព្វ ពិសិដ្ឋ នាយកទីចាត់ផែនការ វិនិយោគនៃសាលាខេត្តសៀមរាប បង្ហាញថា បញ្ហាព្រំ ប្រទល់រដ្ឋបាលមិនច្បាស់លាស់នេះ មានចំនួន៣ស្រុក គឺស្រុកស្វាយលើ នៅឃុំកន្តូត និង ឃុំស្វាយលើ ស្មើ ៤ភូមិ ,ស្រុកស្រីស្នំ គឺស្ថិតនៅ ឃុំស្លែងស្ពាន មាន ៧ភូមិ និង ស្រុកវ៉ារិន សិ្ថតនៅឃុំស្រែណូយ និងឃុំវ៉ារិន មាន ៨ភូមិ។
ក្នុងនោះដែរលោកអភិបាលស្រុកទាំងបី បង្ហាញ និងបកស្រាយ ជូនដល់អង្គប្រជុំថា កំណត់ដែលមានភាពច្បាស់លាស់ ទទួលបានពីលោក-លោកស្រីមេឃុំ និងមេភូមិ គឺអំពីស្ថានភាពភូមិសាស្ត្រ និងជីវប្រវត្តិក្នុងមូលដ្ឋានរបស់ខ្លួន។
ព័ត៌មានជាតិ ថ្មីៗ
ឯកឧត្តម ទៀ សីហា គូសបញ្ជាក់ថា ការលើកឡើងអំពីបញ្ហាប្រឈមនានា របស់ប្រជាពលរដ្ឋក្នុងខេត្តសៀមរាប ដែលរស់នៅក្បែរព្រំប្រទល់ខេត្តឧត្តរមានជ័យ នឹងត្រូវយកធ្វើជាកំណត់ហេតុ សម្រាប់យកទៅជជែកពិភាក្សាជាមួយអភិបាលនៃគណៈអភិបាលខេត្តឧត្តរមានជ័យនាពេលខាងមុខ និង បន្ទាប់មកនឹងអញ្ជើញ អគ្គនាយករដ្ឋបាលក្រសួងមហាផ្ទៃ ដើម្បីកំណត់ព្រំប្រទល់ឲ្យបានច្បាស់លាស់។
ក្នុងនោះដែរ ឯកឧត្តមអភិបាលខេត្ត ក៏បានណែនាំដល់អាជ្ញាធរស្រុកទាំងបី ត្រូវបន្តធ្វើការចងក្រងឯកសារ ឲ្យបានគ្រប់ជ្រុងជ្រោយ ដែលខ្លួនមាននាពេលកន្លង សម្រាប់ជាវត្ថុតាងមួយដ៏សំខាន់ ដើមី្បដាក់ចូលទៅក្នុងរបៀបវារៈកិច្ចប្រជុំនាថ្ងៃខាងមុខនេះ រវាងថ្នាក់ដឹកនាំនៃខេត្តទាំងពីរ ដែលគ្រោងនឹងធ្វើឡើងនៅក្នុងខេត្តសៀមរាប ។ ម៉្យាងទៀតសូមឲ្យ អាជ្ញាធរភូមិឃុំ បន្តការគ្រប់គ្រងបងប្អូនប្រជាពលរដ្ឋឲ្យបានល្អ ក្នុងពេលដែលនៅលើពិភពលោកបានកំពុងជួបនូវវិបត្តិ ជំងឺកូវីដ-១៩ ជាពិសេសបងប្អូនប្រជាពលរដ្ឋទើបវិលមកពីក្រៅប្រទេស គឺត្រូវតែចូលទៅធ្វើចត្តាឡីស័កចំនួន ១៤ថ្ងៃ មុនចូលមកកាន់មូលដ្ឋានភូមិឃុំរបស់ខ្លួន៕
អត្ថបទ និងរូបភាព: យូ វង្ស
សម្រួលអត្ថបទ: សេង ផល្លី
