នៅថ្ងៃទី២៥ ខែធ្នូ ឆ្នាំ២០២០ មន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ប្រគល់គ្រឿងចក្រខ្នាតតូចចំនួន៩គ្រឿង ដល់បណ្តុំកសិករផលិតបន្លែ ចំនួន៩បណ្ដុំ ស្មើនឹង២៥០គ្រួសារ នៃក្រុង-ស្រុក ចំនួន៦ ដើម្បីប្រើប្រាស់ក្នុងការដាំដុះ នៅក្នុងបណ្ដុំអាជីវកម្មរបស់ខ្លួន។
លោក ទា គឹមសុទ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បង្ហាញថា គ្រឿងចក្រខ្នាតតូចទាំងនេះ ទទួលបានពី កម្មវិធីផ្សព្វផ្សាយបច្ចេកទេសកសិកម្មថ្មី ដែលធន់នឹងការប្រែប្រួលអាកាសធាតុ ឬហៅថា អាស្ប៉ាយ (ASPIRE) ដើម្បីគាំទ្រដល់ដំណើរការដាំដុះតាមលក្ខណៈទំនើប កាត់បន្ថយការប្រើកម្លាំងពលកម្ម សន្សំទុន និងរក្សាសង្វាក់ផលិតឱ្យមាននិរន្តរភាព សម្រាប់ផ្គត់ផ្គង់លើទីផ្សារ។
លោកប្រធានមន្ទីរ បញ្ចាក់ថា គ្រឿងចក្រដែលបានប្រគល់ជូនដល់បណ្ដុំកសិករនីមួយៗ គឺជាសម្បត្តិរួម ដែលទាមទារឲ្យមានការទទួលខុសត្រូវក្នុងការប្រើប្រាស់ បានយូរអង្វែង ពុំមែនជាសម្បត្តិផ្ដាច់មុខរបស់បុគ្គលណាមួយឡើយ។
ព័ត៌មានជាតិ ថ្មីៗ
គួរជម្រាបថា កម្មវិធីអាស្ប៉ាយ (ASPIRE) អាស្ប៉ាយជាកម្មវិធីថ្នាក់ជាតិមួយ ទទួលហិរញ្ញប្បទាន ពី អង្គការមូលនិធិអន្តរជាតិសំរាប់អភិវឌ្ឍន៍វិស័យកសិកម្ម (IFAD) និងថវិកាបដិភាគរបស់រាជរដ្ឋាភិបាលកម្ពុជា ដែលគាំទ្រដល់ កសិករ កែលម្អ ច្នៃប្រឌិត និងបង្កើតគំនិតថ្មីៗក្នុងវិស័យកសិកម្ម ព្រមទាំងផ្លាស់ប្ដូរពីការផលិតសម្រាប់ចិញ្ចឹមជីវិត ទៅជាសហគ្រិនភាព។ សម្រាប់ខេត្តសៀមរាប បានចាប់ផ្តើមអនុវត្តន៍កម្មវិធីនេះនៅឆ្នាំ២០១៩ បច្ចុប្បន្នសហគមន៍កសិកម្ម ដែលបានចុះបញ្ជីនៅមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប មានសរុបចំនួន៥៥សហគមន៍ និងបានចងក្រងក្រុមគ្រួសារកសិករ ជាបណ្តុំអាជីវកម្មកសិកម្ម មានដូចជាបណ្តុំអាជីវកម្មស្រូវ បណ្តុំអាជីវកម្មបន្លែ បណ្តុំអាជីវកម្មចិញ្ចឹមមាន់ បណ្តុំអាជីវកម្មចិញ្ចឹមត្រី។ល។
អត្ថបទ និងរូបភាព ៖ លោក យូ វង្ស
កែសម្រួលដោយ៖ លោក សេង ផល្លី
