ក្នុងថ្ងៃឆ្លងឆ្នាំសកល២០២០-២០២១ ភ្ញៀវទេសចរមកកម្សាន្តក្នុងខេត្តសៀមរាប មានចំនួនសរុបជាង ២៥,០០០នាក់មានការធ្លាក់ចុះ ជាង៨៥ភាគរយ បើធៀបនឹងឆ្នាំ២០១៩ ដែលមានរហូតដល់ជាង ២៩០,០០០នាក់ នេះបើតាមរបាយការណ៍របស់មន្ទីរទេសចរណ៍ខេត្តសៀមរាប ។
ការថយចុះនៃចំនួនភ្ញៀវទេសចរ ក្នុងពិធីបុណ្យឆ្លងឆ្នាំសកលនៅឆ្នាំនេះ បានបង្ហាញនូវការយល់ដឹងរបស់ប្រជាពលរដ្ឋកម្ពុជា ក្នុងបរិបទនៃវិបត្តិជំងឺកូវីដ-១៩ ដែលស្របទៅនឹងសារអំពាវនាវរបស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានណែនាំ ដល់ប្រជាពលរដ្ឋទាំងអស់មានការប្រុងប្រយ័ត្នខ្ពស់ គោរពតាមវិធានសុវត្ថិភាពការពារការរីករាលដាលជំងឺកូវីដ-១៩ ជាពិសេសកម្មវិធីរាប់ថយក្រោយឆ្លងឆ្នាំសកលនៅកន្លែងកម្សាន្តពេលរាត្រីនានា។
ទន្ទឹមនោះ រដ្ឋបាលខេត្តសៀមរាប បានរៀបចំក្រុមការងារត្រួតពិនិត្យ តាមដានការអនុវត្តវិធានសុវត្ថិភាពទេសចរណ៍ សម្រាប់មូលដ្ឋានអាជីវកម្ម ក្នុងខេត្តសៀមរាប ចំនួន២គោលដៅសំខាន់ រួមមានតំបន់ផាប់ស្ទ្រីត និងអង្គរ-ឃ្យុងយូ។ ក្នុងនោះក្រុមការងារបាន ធ្វើការផ្សព្វផ្សាយដល់អាជីវករលក់ដូរ ម្ចាស់ភោជនីយដ្ឋាន និងភ្នាក់ងារផ្ដល់សេវាទេសចរណ៍នៅតាមតំបន់គោលដៅទាំងពីរ ត្រូវធានា និងអនុវត្តឲ្យបាននូវវិធានសុវត្ថិភាពការពារទប់ស្កាត់ជំងឺកូវីដ-១៩ នៅតាមទីតាំងរបស់ខ្លួន។
តាមការពិនិត្យជាក់ស្ដែងនៅតំបន់អង្គរ-ឃ្យុងយូ លោក ពៅ ពិសិដ្ឋ អភិបាលរងខេត្ត និងប្រធានក្រុមការងារត្រួតពិនិត្យ តាមដានការអនុវត្តវិធានសុវត្ថិភាពទេសចរណ៍ សម្រាប់មូលដ្ឋានអាជីវកម្ម ក្នុងខេត្តសៀមរាប តំបន់អង្គរ-ឃ្យុងយូ បង្ហាញថា អាជ្ញាធរខេត្តសង្កេតឃើញថា អាជីវករ រួមនិងប្រជាពលរដ្ឋចូលមកតំបន់នេះ ភាគច្រើនបានចូលរួម និងគោរពតាមការណែនាំរបស់ក្រុមការងារនៅតាមច្រកនីមួយៗ។
គួរជម្រាបដែរ ទោះបីព្រឹត្តិការណ៍សហគមន៍ ២៨វិច្ឆិកា ត្រូវបានបិទបញ្ចប់ដោយប្រមុខរាជរដ្ឋាភិបាល ប៉ុន្តែរាជរដ្ឋាភិបាល ក៏នៅតែបន្ត ណែនាំដល់អាជ្ញាធររាជធានី-ខេត្តទាំងអស់ បន្តអនុវត្តន៍ការប្រយុទ្ធប្រឆាំងនឹងជំងឺកូវីដ-១៩ ប្រកបដោយស្មារតីយកចិត្តទុកដាក់ខ្ពស់។ ក្នុងនោះវិធានសុវត្ថិភាព ៣ការពារ ដែលចាំបាច់ត្រូវគោរព រួមមាន៖ ពាក់ម៉ាសការពារ លាងសម្អាតដៃ និងរក្សាគម្លាតសុវត្ថិភាពសង្គម។ បន្ថែមពីនេះ ការអនុវត្ត ៣កុំ រួមមាន៖ កុំទៅកន្លែងប្រមូលផ្ដុំមានមនុស្សច្រើន កុំទៅកន្លែងបិទជិតប្រើប្រាស់ម៉ាស៊ីនត្រជាក់ និងកុំស្និទ្ធស្នាល អោប រឺចាប់ដៃជាដើម និងបន្ថែមពីលើសនោះ ត្រូវអនុវត្តន៍ការធ្វើចត្តាឡីស័កឱ្យបានត្រឹមត្រូវ។
អត្ថបទ៖ លោក សេង ផល្លី
រូបភាព៖ លោក យូ វង្ស និងលោក ស៊ាន សុផាត
