នៅថ្ងៃទី២៣ ខែមករា ឆ្នាំ២០២១ម្សិលមិញនេះ ក្រុមសមាគមសហគ្រិនវ័យក្មេងកម្ពុជា ប្រមាណជាង៥០នាក់ បានជួបជុំគ្នាក្នុងសិក្សាស្វែងយល់ពីលទ្ធភាពទទួលនិងកម្ចីប្រាក់ពីធនាគារនិងគ្រិះស្ថានមីក្រូហិរញ្ញវត្ថុ ដើម្បីងាយស្រួលក្នុងការដាក់ពាក្យស្នើសុំប្រាក់កម្ចី និងទទួលប្រាក់កម្ចី សម្រាប់យកធ្វើសហគ្រាស ធុនមីក្រូតូច និងមធ្យម។សិក្ខាសាលានេះធ្វើឡើងនៅខេត្ដសៀមរាប កាលពីល្ងាចថ្ងៃទី២៣ខែមករាឆ្នាំ២០២១នេះ ដោយមានតំណាងធនាគារក្នុងខេត្តសៀមរាបផងដែរ។
លោក ឡាយ គីមសួរ ប្រធានសមាគមសហគ្រិនវ័យក្មេងកម្ពុជា សាខាខេត្តសៀមរាប បានមានមានប្រសាសន៍ថា ជាការឆ្លើយតបទៅនឹងយុទ្ធសាស្រ្តឆ្នាំ២០២៥ និង ស្រោចស្រង់អាជីវកម្មដែលកំពុងជួបប្រទះបញ្ហា ក្នុងអំឡុងពេលការរិករាលដាលនៃជម្ងឺConvid-19 សមាគមសហគ្រិនវ័យក្មេងកម្ពុជា ក៏បានផលិតចេញនូវកូនសៀវភៅមគ្គុទេសធនាគារ ដែលក្នុងកូនសៀវភៅនេះបានបង្ហាញពីអត្រាការប្រាក់កម្ចី ឯកសារតម្រូវការក្នុងការដាក់កម្ចី និងលក្ខខណ្ឌនានាដែលចាំបាច់ និងព័ត៌មានច្រើនទៀតសម្រាប់សហគ្រិនក្នុងការស្វែងយល់ និងធ្វើការជ្រើសរើសស្ថាប័នហិរញ្ញវត្ថុណាមួយដែលត្រូវនឹងតម្រូវការ និងលក្ខខណ្ឌរបស់ខ្លួន។
លោកបានបន្ដថា កម្មវិធីលទ្ធភាពទទួលបានហិរញ្ញវត្ថុ សម្រាប់សហគ្រាស ធុនមីក្រូ តូច និងមធ្យម (Access to Finance Program for MSMEs) គឺជាកម្មវិធីបង្កើតឡើងដោយសមាគមសហគ្រិនវ័យក្មេងកម្ពុជា (YEAC) ដោយមានការសហការឧបត្ថម្ភថវិកា ពីសហគ្រិនខ្មែរ និងគម្រោងមូលនិធិទឹកប្រាក់ចំនួន១លានដុល្លាររបស់ក្រុមហ៊ុនស្មាត ដើម្បីប្រឆាំងវីរុសកូវីដ១៩ ក្នុងគោលបំណងផ្តល់ជំនួយបច្ចេកទេស ទៅកាន់សហគ្រាសធុនមីក្រូតូចនិងមធ្យមក្នុងការដាក់ពាក្យកម្ចីទៅស្ថាប័នហិរញ្ញវត្ថុនានា។
សូមជម្រាបថា កិច្ចពិភាក្សានេះត្រូវបានរៀបចំឡើងដោយមានការធ្វើបទបង្ហាញពីមន្រ្តីកម្មវិធី កញ្ញា នាង សុវ៉ាតថា និង អ្នកតំណាងមកពីធនាគារវឌ្ឍនៈ អាស៊ី ចំកាត់ (ABA) ធនាគារព្រីនស៍ និង ធនាគារស្ថាបនា ភីអិលស៊ីផងដែរ។ វាគ្មិនកិត្តិយសដែលបានចែករំលែកផ្សព្វផ្សាយពីខ្លឹមសារ និងអត្ថប្រយោជន៍នៃកម្មវិធីនេះ រួមមានរបៀប និង សកម្មភាពដើម្បីសហគ្រាសធុនមីក្រូ តូច និងមធ្យមក្នុងការដាក់ពាក្យស្នើសុំប្រាក់កម្ចី ដើម្បីស្នើសុំកម្ចី ព្រមទាំង កញ្ចប់សេវាកម្មនានាជូនដល់អ្នកចូលរួមផងដែរ។សហគ្រាសធុនមីក្រូ តូច និងមធ្យមចូលរួមនឹងទទួលបានការវាយតម្លៃជាមុន ក្នុងការដាក់ពាក្យសុំប្រាក់កម្ចី ជំនួយរៀបចំឯកសារក្នុងការដាក់ស្នើសុំប្រាក់កម្ចី ជាពិសេសដោយមានការសហការ ពីក្រុមហ៊ុនសហគ្រាសធុនមីក្រូតូច និងមធ្យម នឹងទទួលបានជំនួយបច្ចេកទេស ក្នុងការអភិវឌ្ឍន៍ប្រព័ន្ធហិរញ្ញវត្ថុ និងរបាយការណ៍ហិរញ្ញវត្ថុ ដើម្បីដាក់ពាក្យកម្ចីកាន់តែមានប្រសិទ្ធិភាព៕
អត្ថបទ និង រូបភាព៖ ឈិត សាវី
