នៅព្រឹកថ្ងៃទី៣១ ខែធ្នូ ឆ្នាំ២០២០ ឯកឧត្តម ទៀ សីហា អភិបាលខេត្តសៀមរាប រួមនឹងថ្នាក់ដឹកនាំ និងតំណាងស្ថាប័ន មន្ទីរ អង្គភាពពាក់ព័ន្ធ បានចុះពិនិត្យស្ថានភាពការតាំងទីលំនៅថ្មី របស់ប្រជាពលរដ្ឋដែលស្ម័គ្រចិត្តរុះរើលំនៅដ្ឋាន នៅតាមមាត់ស្ទឹងសៀមរាប មកកាន់ភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី ខេត្តសៀមរាប ដែលរៀបចំ ដោយរដ្ឋបាលខេត្ត ។
តាមរយៈការចុះពិនិត្យ និងសួរសុខទុក្ខក្នុងឱកាសនេះ ឯកឧត្តមអភិបាលខេត្ត បង្ហាញថា ក្នុងចំណោមប្រជាពលរដ្ឋដែលស្ម័គ្រចិត្តមករស់នៅលើដីលំនៅដ្ឋានថ្មីសរុប ៤៣០គ្រួសារ មានចំនួន៧៧គ្រួសារហើយ ដែលបានមកតាំងទីលំនៅជាក់ស្ដែង បន្ទាប់ពីការចាប់ឆ្នោតជាសាធារណៈ និងបោះបង្គោលព្រំដី ដែលរៀបចំដោយអាជ្ញាធរខេត្ត។
ឯកឧត្តមអភិបាលខេត្ត បញ្ជាក់ថា ការចាប់ផ្ដើមមករស់នៅលើទីតាំងថ្មីនេះ ពិតជាពុំងាយស្រួលដូចទីតាំងចាស់ដែលប្រជាពលរដ្ឋធ្លាប់បានរស់នៅជាច្រើនឆ្នាំកន្លងមកនោះទេ។ ប៉ុន្តែការងារដែលអាជ្ញាធរខេត្ត ត្រូវអនុវត្ត គឺការអភិវឌ្ឍន៍ហេដ្ឋារចនាសម្ព័ន្ធ និងសោភណ្ឌភាពក្នុងក្រុង ឲ្យសាកសមជាទីក្រុងទេសចរណ៍ដ៏ទាក់ទាញ របស់ព្រះរាជាណាចក្រកម្ពុជា។ ទន្ទឹមនោះ អាជ្ញាធរខេត្ត ក៏បានផ្ដល់នូវបណ្ណកម្មសិទ្ធកាន់កាប់ដីស្របច្បាប់ ដែលពេលកន្លងមកបងប្អូនប្រជាពលរដ្ឋមិនធ្លាប់ទទួលបានលើទីតាំងចាស់។
ឯកឧត្តមអភិបាលខេត្ត ក៏បានគូសបញ្ជាក់ផងដែរថា រាល់បញ្ហាប្រឈមចាំបាច់ របស់ប្រជាពលរដ្ឋលើទីតាំងថ្មីនេះ រដ្ឋបាលខេត្ត បាននឹងកំពុងដោះស្រាយជាបណ្ដើរៗហើយ រួមមាន ការសាងសង់បង្គន់អនាម័យ អណ្ដូងទឹក ភ្លើងបំភ្លឺសាធារណៈ ការតបណ្ដាញចរន្តអគ្គិសនីរបស់រដ្ឋ ចូលមកដីលំនៅដ្ឋានជាដើម។ ក្នុងនោះហេដ្ឋារចនាសម្ព័ន្ធ ដែលមានស្រាប់ក្នុងមូលដ្ឋាននេះ រួមមាន មណ្ឌលសុខភាព សាលាបឋមសិក្សាចាប់ថ្នាក់ទី១ ដល់ទី៦ និងមានគម្រោងបង្កើតទៅជាអនុវិទ្យាល័យនាពេលខាងមុខ។ ចំពោះការផ្ដល់សេវាសាធារណៈនានា លោកអភិបាលក្រុងសៀមរាប រួមនិងលោកអភិបាលស្រុកបន្ទាយស្រី និងសហការដោះស្រាយជូនប្រជាពលរដ្ឋទៅតាមនីតិវិធី។
ក្នុងឱកាសនោះ អាជ្ញាធរខេត្ត បាននាំយកអំណោយចែកជូនប្រជាពលរដ្ឋចំនួន ៧៧គ្រួសារដែលបានមកតាំងទីលំនៅជាក់ស្ដែង ដោយក្នុងមួយគ្រួសារ រដ្ឋបាលខេត្តចែកជូន៖ អង្ករ ២៥គ.ក្រ មី១កេស ត្រីខកំប៉ុង ១យូរ ទឹកត្រី ១យួរ ទឹកស៊ីអ៊ីវ ១យួរ មុងជ្រលក់ថ្នាំ ១កញ្ចប់ និងភួយ ១កញ្ចប់។ បន្ថែមពីនេះ សាខាកាកបាទក្រហមកម្ពុជាខេត្តសៀមរាប ក៏បាននាំយកអំណោយចែកជូនប្រជាពលរដ្ឋខាងលើ ដោយក្នុងមួយគ្រួសារៗ ទទួលបាន៖
អង្ករ ៣០គ.ក្រ មី១កេស ត្រីខកំប៉ុង ១យូរ ទឹកត្រី ១យួរ ធុងទឹកមួយចំណុះ ៤៥លីត្រ អំបិល ស័ង្កសី ២២សន្លឹក ១គ.ក្រ និងប៊ីចេង ៥០០ក្រាម។
សូមជម្រាបថា ប្រជាពលរដ្ឋសរុបចំនួន ៤៣០គ្រួសារនេះ បានស្ម័គ្រចិត្តរុះរើលំនៅដ្ឋាននៅតាមដងស្ទឹងសៀមរាប ចាប់ពីចំណុចស្ពាននាគ ដល់ស្ពានអង្គរ ក្រុងសៀមរាប។
ដីលំនៅដ្ឋានថ្មីនេះ ជាគោលនយោបាយ និងមានការសម្របសម្រួលពីអាជ្ញាធរខេត្តសៀមរាប ដោយក្នុង១គ្រួសារទទួលបានដីលំនៅដ្ឋាន ២០ម៉ែត្រ គុណនិង ៣០ម៉ែត្រ លើផ្ទៃដីសរុប៨៥ហិចតា។ ទីតាំងនេះ មានចម្ងាយប្រមាណជា២២គីឡូម៉ែត្រ ពីក្រុងសៀមរាប៕ អត្ថបទ និងរូបភាព៖ លោក យូ វង្ស
កែសម្រួលដោយ៖ លោក សេង ផល្លី!!! ។
