នៅព្រឹកថ្ងៃទី០២ ខែមករា ឆ្នាំ២០២១ នៅមន្ទីរព័ត៌មានខេត្តសៀមរាប មានរៀបចំ កិច្ចប្រជុំបូកសរុបលទ្ធផលការងារប្រចាំឆ្នាំ២០២០ និងលើកទិសដៅអនុវត្តបន្តឆ្នាំ ២០២១ របស់មន្ទីរព័ត៌មានខេត្ត ក្រោមអធិបតីភាព ឯកឧត្តម លីវ សុខុន ទីប្រឹក្សាក្រសួងព័ត៌មាន និងជាប្រធានមន្ទីរព័ត៌មានខេត្តសៀមរាប។
ថ្លែងក្នុងកិច្ចប្រជុំនោះ ឯកឧត្តម លីវ សុខុន លើកឡើងថាទោះបីវិបត្តិជំងឺកូវីដ-១៩ ក្នុងឆ្នាំ២០២០ បានបង្កឲ្យមានបញ្ហាប្រឈមដល់ការចុះយកព័ត៌មាន ប៉ុន្តែមន្ត្រីព័ត៌មានរបស់មន្ទីរ បានចុះទៅដល់ទីតាំងផ្ទាល់ដូចជា នៅតាមព្រំដែនកម្ពុជា-ថៃ មន្ទីរពេទ្យ មណ្ឌលចត្តាឡីស័កនៅតាមបណ្ដាស្រុកជាដើម។ កិច្ចខិតខំប្រឹងប្រែងនេះ បាននាំយកនូវព័ត៌មានយ៉ាងសម្បូរបែប សម្រាប់ធ្វើការផ្សព្វផ្សាយជូនប្រជាពលរដ្ឋ បានដឹងកាន់តែទូលំទូលាយ ពីវិធានការទប់ស្កាត់ការរីករាលដាលជំងឺកូវីដ-១៩ របស់រាជរដ្ឋាភិបាល ក៏ដូចជាអាជ្ញាធរខេត្តសៀមរាប។ ដោយឡែក មន្ត្រីនៅតាមការិយាល័យទាំង៤របស់មន្ទីរ ក៏បានចូលរួមយ៉ាងសកម្ម ដើម្បីជួយសម្រួល ដល់ការចុះយកព័ត៌មាន និងផលិតព័ត៌មានក្នុងខេត្ត ឲ្យបានទាន់ពេលវេលាផងដែរ។
តាមរបាយការណ៍របស់ មន្ទីរព័ត៌មានខេត្តសៀមរាប ក្នុងឆ្នាំ២០២០ មន្ទីរបាន សហការជាមួយអង្គការដៃគូ រៀបចំបើកវគ្គបណ្ដុះបណ្ដាល ពង្រឹងសមត្ថភាព និងវិជ្ជាជីវៈអ្នកសារព័ត៌មានឯកជន ក្នុងខេត្ត ចំនួន ០៣លើក និងមានសិក្ខាកាមចូលរួមសរុប ៦៩នាក់។
ក្នុងនោះ ឯកឧត្តម លីវ សុខុន ក៏បានគូសបញ្ជាក់ដែរថា ការគ្រប់គ្រងព័ត៌មានមិនពិតនៅថ្នាក់ក្រោមជាតិ ក៏ជាបញ្ហាប្រឈមខ្លាំងផងដែរ ខណៈអ្នកសារព័ត៌មានមួយចំនួន សរសេរព័ត៌មានមិនគ្រប់ជ្រុងជ្រោយ និងខ្វះវិជ្ជាជីវ:។ ដោយឡែក ប្រជាពលរដ្ឋមួយចំនួន បានប្រើប្រាស់បណ្ដាញសង្គមនានា បញ្ចេញមតិខ្វះការពិចារណា ក៏ដូចជាចែករំលែកព័ត៌មានដែលគ្មានប្រភពច្បាស់លាស់។
អត្ថបទ: លោក សេង ផល្លី
