គិតត្រឹមដំណាច់ត្រីមាសទី៣ ក្នុងឆ្នាំ២០២០នេះ កម្មវិធីថ្នាក់ជាតិ ហៅថាអាស្ប៉ាយ (ASPIRE) ដែលជួយកសិករ ក្នុងការដាំដុះតាមបែបបច្ចេកទេសកសិកម្មថ្មី ធន់នឹងការប្រែប្រួលអាកាសធាតុ បានផ្ដល់ផ្ទះសំណាញ់ សរុបចំនួន២៨ផ្ទះសំណាញ់ដល់កសិករដាំបន្លែ ក្នុងខេត្តសៀមរាប នេះបើតាមការឲ្យដឹងពី លោក ប៉ែន ប៊ុនធឿន អនុប្រធានមន្ទីរកសិកម្មរុក្ខាប្រមាញ់ និងនេសាទខេត្តសៀមរាប នៅថ្ងៃទី២៩ ខែធ្នូ ឆ្នាំ២០២០។
លោក ប៉ែន ប៊ុនធឿន បន្តថា៖ កម្មវិធី អាស្ប៉ាយ (ASPIRE) ជួយកសិករ មិនប្រកាន់មាន ឬក្រទេ សំខាន់គាត់ស្ថិតក្នុងឃុំគោលដៅនៃគម្រោង។ ចាប់ពីអនុវត្តន៍កម្មវិធីនេះក្នុងខេត្តសៀមរាប នៅឆ្នាំ២០១៩ រហូតដល់បច្ចុប្បន្ន កម្មវិធីនេះ បានបន្តជួយដល់កសិករនៃក្រុង-ស្រុកចំនួន១១ ក្នុងចំណោម១២ក្រុង-ស្រុក លើកលែងតែស្រុកស្រីស្នំ ដែលកម្មវិធីនេះ ពុំទាន់ទៅដល់។ ទិសដៅបន្តមន្ទីរកសិកម្មខេត្ត គ្រោងនឹងស្នើដល់ រាជរដ្ឋាភិបាល និងម្ចាស់ជំនួយ ដើម្បីដាក់បញ្ចូលក្រុង-ស្រុកទាំង១២។
កសិករ ដាំបន្លែ ស្ថិតក្នុងស្រុកពួក និងស្រុកសូទ្រនិគម លើកឡើងថា ចាប់ពីដាំបន្លែក្នុងផ្ទះសំណាញ់មក ពួកគាត់កត់សំគាល់ឃើញថា ការដាំនេះចំណេញទាំងពលកម្ម ទាំងពេលវេលា សន្សំសំចៃទឹក និងជី ហើយអាចដាំបានគ្រប់រដូវ គ្រប់ដំណាំឱ្យតែយើងចង់ដាំ។
លើសពីនោះ មន្ទីរកសិកម្មខេត្ត ក៏បានសហការជាមួយអង្គការពន្លឺកុមារ តាមរយៈកិច្ចសន្យាជួលបុគ្គលិក សាងសង់ផ្ទះសំណាញ់ចំនួន១៦ខ្នង ដែលមានចូលរួមបដិភាគថវិកា ពីកសិករ រូមមាននៅស្រុកជីក្រែង ស្រុកបន្ទាយស្រី និងស្រុកស្វាយលើ។
អត្ថបទ និងរូបភាព ៖ លោក យូ វង្ស
កែសម្រួលដោយ៖ លោក សេង ផល្លី
