នៅទីបញ្ជាការយោធភូមិភាគទី៤ នាព្រឹកថ្ងៃទី៧ ខែមករា ឆ្នាំ២០២១ ឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤ លើកឡើងថា ក្រោយទទួលបានជ័យជម្នះលើរបបប្រល័យពូជសាសន៍ប៉ុលពត រយៈពេល៤២ឆ្នាំ បាននិងកំពុងដើរទៅរកការអភិវឌ្ឍប្រទេសជាតិ ជាមួយនិងសន្តិភាព លើសពីនោះដំណក់ប្រេងដំបូងរបស់កម្ពុជា គឺជាសមិទ្ធផលថ្មី ក្នុងតម្លៃប្រវត្តិសាស្រ្តជ័យជម្នះ៧មករា។
ក្នុងពិធីបើកម្មវិធីប្រកួតកីឡាដើម្បីសុខភាព និងជាមិត្តភាព រវាងបណ្តាអង្គភាពចំណុះបញ្ជាការដ្ឋានភូមិភាគទី៤ និងការដ្ឋានជួសជុលថែទាំផ្លូវជិត៤គីឡូម៉ែត្រ នៅក្នុងបរិវេណបញ្ជាការដ្ឋាន ឧត្តមសេនីយ៍ឯក ពៅ ហេង បានបញ្ជាក់ថា ព្រឹត្តិការណ៍កីឡាមិត្តភាពនេះ រៀបចំឡើងដើម្បីអបអរថ្ងៃជ័យជម្នះ ៧មករា ដែលប្រជាជនកម្ពុជាបានប្រសិទ្ធនាម ថាជាថ្ងៃកំណើតទី២របស់ខ្លួន។
៧មករា ១៩៧៩ – ៧មករា ២០២១ ឧត្តមសេនីយ៍ឯក ពៅ ហេង រំលឹកថា ៤២ឆ្នាំកន្លងមកនេះ កម្ពុជាបានពុះពារជម្នះរាល់ការលំបាក និងឧបសគ្គយ៉ាងច្រើនឥតគណនា ដោយឆ្លងកាត់ដំណាក់កាលប្រវត្តិសាស្រ្ត ដើម្បីការពារការរស់ឡើងវិញរបស់ប្រជាជាតិ ជាមួយនឹងការខិតខំប្រឹងប្រែងជម្នះនូវផលវិបាកដ៏ធ្ងន់ធ្ងរលើគ្រប់វិស័យ ដែលបន្សល់ទុកដោយសង្គ្រាម និងការបំផ្លិចបំផ្លាញដោយរបបប្រល័យពូជសាសន៍។ ក្នុងនោះដំណក់ប្រេងដំបូងរបស់កម្ពុជាកាលពីថ្ងៃទី២៩ ខែធ្នូ ឆ្នាំ២០២០ គឺជាពរជ័យសម្រាប់កម្ពុជា និងជាសក្ខីភាពសម្រាប់ការចង្អុលបង្ហាញទៅអនាគត អំពីទំហំគ្រឹះសេដ្ឋកិច្ចរឹងមាំនៃកម្ពុជា ស្របនឹងពាក្យស្លោកថា មាន៧មករា ទើបមានអ្វីៗទាំងអស់សម្រាប់ថ្ងៃនេះ។
អត្ថបទ និងរូបភាព: ងិន គឹមឡេង
សម្រួលអត្ថបទ: សេង ផល្លី
