ឯកឧត្តមរដ្ឋមន្ត្រីក្រសួងព័ត៌មានថ្លែងថា ប្រសិទ្ធភាពនៃការផ្សព្វផ្សាយ គឺស្ថិតនៅលើកិច្ចទំនាក់ទំនងល្អជាមួយស្ថាប័ននៃប្រភពផ្តល់ព័ត៌មាន ដែលមានការរៀបចំច្បាស់លាស់អ្នកនាំពាក្យ ដែលមានសមត្ថភាព និងជំនឿទុកចិត្ត ក៏ប៉ុន្តែយ៉ាងណាក៏ដោយ អង្គភាពសារព័ត៌មាន មិនអាចខ្វះបាននោះឡើយ គឺការពង្រឹងសាមគ្គីភាពផ្ទៃក្នុងរបស់ខ្លួន !
ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន មានប្រសាសន៍ក្នុងពិធីអបអរសាទរ ខួប១០ឆ្នាំ នៃដំណើរការផ្សាយវិទ្យុជាតិ FM នគរភ្នំ ១០៣MHz និងខួប ៤ឆ្នាំ ទូរទស្សន៍ជាតិខេត្ត នៃមន្ទីរព័ត៌មានខេត្តសៀមរាប នារសៀលថ្ងៃទី២៦ ខែមករា ឆ្នាំ២០២១នេះថា៖ វិស័យព័ត៌មាន គឺជាឧបករណ៍ដ៏ចាំបាច់ សម្រាប់ប្រើប្រាស់ នាំមកជាប្រយោជន៍ ដល់ការថែរក្សាស្ថិរភាពនយោបាយ ធានាបាននូវឱកាសដើម្បីអភិវឌ្ឍន៍ប្រទេសជាតិ។
យ៉ាងណាក៏ដោយ ដើម្បីឈានទៅរកគោលដៅ នៃការធ្វើឲ្យមានគុណភាព និងប្រសិទ្ធភាព ចាំបាច់ណាស់គឺការទំនាក់ទំនងល្អ ជាមួយបណ្តាស្ថាប័ននៃប្រភពព័ត៌មានទាំងឡាយនោះ ដូចជាមន្ទីរអង្គភាពជុំវិញខេត្ត និងអាជ្ញាធរដែនដីគ្រប់លំដាប់ថ្នាក់ផងដែរ។
ការលើកឡើងរបស់ ឯកឧត្តមរដ្ឋមន្រ្តី ក្នុងគោលបំណង បង្ហាញនូវការអំពាវនាវសារជាថ្មីម្តងទៀត ទៅកាន់បណ្តាស្ថាប័ន អង្គភាពនានាដែលពាក់ព័ន្ធ ត្រូវយកចិត្តទុកដាក់ឡើងវិញទៅលើការរៀបចំតួនាទីអ្នកនាំពាក្យប្រចាំអង្គភាពរបស់ខ្លួន ដើម្បីឆ្លើយតប និងចូលរួមបន្សាបព័ត៌មានមិនពិត ដែលបង្កឲ្យមានបាតុភាព ប៉ះពាល់ដល់សង្គមជាតិ។
ជាទឡ្ហីករណ៍ សម្រាប់អ្នកនាំពាក្យ និងអាចនិយាយបានថា ជាបទពិសោធន៍មួយដ៏ល្អប្រសើរ នៃវិស័យព័ត៌មាននៅកម្ពុជា គឺជោគជ័យនៃការដឹកនាំការប្រយុទ្ធប្រឆាំង នឹងជំងឺកូវីដ-១៩ របស់សម្តេចតេជោនាយករដ្ឋមន្រ្តី ដែលត្រូវបានពិភពលោកទទួលស្គាល់។ អ្វីដែលជាកត្តាជោគជ័យនេះ នោះគឺការរៀបចំក្រុមអ្នកនាំពាក្យ ដែលមានសមត្ថភាពគ្រប់គ្រាន់ ធ្វើការ២៤ម៉ោង ហើយមជ្ឈដ្ឋាននានានៅជុំវិញមានទំនុកចិត្ត។ រីឯបទពិសោធន៍ ទទួលបានជោគជ័យផងដែរ គឺការបន្សាបព័ត៌មានក្លែងក្លាយ បំភិតបំភ័យ ស្តីពីកូវីដ-១៩ តាមរយៈអ្នកនាំពាក្យរបស់ក្រសួងសុខាភិបាល ផ្សាយជូនប្រជាពលរដ្ឋ ជឿទុកចិត្តថាជាប្រភពព័ត៌មានផ្លូវការតែមួយគត់ ស្ថានភាពពិតប្រាកដនៃជំងឺកូវីដ-១៩នៅកម្ពុជា។
ឯកឧត្តមរដ្ឋមន្រ្តី បញ្ជាក់បន្ថែមថា អ្វីដែលចាំបាច់បន្ថែមនោះ គឺ ការពង្រឹងសាមគ្គីភាពផ្ទៃក្នុង ការជួបប្រជុំគ្នាដកស្រង់បទពិសោធន៍ ការចែករំលែកចំណេះដឹង និងរួមគ្នាដោះស្រាយបញ្ហាប្រឈម។
ក្នុងសម័យកាលប្រើប្រាស់បញ្ញាញាណសិប្បនិម្មិត ( បដិវត្ត ៤.០ ) ឬហៅថា អេអាយ (AI) ព័ត៌មានវាពិតលឿនពេក ច្រើនពេក ហើយក៏ស្មុគ្រស្មាញខ្លាំងណាស់ដែរ ដែលកិច្ចការទាំងនេះ ត្រូវតែរួមកម្លាំងគ្នាធ្វើ ទើបអាចរកឃើញនូវប្រសិទ្ធភាពការងារ ដូច្នេះការជួបប្រជុំប្រមូលព័ត៌មានប្រតិកម្មអវិជ្ជមាន គឺកាន់តែមានសារៈសំខាន់ថែមទៀត ដើម្បីប្រើប្រាស់ប្រព័ន្ធផ្សព្វផ្សាយព័ត៌មាន ឆ្លើយតបឲ្យបានទាន់ពេលវេលា៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក សេង ផល្លី
