នៅថ្ងៃទី២៩ ខែធ្នូ ឆ្នាំ២០២០ គឺជាថ្ងៃដែលព្រះរាជាណាចក្រកម្ពុជា មានមោទនភាពចំពោះដំណក់ប្រេងលើកដំបូងរបស់ខ្លួន ស្របគ្នានឹងថ្ងៃខួបលើកទី២២ នៃការបញ្ចប់សង្រ្គាម នាំមកនូវការឯកភាពជាតិ ឯកភាពទឹកដី តាមរយៈនយោបាយឈ្នះ-ឈ្នះ ២៩ធ្នូ ១៩៩៨ – ២៩ធ្នូ ២០២០) នេះបើតាមប្រសាសន៍សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្តី្រនៃព្រះរាជាណាចក្រកម្ពុជា បានថ្លែងសារពិសេសពាក់ព័ន្ធនឹងព្រឹត្តិការណ៍សហគមន៍ ២៨ វិច្ឆិកា និងសមិទ្ធផលកើតពីនយោបាយ ឈ្នះ-ឈ្នះ នាព្រឹកថ្ងៃដដែលនេះ។
សម្តេចតេជោ មានប្រសាសន៍ថា ដំណក់ប្រេងលើកដំបូងនេះ ជាពរជ័យសម្រាប់ប្រទេសកម្ពុជា ហើយនេះជាការចាប់ផ្ដើមដ៏សំខាន់នេះ នឹងជួយដល់កម្ពុជា ឆ្ពោះទៅបង្កើតបាននូវសមត្ថភាពជាតិ នៃឧស្សាហកម្មប្រេងកាត ឧស្ម័ន និងថាមពលនៅកម្ពុជា។ ក្នុងនោះដែរ ការចាប់ផ្ដើមនៃផលិតកម្មនេះ ក៏នឹងក្លាយជាប្រភពចំណូលថវិកាជាតិ ផលសេដ្ឋកិច្ច នៃការបង្កើតឧស្សាហកម្មដ៏សំបូរបែប ក្នុងវិស័យប្រេងកាត និងផលប្រយោជន៍ជាតិជាច្រើនទៀត។
គួរជម្រាបដែរថា នយោបាយ ឈ្នះ ឈ្នះ ដែលបានដាក់ចេញ មានបីចំណុចសំខាន់ៗ រួមមាន ៖ ទី១. ការធានានូវសុវត្ថិភាពខាង ផ្នែកសន្តិសុខផ្ទាល់ខ្លួនរបស់បុគ្គល និងគ្រួសារ ដែលស្ម័គ្រចិត្តបញ្ចប់សង្គ្រាម និងការប្រយុទ្ធ ហើយវិលត្រឡប់មករួមរស់នៅក្នុងចរន្តគោលនៃសង្គមជាតិវិញ។ ទី២. ការធានានូវសុវត្ថិភាពខាងផ្នែកអាជីព ដោយ ផ្តល់ជូនអ្នកទាំងនោះនូវលទ្ធភាពគ្រប់គ្រាន់ ក្នុងការបន្តមុខរបរ និងការរកស៊ីចិញ្ចឹមជីវិត ដែលគេធ្លាប់មាន កន្លងមក និងទី៣. ការធានានូវសុវត្ថិភាពខាងផ្នែកកម្មសិទ្ធិ ដែលគេធ្លាប់មាន និងកាន់កាប់ក្នុងរយៈពេល កន្លងមក ដោយគ្មានការដកហូត ឬ រុះរើ។ នយោបាយឈ្នះ ឈ្នះ បានបន្តរហូតមកដល់បច្ចុប្បន្នធ្វើឱ្យប្រទេសជាតិមានសន្តិភាពពេញបរិបូរណ៍ មានការអភិវឌ្ឍ រីកចម្រើន និងជាពិសេស ពលរដ្ឋរស់នៅក្នុងភាព សុខសាន្ត៕
អត្ថបទ៖ លោក ស៊ាន សុផាត
កែសម្រួលដោយ៖ លោក សេង ផល្លី
