លោក យិត ចាន់ដារដ្ឋ អគ្គនាយករង នៃអាជ្ញាធរជាតិអប្សា មានប្រសាសន៍ថា គិតមកទល់ថ្ងៃទី២៩ ខែធ្នូ ឆ្នាំ២០២០នេះ ការរៀបចំជួសជុលកែលម្អផ្លូវដោយការចាក់អ៊ុតកៅស៊ូ ការរៀបចំចិញ្ចើមផ្លូវ និងសួនផ្កានៅមុខប្រាសាទអង្គរវត្ត បានរួចរាល់ហើយ បើទោះបីជាមានករណីការឆ្លងរាតត្បាតជាសកលជំងឺកូវីដ១៩យ៉ាងណាក្ដី តែការអភិវឌ្ឍក្នុងតំបន់រមណីយដ្ឋានអង្គរ ពិសេសនៅបរិវេណខាងមុខប្រាសាទអង្គរវត្ត មានការរីកចម្រើនទៅមុខជានិច្ច ហើយនៅពេលនេះមានភាពបៃតងគួរជាទីទស្សនាសម្រាប់ទេសចរគ្រប់រូប ។
លោក យិត ចាន់ដារដ្ឋ មានប្រសាសន៍ទៀតថា នៅខាងមុខអង្គរវត្ដ នឹងលែងមានត្រពាំងសេស ហើយទីធ្លានិងប្រាសាទបាយក្អែកខាងជើងប៉ាកវី នឹងត្រូវរៀបចំឲ្យបានស្អាត និងបញ្ចប់នៅដើមឆ្នាំ២០២១នេះ ដូច្នេះតាមរយៈនេះ សូមថ្លែងអំណរគុណដល់អាជីវករដែលបានស្ម័គ្រចិត្ដរុះរើសំណងរបស់ពួកគាត់ ដែលបង្ហាញថា ពួកគាត់បានយល់ពីកិច្ចការអភិរក្ស និងអភិវឌ្ឍន៍ក្នុងតំបន់អង្គរ និងបានស្ម័គ្រចិត្តចូលរួមដោយឆន្ទៈពិតៗជាមួយអាជ្ញាធរជាតិអប្សរាក្នុងការរុះរើភោជនីយដ្ឋាន ដើម្បីរៀបចំទីលានបដិសណ្ឋារកិច្ចមុខអង្គរវត្តបានល្អប្រសើរ សមជាប្រជាជាតិមួយដែលស្រឡាញ់មរតកដូនតា មានសណ្តាប់ធ្នាប់ និងមានការយល់ដឹងខ្ពស់ចំពោះបរិស្ថាន៕
អត្ថបទ និង រូបថត ៖ លោក ឈិត សាវី
កែសម្រួលអត្ថបទ ៖ លោក លីវ សាន្ត
ព័ត៌មានជាតិ ថ្មីៗ
