នាថ្ងៃទី១១ ខែមករា ឆ្នាំ២០២១នេះ ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប បានអញ្ជើញជាអធិបតីក្នុងពិធីបើកបវេសនកាលឆ្នាំសិក្សាថ្មី២០២០- ២០២១ ដែលប្រារព្ធឡើងជានិមិត្តរូបកម្រិតថ្នាក់ខេត្ត នៅវិទ្យាល័យ ១០មករា១៩៧៩ រួមជាមួយវត្តមានថ្នាក់ដឹកនាំមន្ទីរ អង្គភាពពាក់ព័ន្ធ មន្ត្រីរាជការ គណ:គ្រប់គ្រងសាលា លោកគ្រូអ្នកគ្រូ សិស្សានុសិស្ស តំណាងមាតាបិតាអាណាព្យាបាលសិស្ស ជាច្រើននាក់ផងដែរ។ នៅក្នុងខេត្តសៀមរាប ក៏មានរៀបចំពិធីបើកបវេសនកាលជានិមិត្តរូបក្នុងកម្រិតថ្នាក់ក្រុង-ស្រុក តាមគោលដៅសំខាន់ៗ ផងដែរ។ ចំណែកថ្នាក់សាលារៀន ក៏បានរៀបចំចាប់ផ្តើមដំណើរការសិក្សារៀនសូត្រតែម្តងតាមស្ថានភាពជាក់ស្តែង ។
ក្នុងមតិស្វាគមន៍ របស់លោក លី ប៊ុនណា ប្រធានមន្ទីរអប់រំ យុវជន និងកីឡាខេត្តសៀមរាប ថា៖ បវេសនកាលឆ្នាំសិក្សាថ្មី ២០២០-២០២១នេះ ត្រូវបានប្រារព្ធឡើងក្នុងបរិបទថ្មី និងក្នុងស្មារតីនៃការបន្តការបង្ការ និងទប់ស្កាត់នៃការរីករាលដាលនៃជំងឺកូវីដ-19 ស្របតាមការណែនាំរបស់អង្គការសុខភាព ពិភពលោក និងក្រសួងសុខាភិបាល ព្រមទាំងការធានាបាននូវការរៀន និងបង្រៀនប្រកបដោយគុណភាព និងនិរន្តរភាព ផ្អែកលើមូលដ្ឋាននៃការអនុវត្តគន្លងថ្មីនៃការអប់រំ ដោយកំណត់តម្រូវឱ្យមានការរៀបចំថ្នាក់វេនសិក្សា កម្មវិធីសិក្សាបំព្រួញ កាលវិភាគសិក្សា ជម្រើសមុខវិជ្ជា មុខវិជ្ជាកាតព្វកិច្ច និងវិធីសាស្រ្តបង្រៀនតាមបែបចម្រុះ និងបត់បែន ។
បន្ទាប់ពីអានសារលិខិត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងឱកាសទិវាបើកបវេសនកាលឆ្នាំសិក្សាថ្មី២០២០.២០២១ រួចមក ឯកឧត្តម ទៀ សីហា ប្រសាសន៍បញ្ជាក់បន្ថែមថា៖ រាជរដ្ឋាភិបាលកម្ពុជាក្រោមកិច្ចដឹកនាំដ៍ឈ្លាសវៃរបស់សម្តេចតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា បានខិតខំប្រឹងប្រែងនាំសុខសន្តិភាព និងពន្លឿនការអភិវឌ្ឍន៍ប្រទេសជាតិឱ្យមានការរីកចំរើនលូតលាស់លើគ្រប់វិស័យ ដោយឡែកខេត្តសៀមរាបនៅចុងឆ្នាំ២០២០សម្តេច នាយករដ្ឋមន្ត្រីបានផ្តល់ឱ្យខេត្តនេះនូវគម្រោងជួសជុលផ្លូវចំនួន៣៨ខ្សែ ហើយតាមរយៈគម្រោងសាងសង់ផ្លូវទាំង៣៨ខ្សែនេះ នឹងធ្វើឲ្យទីក្រុងសៀមរាប ប្រែក្លាយរូបរាងជាទីក្រុងទំនើប និងទាក់ទាញភ្ញៀវទេសចរណ៍ ដ៏មានសក្តានុពល ដែលត្រូវបានរាជរដ្ឋាភិបាលកម្ពុជាកំណត់ជាតំបន់ស្នូលនៃប៉ូលអភិវឌ្ឍជាតិ ជាគោលដៅទេសចរណ៍វប្បធម៌ប្រវត្តិសាស្រ្ត និងធម្មជាតិ ស្របតាមរូបសាស្ត្រទីក្រុង រួមជាមួយការគិតគូរដល់ការការពារ និងកែលម្អបរិស្ថាន ផាសុកភាពរបស់ប្រជាពលរដ្ឋ និងការរៀបចំអភិវឌ្ឍទីក្រុងឆ្លាតវៃ (Smart City) ផងដែរ។ ឯកឧត្តមអភិបាលខេត្ត បានសុំការយោគយល់ និងអធ្យាស្រ័យពីសំណាក់បងប្អូនប្រជាពលរដ្ឋ និងអ្នកដំណើរទាំងអស់ចំពោះស្ថានភាពបរិស្ថានមិនសូវល្អ និងមានការកកស្ទះឬចង្អៀតពិបាកក្នុងការធ្វើដំណើរដោយកន្លែងៗ ពេលយប់ភ្លើងបំភ្លឹតាមដងផ្លូវក៏ត្រូវបានរើរៀបចំ និងកំពុងតែមមាញឹកក្នុងការជួសលជុល កែលំអនូវហេដ្ឋារចនាសម្ព័ន្ឋផ្លូវទាំង៣៨ខ្សែ ហេតុនេះសូមអធ្យាស្រ័យទៅឱ្យគ្នាវិញទៅមក និងសូមប្រុងប្រយ័ត្ន នៅពេលបើកបរ ។
ព័ត៌មានជាតិ ថ្មីៗ
ឯកឧត្តមក៏បានផ្តាំផ្ញើដល់សិស្សានុសិស្សឱ្យប្រឹងប្រែងសិក្សារៀនសូត្រ ត្រងត្រាប់ស្តាប់ការពន្យល់ណែនាំរបស់លោកគ្រូអ្នកគ្រូ និងមាតាបិតាអាណាព្យាបាលរបស់ខ្លួនគោរពវិន័យសាលា ដោយចៀសឱ្យឆ្ងាយពីគ្រឿងញៀន និងអំពើអបាយមុខផ្សេងៗ កុំខ្ជះខ្ជាយពេលវេលាឥតប្រយោជន៍ ហើយជាមួយនឹងស្ថានភាពរីករាលដាលនៃជំងឺកូវីដ-១៩ សូមសិស្សានុសិស្ស និងបងប្អូនប្រជាពលរដ្ឋទាំងអស់បន្តរួមគ្នាទប់ស្កាត់ការរីករាលដាលជំងឺនេះ គឺត្រូវពាក់ម៉ាស់ និងលាងដៃអោយបានស្អាតដោយប្រើអាលកុល ឬជែលសម្លាប់មេរោគ ព្រមទាំងរក្សាគម្លាតសង្គមជាដើម ៕
អត្ថបទ និងរូបភាព: លោកយូ វង្ស
កែសម្រួលដោយ លីវ សុខុន ។
