រដ្ឋមន្រ្តីក្រសួងសាធារណការនិងដឹកជញ្ជូន ជម្រុញឲ្យក្រុមការងារគ្រប់ផ្នែក គ្រប់ជំនាញ សហការគ្នាដោយឆន្ទៈទទួលខុសត្រូវខ្ពស់ ដើម្បីធានាឲ្យការស្ថាបនាផ្លូវ៣៨ខ្សែនៅក្រុងសៀមរាប មានគុណភាពខ្ពស់តាមបទដ្ឋានបច្ចេកទេស !
ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិនិត្យលើវឌ្ឍនភាពសាងសង់ផ្លូវទាំង៣៨ខែ្សក្នុងក្រុងសៀមរាប ខេត្តសៀមរាប នាព្រឹកថ្ងៃទី០៨ ខែមករា ឆ្នាំ២០២១នេះ ដោយមានការចូលរួមពីសំណាក់ថ្នាក់ដឹកនាំ មន្ត្រីជាន់ខ្ពស់ មន្ត្រីបច្ចេកទេស ក្រោមឱវាទក្រសួង និងភាគីពាក់ព័ន្ធផងដែរ។
កិច្ចប្រជុំនេះធ្វើឡើងក្នុងគោលបំណងស្ដាប់ការធ្វើបទបង្ហាញអំពីបញ្ហាប្រឈម និងសំណូមពរនានា របស់ក្រុមទទួលបន្ទុក សំដៅស្វែងរកដំណោះស្រាយ និងផ្ដល់អនុសាសន៍ដើម្បីធានាឱ្យការសាងសង់ផ្លូវទាំង៣៨ខែ្សនេះ មានគុណភាពខ្ពស់ស្របតាមបទដ្ឋានបច្ចេកទេស និងសៀវភៅបន្ទុក។
ព័ត៌មានជាតិ ថ្មីៗ
ឯកឧត្ដមទេសរដ្ឋមន្ត្រីបានមានប្រសាសន៍ថា ទាំងអស់គ្នាកំពុងនៅលើទូកតែមួយរួមគ្នា គឺទូករាជរដ្ឋាភិបាលកម្ពុជា ដឹកនាំដោយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដូចនេះត្រូវតែមានកិច្ចសហការគ្នាឱ្យបានរឹងមាំ ឆន្ទះខ្ពស់ មុតស្រួច ច្បាស់លាស់ ប្រសិទ្ធភាព និងមានគុណភាពខ្ពស់។
នៅក្នុងកិច្ចប្រជុំនោះ ក៏បានប្រកាសផងដែរ សមាសភាពថ្នាក់ដឹកនាំក្រសួងក្នុងមុខតំណែងជាអនុរដ្ឋលេខាធិការចំនួនបួនរូប ដែលទើបទទួលការតែងតាំងពីព្រះមហាក្សត្រ។ ថ្នាក់ដឹកនាំទាំងបួនរូបនោះ គឺជាអតីតមន្ត្រីរបស់ក្រសួងសាធារណការ និងដឹកជញ្ជូន មានចំណេះដឹង បទពិសោធន៍ និងស្នាដៃខ្ពស់ក្នុងការងារសាធារណការ។ សង្ឃឹមថា ផ្តើមចេញពីកិច្ចសហការរួមគ្នា លើការងារអភិវឌ្ឍហេដ្ឋារចនាសម្ព័ន្ធផ្លូវទាំង៣៨ខែ្សក្នុងក្រុងសៀមរាប នឹងសម្រេចតាមផែនការដែលបានគ្រោងទុក ប្រកបដោយគុណភាពខ្ពស់៕
