នៅព្រឹកថ្ងៃទី០៤ ខែមករា ឆ្នាំ២០២១នេះ រដ្ឋបាលស្រុកសូទ្រនិគម សហការជាមួយសហភាពសហព័ន្ធយុវជនកម្ពុជា ស្រុកសូទ្រនិគម ដឹកនាំដោយលោក ម៉ក់ ប្រុស អភិបាលស្រុក , លោកស្រី ងិន មុំ ប្រធានក្រុមប្រឹក្សាស្រុក និង លោក លី សេងហួត ប្រធានសហភាពសហព័ន្ធយុវជនកម្ពុជាស្រុកសូទ្រនិគម បានដឹកនាំកម្លាំង ជាមន្រ្ដីរាជការ កងកម្លាំងប្រដាប់អាវុធ ក្រុមការងារសហភាពសហព័ន្ធយុវជនកម្ពុជាស្រុក បានរៀបចំធ្វើយុទ្ធនាការអប់រំផ្សព្វផ្សាយច្បាប់ ស្ដីពីចរាចរណ៍ផ្លវគោក ក្រោមប្រធានបទ សូទ្រនិគមស្រុកខ្ញុំ «មួកមួយជីវិតមួយ» ក្នុងគោលបំណង ដើម្បីពញ្ញាក់ស្មារតីដល់ប្រជាពលរដ្ឋនៅតាមដងផ្លូវ ជាពិសេសអ្នក ប្រើប្រាស់ទោចក្រយានយន្ដ ឲ្យយកចិត្តទុកដាក់ខ្ពស់ និងចូលរួមគោរពច្បាប់ចរាចរណ៍ផ្លូវគោក សំដៅចូលរួមទប់ស្កាត់ កាត់បន្ថយចំនួនគ្រោះថ្នាក់ និងចំនួនអ្នកស្លាប់ដែលបង្កដោយគ្រោះថ្នាក់ចរាចរណ៍ផ្លូវគោក ឲ្យនៅកម្រិតទាបបំផុតនៅក្នុងឆ្នាំថ្មី ឆ្នាំ២០២១នេះ ។
ក្នុងយុទ្ធនាការនេះ លោក ម៉ក់ ប្រុស អភិបាលស្រុក បានណែនាំដល់អ្នកចូលរួមទាំងអស់ ត្រូវពាក់មួកសុវត្ថិភាពរាល់ពេលធ្វើដំណើរ បន្ដពង្រឹងស្មារតីប្រុងប្រយ័ត្នក្នុងពេលបើកបរ និងត្រូវអនុវត្តឲ្យបានខ្ជាប់ខ្ជួនតាមច្បាប់ ស្ដីពីចរាចរណ៍ផ្លូវគោកទាំងអស់ ។
សូមបញ្ជាក់ថា តាមរបាយការណ៍របស់អនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប បានឲ្យដឹងថា នៅក្នុងឆ្នាំ២០២០នេះ មានករណីគ្រោះថ្នាក់ចរាចរណ៍កើតឡើងចំនួន៧១ករណី តិចជាងឆ្នាំ២០១៩ ចំនួន២៨ ករណីប៉ុន្តែករណីមនុស្សស្លាប់ច្រើនជាងឆ្នាំមុនចំនួន០៥ នាក់ ខណៈឆ្នាំ២០១៩ មនុស្សស្លាប់ដោយសារគ្រោះថ្នាក់ចរាចរណ៍មានចំនួន ៨១នាក់ ព្រមទាំងអ្នករបួសធ្ងន់ចំនួន៥៦នាក់ និង រងរបួសស្រាលចំនួន៧៣នាក់ ៕
