សៀមរាប៖ មិនដល់មួយសប្ដាហ៍ទៀតទេ បវេសនកាលឆ្នាំសិក្សា២០២០-២០២១ សម្រាប់សាលារៀនរបស់រដ្ឋ នឹងបើកដំណើរការ ពោលគឺថ្ងៃទី១១ ខែមករា ឆ្នាំ២០២១ នេះបើតាមការបញ្ជាក់ ឯកឧត្តម រស់ សុវាចា អគ្គលេខាធិការ និងជាអ្នកនាំពាក្យក្រសួងអប់រំ យុវជន និងកីឡា។
ឯកឧត្តម រស់ សុវាចា បញ្ជាក់ថា បើទោះបីជាប៉ុន្មានថ្ងៃចុងក្រោយនេះ ក្រសួងសុខាភិបាល បានជូនដំណឹងថា រកឃើញវិជ្ជមានជំងឺកូវីដ-១៩ ទៅលើប្រជាពលរដ្ឋខ្មែរមកពីបរទេសក្ដី ក្រសួងអប់រំ នឹងនៅតែរក្សាការសម្រេចនេះដដែល។ ប៉ុន្តែអំឡុងពេល បើកសាលារៀនឡើងវិញនេះ ក្រសួងបានតម្រូវឱ្យសាលាទំាងអស់ ត្រូវអនុវត្តន៍យ៉ាងខ្ជាប់ខ្ជួននូវវិធានសុវត្ថិភាពសុខាភិបាល ដូចជា ពាក់ម៉ាស់ លាងសម្អាតដៃនឹង ជែល អាកុល ឬកន្លែងលាងដៃសម្លាប់មេរោគ និងចែកវេនសិក្សារបស់សិស្ស ដើម្បីរក្សាគម្លាតជាដើម។
ឯកឧត្តម បន្ថែមថាចំពោះសាលាមួយចំនួនតូច ដែលត្រូវបានយកធ្វើជាមណ្ឌលចត្តាឡីស័ក ត្រូវមានការសម្អាត សម្លាប់មេរោគឱ្យបានរួចរាល់ តាមលក្ខណៈបច្ចេកទេសសុខាភិបាល និងបន្តអនុវត្តគោលការណ៍ប្រតិបត្តិស្តង់ដារ SOP របស់ក្រសួងអប់រំ យុវជន និងកីឡា មុននឹងបើកបវេសនកាលឆ្នាំសិក្សា២០២០-២០២១នេះ។
សូមរំលឹកថា ការបើកបវេសនកាលឆ្នាំសិក្សា ២០២០-២០២១ នៃគ្រឹះស្ថានសិក្សាចំណេះទូទៅ របស់រដ្ឋនេះ ធ្វើឡើងបន្ទាប់ពី ក្រសួងបានអនុញ្ញាត ឱ្យគ្រឹះស្ថានសិក្សាឯកជន បើកដំណើរការចូលរៀនឡើងវិញ កាលពីថ្ងៃទី២៩ ខែធ្នូ ឆ្នាំ២០២០កន្លងទៅ។
អត្ថបទ៖ វិទ្យុជាតិកម្ពុជា
រូបភាព និងកែសម្រួលអត្ថបទ៖ លោក សេង ផល្លី
