បន្ទាប់ពីបញ្ចប់កិច្ចប្រជុំបូកសរុបការងារប្រចាំឆ្នាំ២០២០ និងទិសដៅការបន្តប្រចាំឆ្នាំ២០២១ មន្ទីរព័ត៌មានខេត្តសៀមរាប បានរៀបចំដំណើរកម្សាន្តលើកទី៤របស់ខ្លួន ដែលមានរយ:ពេល ៣យប់ ៤ថ្ងៃ គឺចាប់ពីថ្ងៃទី០៧ ដល់ទី១០ ខែមករា ឆ្នាំ២០២១ ទៅកាន់រមណីយដ្ឋាននានា ក្នុងខេត្តខេត្តភាគឦសាន ប្រទេសកម្ពុជា ដើម្បីលើកទឹកចិត្ត ដល់មន្ត្រីមន្ទីរព័ត៌មានខេត្តសៀមរាបទាំងអស់ ដែលបានសម្រេច នូវលទ្ធផលការងារល្អប្រសើរប្រចាំឆ្នាំរបស់ខ្លួន។
ឯកឧត្តម លីវ សុខុន ទីប្រឹក្សាក្រសួងព័ត៌មាន និងជាប្រធានមន្ទីរព័ត៌មានខេត្តសៀមរាប បញ្ជាក់ថា ដំណើរកម្សាន្តនាពេលនេះ មានទ្រង់ទ្រាយធំជាងបណ្ដាឆ្នាំមុនៗ ដោយមានការចូលរួមពីថ្នាក់ដឹកនាំមន្ទិរ មន្ត្រីក្រោមឱវាទ និងក្រុមគ្រួសាររបស់ពួកគេផងដែរ។ ទាំងនេះ បានបង្ហាញពីសាមគ្គីភាព និងកិច្ចសហការល្អរវាងថ្នាក់ដឹកនាំ មន្ត្រីនឹងមន្ត្រី នៃការិយាល័យទាំង៤ របស់មន្ទីរព័ត៌មានខេត្ត។
តាមរយៈលទ្ធផលការងារឆ្នាំ២០២០ ព្រមទាំងការលើកទឹកចិត្តដល់មន្ត្រីក្រោមឱវាទ ឯកឧត្តម លីវ សុខុន រំពឹងថា
ទិសដៅការងារបន្តឆ្នាំ២០២១ របស់មន្ទីរព័ត៌មានខេត្តសៀមរាប លើការងារផ្សព្វផ្សាយព័ត៌មានក្នុងខេត្ត និងក្នុងប្រទេស នឹងរឹតតែមានភាពសំបូរបែប លឿនរហ័ស ទុកចិត្តបាន សម្រាប់ប្រជាពលរដ្ឋ ស្ដាប់ និងទស្សនា ជាពិសេសការផ្សព្វផ្សាយ ក្នុងការទប់ស្កាត់ការរីករាលដាលនៃជំងឺកូវីដ-១៩។
គួររំលឹកថា ដំណើរកម្សាន្ត របស់មន្ទីរព័ត៌មានខេត្តសៀមរាបនាពេលកន្លងមក ត្រូវរៀបចំឡើងនៅរៀងរាល់ខែមករា ដោយលើកទី១ នៅឆ្នាំ២០១៨ ធ្វើដំណើរទៅកាន់ប្រាសាទព្រះវិហារ លើកទី២ ឆ្នាំ២០១៩ នៅខេត្តស្ទឹងត្រែង និងលើកទី៣ ឆ្នាំ២០២០ នៅខេត្តកោះកុង។ ដោយឡែក ដំណើរកម្សាន្តលើកទី៤ ឆ្នាំ២០២១នេះ ថ្នាក់ដឹកនាំ និងមន្ត្រីមន្ទីរព័ត៌មានទាំងអស់ បានទស្សនា រមណីយដ្ឋានក្នុងខេត្តរតនគិរី រួមមានបឹងយក្ខឡោម រមណីយដ្ឋានធម្មជាតិ ទឹកធ្លាក់៧ជាន់ រីឯក្នុងខេត្តមណ្ឌលគិរី រួមមាន រមណីយដ្ឋានទឹកជ្រោះប៊ូស្រា រមណីយដ្ឋានកែច្នៃភ្នំសាងស្នេហ៍ សហគមន៍ជនជាតិភាគតិចពូតាំង ទឹកធ្លាក់ឡេងអង ឡេងឃិន ទិដ្ឋភាពសមុទ្រឈើ ភ្នំដោះក្រមុំ ជាដើម។ល។
អត្ថបទ និងរូបភាព: យូ វង្ស
សម្រួលអត្ថបទ: សេង ផល្លី
